၁ ပ့း ၅း၈, ကီၤသုသးတက့ၢ်. ဆိးသီတက့ၢ်. အဂ့ၢ်ဒ်အံၤ ဒ်ခ့ယုၢ်ကညီၤ ရူၢ်ရူၢ်အသိးန့ၣ်, သုဒုၣ်သုဒါ မုၣ်ကီၤလံၢ် ဟးဝ့ၤဝီၤ ဃုပှၤလၢ အကယူၢ်လီၤဝဲလီၤ.
တဘၣ်အိၣ်ကတီၢ်လၢ နကခီၣ်ရီၣ်မုၣ်ကီၤလံၢ်တဂ့ၤ. ဃ့ၢ်ကွံာ်လၢတၢ်လ့ပစီတက့ၢ်. ကၠ့ခီးဘ် တဘျီ ဟးလၢပှၢ်ပူၤကွ့ကလံၤ (ပှၤတနီၤတဲဝဲညိၣ်ကလံၤ) လၢအပျုၤလီၤ. တဆိကမိၣ်ဝဲလၢ တၢ်လီၤပျံၤကအိၣ် နီတမံၤဘၣ်. သတူၢ်ကလာ် နၢ်ဟူတၢ်ကလုၢ်သီၣ်ဒ် သၣ်မံယီၤ မံၤလၢအလီၢ်ခံ, ဒီးထံၣ်ဝဲလၢ ခ့ဖါသူ လၢတၢ်သၣ်ဝံၤ အသးတဒု ဟဲစီၤအီၤလၢ အလီၢ်ခံလီၤ. ပိာ်ခွါ ဖိအံၤ ဃ့ၢ်ချ့ထီၣ်ဒီး ခ့တဒုအံၤ လူၤအီၤ ချ့ထီၣ်လီၤ. ဖဲအဆိကမိၣ်ထီၣ်ဝဲလၢ ကဘၣ်မၤဝဲဒ်လဲၣ် အခါ, သ့ၣ်နီၣ်ထီၣ်က့ၤဝဲလၢ ပှၤတဲဝဲလၢ ပှၤတဂၤဂၤ ဆၣ်ဖိကီၢ်ဖိ အဒူတဒု မ့ၢ်လူၤအီၤန့ၣ် အဝဲမ့ၢ်ဘ့ၣ်လီၤကွံာ် အတၢ်ကူတၢ်သိးဒီး ကွံာ်လီၤဝဲဒီး တၢ်ဒူတၢ်ဃိၤတဒုန့ၣ် ကကဒံကဒါ တစဲးလီၤ. တဘျီဃီ အဝဲဘ့ၣ်လီၤအဆ့ကၤခိး ဝံၤ ကွံာ်ခ့ဖါသူန့ၣ်လီၤ. ခ့တဒုအံၤ အိၣ်ကတီၢ်ဒီး နၢကွၢ်ဆ့ကၤန့ၣ်ဝံၤ အ့ၣ်လီၤကလဲဝဲဝံၤ လူၤကဒီး ကၠ့ခီးဘ်လီၤ. တုၤခ့ဘူးထီၣ်အီၤဒီး, အဝဲဘ့ၣ်လီၤကဒီး အဆ့ကၤရှၢး ဒီးကွံာ်တၢ်မံၤလာ် တဒုန့ၣ်လီၤ. ခ့တခီ နၢကွၢ်ကဒီး တၢ်ကံးညာ် အံၤဝံၤ အ့ၣ်ဖှီလီၤကလဲဝဲဝံၤ လူၤကဒီး ဝဲန့ၣ်လီၤ. ခ့ဖါသူအံၤ ခီဖျိပှၢ်ဒီး ကခီကဒီး တၢ်လီၢ်ပျီလီၤ. ဘၣ်ဆၣ် ကၠ့ခီးဘ် တုၤဃီၤဆူ အဟံၣ်လံ. က့ၤနုာ်ဆူ အဟံၣ်ပူၤ လၢအချ့ ကးတံာ်ဃာ်အြတဲၤ, နုာ်လီၤလၢ အလီၢ်မံခိၣ်, ပဲဘၢအသးလၢ ယၣ်လုးဖးတီၣ် တဘျုးကထၢ ဒီးကနိးကစုာ် ဒီတဂၤညါလီၤ. တတီၤဒီး ကိးထီၣ်ဝဲ, “ခ့ဖါသူလူၤယၤ, ခ့ဖါသူလူၤယၤ, ဘူးကချုးန့ၢ်ယၤတခီ, ယပျံၤတၢ်ဒိၣ်မး.”
