၃ မိၤ ၁၉း၁၈, မၤအၢဆၢတၢ်အၢ တဂ့ၤ. ဃုမၤကၣ်တၢ်ထီဒါ နပှၤဂီၢ်မုၢ် အဖိတဂ့ၤ. ဒီးနဘၣ်အဲၣ် ပှၤလၢနဃၢၤ ဒ်နကစၢ်ဒၣ်နဲ အသိးတက့ၢ်. ယဲဒၣ်အံၤ ယမ့ၢ်ယွၤလီၤ.
ပှၤခရံာ်ဖိ တဂၤ တအိၣ်လၢၤလၢ တၢ်အိၣ်ဖှိၣ်အပူၤ ၂၅ နံၣ်လံ. အတၢ်အိၣ်ဖှိၣ်သရၣ် လဲၤဆူအအိၣ်ဒီး သံကွၢ်အီၤလၢ အဘၣ်မနုၤလၢ အတလဲၤ ထီၣ်ဘူၣ်တၢ်ဘါတၢ် ဘၣ်န့ၣ်လဲၣ်. တဲဆၢဝဲလၢ သါတဘၣ်လိာ် ဒီး တၢ်အိၣ်ဖှိၣ်သးပှၢ် တဂၤအဃိလီၤ. သရၣ်သံကွၢ်အီၤလၢ ပှၤန့ၣ်အိၣ်မူဒံးဧါ. တဲဆၢဝဲ သံဝဲအိၣ်အနံၣ် ၂၀ လံ. သရၣ်သံကွၢ်ကဒီးအီၤ, နပျဲ ပှၤတဂၤလၢ အသံလံအနံၣ်ခံဆံ လၢအကကဲထီၣ် တၢ်ြတီ ဘၣ်နၤလၢ နကဟဲက့ၤဆူ တၢ်အိၣ်ဖှိၣ် အအိၣ်ဒီး တထီၣ်ဘူၣ်တၢ်ဘါတၢ် လၢၤဘၣ်န့ၣ်ဧါ. ပျၢ်ကွံာ် အတၢ်ကမၣ်ဒီး ဟဲက့ၤ က့ၤဆူ ခရံာ်အအိၣ်တက့ၢ်. အဝဲထံၣ်က့ၤ ဝဲလၢ အတၢ်မၤအံၤ ကမၣ်လံဝဲ ဒိၣ်ဒိၣ်ဒီး ဟဲက့ၤထီၣ် ဘူၣ်ထီၣ်ဘါက့ၤ တၢ်န့ၣ်လီၤ.
တၢ်တဂ့ၤဖးဒိၣ် လၢပမၤကမၣ်လီၤက့ၤပသး မ့ၢ်ဝဲ ပသးဟ့ ပှၤတဂၤဂၤန့ၣ် လီၤ. ဆိကမိၣ် စီၤဧ့ရှီၤ အဂ့ၢ်. အဝဲအိၣ်ဒီး တၢ်သးက့ၣ်ဒီး တၢ်သးကါ လၢအပူၤ လၢအနံၣ် ၂၀ အတီၢ်ပူၤလီၤ. စးထီၣ် လၢစီၤယၤကိာ် ဒီးအမိၢ် လီန့ၢ်အပၢ် စီၤအံၤစဲး လၢအမဲာ်ဘျီၣ်ဝဲ ဒီး မၤန့ၢ်ဖိဝဲၢ်ကိ အလီၢ်ကဘျံးကဘျၣ်န့ၣ်, စီၤဧ့ရှီၤ အတၢ်သးက့ၣ် အပုၢ်န့ၣ် တလီၤပံာ် ဝဲနီတဘျီဘၣ်. တၢ်ကစီၣ်ဟူထီၣ်ဝဲလၢ စီၤဧ့ရှီၤ ကမၤသံအဒီပုၢ်ဝဲၢ် ခွါလၢ အအိၣ်ဖျဲၣ်တဃံာ် ဒီးအီၤန့ၣ်လီၤ. အပုၢ်ဘၣ်ဃ့ၢ်အိၣ်ခူသူၣ် ဝဲလၢအဖါတံၢ် စီၤလၤဘၣ် အအိၣ်န့ၣ် ဒီးထူးထီၣ်တီၤထီၣ် ဝဲလီၤ. အနံၣ် ၂၀ ပူၤကွံာ်လံ သနာ်က့ စီၤယၤကိာ် ပျံၤဘၣ်ဒံး အဝဲၢ်စီၤဧ့ရှီၤ န့ၣ်လီၤ.
