၁ သ့း ၅း၆, မ်သုတမံသပ့ၤ ဒ်ပှၤဂၤအသိး န့ၣ်တဂ့ၤ.
လၢကမျၢၢ်အတၢ်မၤ အဝဲၤဒၢးအလီၢ်တခါ လၢအဘၣ်ဃးဒီး ပဒိၣ်န့ၣ်, ပှၤနီၣ်သိလ့ၣ်ဖိ တဖၣ်လဲၤအီၣ် တၢ်လၢ တၢ်အီၣ်အလီၢ်လၢ မုၢ်ဆါခီ တၢ်အီၣ်အကတီၢ် လီၤ. အဝဲသ့ၣ် ပာ်တ့ၢ်အသိလ့ၣ် လၢအနီၣ်ဝဲတဖၣ်န့ၣ် လီၤ. တၢ်ဘျၣ်တဂၤလဲၤ နုာ်ခူသူၣ် ဝဲဒီး ဟုၣ်န့ၢ်သိလ့ၣ်ဖးဒိၣ် တဆိဒီး နီၣ်ကွံာ်ဝဲဆူ ဝ့ၢ်အချၢ န့ၣ်လီၤ. ပှၤနီၣ်သိလ့ၣ်ဖိ တဖၣ် အီၣ်တၢ်ဝံၤ က့ၤကွၢ်က့ၤအသိလ့ၣ် ဒီး သ့ၣ်ညါဝဲလၢ အသိလ့ၣ် ဖးဒိၣ်လီၤမၢ်ကွံာ် ဝဲတဆိလီၤ.
တၢ်မၤအလီၢ်ဖဲ အံၤ ပှၤနီၣ်သိလ့ၣ်ဖိတဂၤ တၢ်မ့ၢ်လိၣ်ဘၣ်အီၤဒီး မ့ၢ်တအိၣ်ဝဲလၢ တၢ်မၤလီၢ်အခါ အသကိး တဖၣ်ကိးတဲဘၣ်အီၤလၢ ရ့ဒယိၣ် (ကလံၤဒၢ) လီၤ. အဝဲသ့ၣ် မ့ၢ်သူတၢ်ပီးတၢ်လီ တခါအံၤ ခီဖျိ ရ့ဒယိၣ် (ကလံၤဒၢ) န့ၣ် သိလ့ၣ်လၢ တၢ်လိၣ်ဘၣ်အီၤ တဆိအံၤ အဒၢလွဲဖိသီၣ်ထီၣ်ဝဲ ဒီး သ့ၣ်ညါဝဲလၢ တၢ်လိၣ်ဘၣ်အီၤန့ၣ်လီၤ. တုၤပှၤနီၣ်သိလ့ၣ်ဖိတဖၣ် သ့ၣ်ညါဝဲလၢ သိလ့ၣ် ဖးဒိၣ်လီၤမၢ်တဆိလံဒီး အဝဲသ့ၣ် သူတၢ်ပီးတၢ်လီတမံၤအံၤ, ဒီး သိလ့ၣ်လၢ တၢ်ဟုၣ်အီၤတဆိအံၤ အဒၢလွဲဖိ သီၣ်ဒၣ် တပယၢ်ဃီ တအိၣ်ကတီၢ်ဝဲ နီတတီၤဘၣ်ဒီး မ့ၢ်မး တၢ်မၤဖုးမၤပျီၢ် မၤကမၢကမၣ် တၢ်ဘျၣ်တဂၤအံၤလီၤ. တၢ်ကစီၣ် ဘၣ်တၢ်ဆှၢအီၤဆူ ဝ့ၢ်ဒီဝ့ၢ်ညါ လီၤ. ပလံးဖိ တဖၣ်လူၤ ဃုတၢ်လၢ တၢ်လီၢ်ကိးပူၤ ဒီးထံၣ်န့ၢ်သိလ့ၣ် ဖးဒိၣ်အံၤ အိၣ်လၢ ကျဲခိၣ်လၢ ဝ့ၢ်ချၢလီၤ. အမ့ၣ်အူ ကပီၤဝဲ, အစဲးလဲၤတၢ်ဒီး အဒၢလွဲဖိသီၣ် တလီၤပံာ်ဘၣ်. မ့မ့ၢ် တၢ်ဘျၣ်တဂၤ တအိၣ်လၢ သိလ့ၣ်ပူၤ လၢၤဘၣ်. အိၣ်ဝဲတဘူၣ်လၢၤဘၣ်.