အပၢ်ဖီၣ်ထီၣ်ကျိ လဲၤလူၤဃုခ့ဖါသူ ဘၣ်ဆၣ် တထံၣ်ဝဲဘၣ်. ထံၣ်ထဲ ဆ့ကၤခိးဒီး ရှၢးအက့အခီလၢ အအိၣ်ြပံြပါအသး လၢပှၢ်ပူၤန့ၣ်လီၤ. ကၠ့ခီးဘ် ကွၢ်ဆၢၣ်မဲာ် ဒီးတၢ်သံအံၤ တလိးကီ အဆ့ကူဆ့ကၤ တဖၣ်ဘၣ်. လၢအသးသမူ အဂီၢ်, တအိၣ်ကတီၢ်ကွၢ် ခ့ဖါသူ ဒီးကတိၤအါတၢ်ဘၣ်. တခီၣ်ရီၣ်ဒုးအီၤ စ့ၢ်ကီး ဘၣ်. ဃ့ၢ်ဒီး ပူၤဖျဲးဝဲလီၤ.
လၢသးစၢ် တဖၣ်အဂီၢ် တၢ်ပူၤဖျဲးအလီၢ် သ့ဝဲထဲ တၢ်နီၣ်ပသး, ပလီၢ်ပသး ထီဘိဒီး တၢ်ထုကဖၣ်န့ၣ်လီၤ. အဝဲသ့ၣ် ကတိၤမုာ်လီၤအသး လၢတၢ်နီၣ်ပသး, တၢ်ထုကဖၣ် မ့ၢ်တအိၣ်နာ်သက့ ပမ့ၢ်ခရံာ်ဖိသ့ဝဲ န့ၣ်လီၤ. တၢ်ဆိကမိၣ် ဒ်အံၤ ကမၣ်ဝဲလီၤ. စီၤပ့းတရူး သိၣ်ပှၤအံၤ အိၣ်ဒီး အဂ့ၢ် လၢအတီဝဲ န့ၣ်လီၤ. ဖဲခရံာ်ဘၣ်တၢ်သမံသမိးအခါ, စီၤပ့းတရူး ဆ့ၣ်နီၤဆူးလၢၤအသးလၢ မ့ၣ်အူ လီၤ. ဆိကမိၣ် ဝဲဒၣ်လၢ အဝဲမ့ၢ်အိၣ်လၢ ပှၤလၢအတမ့ၢ်ခရံာ်အပျဲၢ် တဖၣ်အကျါ န့ၣ် ပှၤတသ့ၣ်ညါအီၤဘၣ်န့ၣ်လီၤ. ဘၣ်ဆၣ် တၢ်ခ့တၢ်ပှၤပိာ်မုၣ်တဂၤ သ့ၣ်ညါ အီၤဒီး တဲဖျါထီၣ်ဝဲလၢ အဝဲမ့ၢ်ခရံာ်အပျဲၢ် တဂၤန့ၣ်လီၤ. လၢတၢ်အံၤအဃိ, အဝဲသမၢခရံာ်ဒီး တသ့ၣ်နီၣ်ထီၣ်က့ၤ ခရံာ်အတၢ်ဒုးပလီၢ်အီၤ လၢတချုးဆီအိၣ်အိ ဒံးသၢဘျီဘၣ်န့ၣ်, အဝဲကသမၢအီၤန့ၣ်လီၤ. မးသဲ ၂၆း၄၁ တဲဝဲ, ဆိးသီဒီး ဘါထုကဖၣ် တၢ်ဒ်သိး သုသုတလဲၤနုာ်လၢ တၢ်လ့ပစီအပူၤ တဂ့ၤန့ၣ်လီၤ.