စီၤယၤကိာ် ဆှၢလီၤ တၢ်ကစီၣ်ဒီး တၢ်ဟ့ၣ်သ့ၣ်တဖၣ် ဆူစီၤဧ့ရှီၤ အအိၣ်လၢ အဝဲၢ်ကတူၢ်လိာ် က့ၤအီၤ ဒီးအိၣ်ဃူအိၣ်ဖိးက့ၤ ဒီးအီၤအဂီၢ်န့ၣ်လီၤ. အဝဲၢ်တဲဆၢ ဝဲလၢ အကခိးလီၤအခိၣ်ဒီး သုးဖိလွံၢ်ကယၤဂၤလၢ တၢ်တူၢ်လိာ် အီၤအဂီၢ်န့ၣ်လီၤ. လၢမုၢ်နၤဖဲ စီၤယၤကိာ် ကနိဒီး ကလူး ဒီးမၤနၢၤအီၤဝံၤ အလီၢ်ခံန့ၣ်, စီၤယၤကိာ် တပျံၤလၢၤ အဝဲၢ်ဘၣ်. သ့ၣ်ညါဝဲလၢ ယွၤလၢအပျၢ်ကွံာ် အတၢ်ကမၣ် လံန့ၣ် လဲလိာ်ကွံာ် တၢ်သးကိၤလၢ အဝဲၢ်အပူၤသ့, ဒီး အဝဲၢ် ကတူၢ်လိာ် အတၢ်ဆီၣ်လီၤအသး ဒီးအတၢ်ပီၢ်ယၢ်လီၤက့ၤအသးန့ၣ်လီၤ.
ဖဲစီၤယၤကိာ် ကနိဒီး ကလူးတဂၤအခါန့ၣ်, ကလူးအဂၤတဂၤ ဘၣ်တၢ်ဆှၢလီၤအီၤ ဆူ စီၤဧ့ရှီၤ အအိၣ်လီၤ. စီၤဧ့ရှီၤ ထံၣ်အပုၢ်လၢ တၢ်မံမီၢ်အပူၤလၢ အဝဲအိၣ်ဒီး တၢ်သူၣ်ကၢ်သးလီၤ မ့ၢ်လၢ အသ့ၣ်ညါ ဘၣ်ဝဲလၢ အမိၢ်သံလံအဃိလီၤ. ထံၣ်စ့ၢ်ကီး ဝဲလၢ မူခိၣ်ကလူး တဖၣ် အိၣ်ဝးတရံး အီၤန့ၣ်လီၤ. စီၤဧ့ရှီၤ တဲဘၣ် အသုးဖိတဖၣ်လၢ အတၢ်မံမီၢ်အံၤဒီး မၤလိာ်အသုးဖိတဖၣ်လၢ အသုတမၤ အၢအီၤတဂ့ၤန့ၣ်လီၤ. အဂ့ၢ်မ့ၢ်ဝဲ အပၢ်အယွၤအိၣ်ဝဲ ဒီးအီၤလီၤ.
တုၤအထံၣ်ဘၣ်အပုၢ် လၢအခီၣ်တကျဲၢ်န့ၣ်ဒီး စီၤဧ့ရှီၤ ဃ့ၢ်သဂၢၢ်အီၤ, ဒီးဖိးအီၤ, ဒီးထိၣ်လီၤ တီၤအသးလၢ အကိာ်လိၤ, ဒီးနၢမူအီၤ ဒီးအမဲာ်ထံလီၤ ဝဲဒၣ်လီၤ. သုးဖိတဖၣ် တုၤအထံၣ်ဒီပုၢ်ဝဲၢ် ခံဂၤအံၤ အတၢ်သဂၢၢ်လိာ်အသးဒီး အဝဲသ့ၣ် အသးဘၣ်ဒိဝဲလီၤ. ဘၣ်ဆၣ် တၢ်လၢအလဲလိာ် အသးလၢ အသုးခိၣ် စီၤဧ့ရှီၤ အသးပူၤန့ၣ် အဝဲသ့ၣ် နၢ်ပၢၢ်ဝဲ တသ့ဘၣ်. ပှၤလၢအဒုးဟါမၢ်ကွံာ် တၢ်သးဟ့ န့ၣ် မ့ၢ်မတၤတဂၤလဲၣ်. မ့ၢ်ဒၣ်ယွၤ တဂၤဧိၤ လီၤ.
သုမ့ၢ်တပျၢ်ကွံာ် ဘၣ်ပှၤကညီ အလီၤကမၣ်တၢ်ဘၣ်ဒီး, သုပၢ်တပျၢ်ကွံာ်စ့ၢ်ကီး သုလီၤကမၣ်တၢ်ဘၣ်. (မးသဲ ၆း၁၅).