ရံးခၠၢးစၢၣ် မ့ၢ်ပှၤဆှၢတၢ်ပရၢဖိ လၢအမၤတၢ်လၢ လံာ်ပရၢတၢးလီၤ. အဝဲလဲၤဆူ အတၢ်မၤအလီၢ် ဒ်ညီနုၢ်အသိးလီၤ. ဖဲအနီၣ်အသိလ့ၣ် ဘူးဒီးဟံၣ်တဖျၢၣ် န့ၣ် နၢ်ဟူဝဲ ပိာ်မုၣ်ဖိ တဂၤကိး ထီၣ်ဝဲ, “မၤစၢၤယၤ, မၤစၢၤယၤ” လီၤ. တဘျီဃီ အဝဲပာ်တ့ၢ် အသိလ့ၣ်ဒီး လဲၤကွၢ်ဃုတၢ်ဒီး ထံၣ်ဘၣ်ဝဲ ပိာ်မုၣ်ဖိယဲၢ်နံၣ်တဂၤ အိၣ်လၢ ဟံၣ်ပူၤထဲတဂၤဧိၤလီၤ. ဟံၣ်တခီ မ့ၣ်အူအီၣ်ထီၣ်သီအီၤ, ဒီးကိးထီၣ်ဝဲလၢ တၢ်မၤစၢၤ အဂီၢ်လီၤ. ရံးခၠၢးစၢၣ် ဂဲၤလိာ်မၤပံာ်မ့ၣ်အူဒီး စိာ်ထီၣ်ကွံာ်ပိာ်မုၣ်ဖိအံၤလၢ တၢ်ပူၤဖျဲး အလီၢ်လီၤ. တၢ်အံၤမ့ၢ် တၢ်မၤဖုး မၤပျီၢ်ပှၤဆှၢလံာ်ဖိ တဂၤအံၤ ဒီးမ့ၢ်ပှၤလၢ အသးသဒ့ၣ် ဂ့ၤအဃိ မၤပံာ်မ့ၣ်အူ န့ၢ်ဝဲ, မၤထူၣ်ဖျဲး သးသမူ တဖျၢၣ်ဒီး ကဲထီၣ်ဘၣ် ပှၤဒူပှၤဃိၤ (ဟံရိ) တဂၤန့ၣ်လီၤ.
တၢ်ကမၤဖုးပှၤ, ဒီး တၢ်ကမၤ ကမၢကမၣ်ပှၤ အဒိၣ်ကတၢၢ် ကမ့ၢ်ဝဲဖဲ တၢ်အစိၤကတၢၢ် ဒီး ပကစၢ်ခရံာ် ကဟဲလီၤ က့ၤဝဲ ဒ်အကတိၤဆိပာ်ဝဲ န့ၣ်လီၤ. တချုးခရံာ်ကဟဲဒံးဘၣ်န့ၣ် ခရံာ်တဲဆိပာ်ဝဲလၢ တၢ်ကမၤ အသးလီၤဆီတဖၣ် ကအိၣ်ထီၣ် ဝဲ, တၢ်လဲလိာ်တဖၣ် ကအိၣ်ထီၣ်ဝဲ, ဒီးတၢ်အၢတၢ်သီ တၢ်သံတၢ်ပှၢ် ကအါထီၣ်၀ဲ, တၢ်ကမၤအသးအမံၤတဖၣ် အမံၤ ဒီးမ့ၢ်ဒၣ် တၢ်အခီၣ်ထံး ဒံးန့ၣ်လီၤ. တၢ်ကဘၣ်မၤအသး တဖၣ်မၤအသးလံ, ထံၣ်ဘၣ်လံ, သ့ၣ်ညါဘၣ်လံ. ဘၣ်ဆၣ် ပှၤဟီၣ်ခိၣ်ဖိ နာ်ဝဲလၢ ခရံာ်အတၢ်ဟဲ က့ၤခံဘျီတဘျီ အတၢ်စံးပာ် န့ၣ်မ့ၢ်ဒၣ် တၢ်တဲပူန့ၣ်လီၤ. ခရံာ်ဖိတဖၣ်တခီ တနီၤစံးမ့ၢ်ဒၣ် တၢ်အခီၣ်ထံးလီၤ. တၢ်နီၢ်နီၢ် တမၤအသးဒံးဘၣ်. ခရံာ်တဟဲက့ၤ လၢအဆိအံၤဘၣ်. ဘၣ်ဆၣ် လၢတၢ်တပာ်သူၣ်ပာ်သးအပူၤ ဘၣ်န့ၣ် ခရံာ်ကဟဲက့ၤဝဲဒီး မ့ၢ်ဝဲ တၢ်မၤဖုးမၤပျီၢ် မၤကမၢကမၣ် ပှၤဟီၣ်ခိၣ်ဖိ အဒိၣ်ကတၢၢ် န့ၣ်လီၤ. ပမ့ၢ်ဖုးမ့ၢ်ပျီၢ် ကမၢကမၣ် သနာ်က့, ပမ့ၢ် တမံသပ့ၤ ဘၣ်ဒ် စီၤပီလူးကွဲးသိၣ် သီပှၤသ့းစၤလနံ ဖိအသိးဒီး, ပကအိၣ်ဒီး တၢ်သ့ၣ်ညါ, တၢ်သးသဒ့ၣ် ဂ့ၤလၢ ပကတူၢ်လိာ် ခရံာ်အတၢ်ဟဲ က့ၤအံၤန့ၣ်လီၤ.
