လီၣ် ၂း၂၆, ပှၤလၢအမၤနၢၤ တၢ်ဒီး ဟံးဃာ်ယတၢ်မၤ တုၤအကတၢၢ်န့ၣ်, ယကဟ့ၣ်အီၤလၢ အစိအကမီၤ လၢပှၤကလုာ်တဖၣ် အဖီခိၣ်.
ပှၤထူးပှၤတီၤတဂၤ ဘၣ်တၢ်သံကွၢ်အီၤ, နမၤန့ၢ်နတၢ်ထူးတၢ်တီၤဒ်လဲၣ်. လၢအတၢ်စံးဆၢ တၢ်သံကွၢ်အံၤ, ယၢၤထီၣ်ဝဲတၢ်လၢ အမၤအသး တမံၤလၢ အဆံးဒံး အခါန့ၣ်လီၤ. ဖဲယအိၣ် အနံၣ် ၁၀ အခါ, ယထံၣ်ဘၣ် လၢယသကိးဖိတဖၣ် လဲၤဆူ ပှၢ်ပူၤ လၢအဒဲးန့ၢ် သ့ၣ်တပှီာ်ဖိတကလုာ် အသၣ်ဖိလၢ ပှၤအီၣ်အီၤဘဲမး န့ၣ်လီၤ. ယဃ့အခွဲး လၢယပၢ်လၢ အကပျဲ ယလဲၤဒဲးန့ၢ် သ့ၣ်သၣ်ဖိစ့ၢ်ကီးန့ၣ်လီၤ. ယသးခုဒီး ယမၢယမိၢ် ကတဲာ်ကတီၤန့ၢ်ယၤ တၢ်အီၣ်လၢ ယကအီၣ်လၢ မုၢ်ဆါခီ အဂီၢ်ဒီး ဟံးန့ၢ် ဃၤဖးဒိၣ် တဖျၢၣ်လၢ ယကလဲၤ တၢ်အဂီၢ်လီၤ. ယပၢ်ကိးဃီၤယၤဒီးတဲဝဲ, နကလဲၤတၢ်အံၤလၢ နကလိာ်ကွဲအဂီၢ်ဧါ, မ့တမ့ၢ် လၢနကဒဲး သ့ၣ်ဘဲရ့ၣ်ဖိ အသၣ်လဲၣ်. ယတဲအီၤ လၢ ယကလဲၤဒဲးသ့ၣ်သၣ်ဖိ အဂီၢ်လီၤ. ယပၢ်တဲယၤယကဟ့ၣ် ကူၣ်နၤဒ်အံၤ, တုၤနထံၣ်သ့ၣ်တပှီာ် ဖိတထူၣ်လံဒီး အသၣ်အါကစီဒီန့ၣ် တဘၣ်ပာ်တ့ၢ်အီၤဒီး ဟးဃုအသီ တပှီာ်ဖိကဒီးတဂ့ၤ. ပှၤဖိသၣ် အဂၤတဖၣ် ကဃ့ၢ်ဝဲဆူအံၤဆူဘးဒီး ကဒဲးသ့ၣ်သၣ် ဖိဖဲအံၤ ဖဲန့ၣ်လီၤ. အဝဲသ့ၣ် ကမၤလၢာ် အဆၢကတီၢ် ဖးအါလၢ အမၤဝဲဒ်အံၤ န့ၣ်လီၤ. နဲန့ၣ် အိၣ်ခိးဃာ် နသ့ၣ်တပှီာ်ဖိ ဒီးဒဲးအသၣ်တက့ၢ်.
ပှၤဖိသၣ် အဂၤတဖၣ် မၤစဲဃဲၤဝဲ ဒ်ယပၢ်တဲပာ်ဝဲ အသိးဒီး ဖဲမုၢ်ဟါလီၤန့ၣ် တၢ်ဘှံးအသးဒီး မၤသ့ၣ်သၣ်ဖိ တန့ၢ်အါဘၣ်. မ့မ့ၢ်ယဲ ယမၤဒ် ယပၢ်တဲယၤ အသိးယအိၣ် တံၢ်ဃာ် လၢယသ့ၣ်တပှီာ်ဖိ ဒီးယဒဲး အသၣ်တုၤ အလၢာ်ကဆှၣ်ဒၣ်ဒီး ယလူၤဃု ကဒီးအသီဒီး ဒဲးကဒီး ဒ်အံၤတုၤ အလၢာ်ဒီး ယမၤဒ်အံၤ ဒီနံၤညါလီၤ. တုၤနံၤကတၢၢ်ဒီး ယမၤန့ၢ်သ့ၣ်ဘဲရ့ၣ်ဖိ အသၣ်အါန့ၢ်ပှၤဂၤ တဖၣ်လီၤ. တၢ်တဘှံးယသး ဒိၣ်ဒိၣ် ဘၣ်. ဒီးယသးမုာ်သးမံ လၢယမၤတၢ်မၤ တနံၤန့ၣ် ဂ့ၤဂ့ၤ အဃိလီၤ. တုၤယဟဲက့ၤတုၤဟံၣ်ဒီး ယပၢ်ကိးဃီၤယၤဆူ အအိၣ် လၢအကသံကွၢ် ယၤလၢ ယဒဲးန့ၢ် သ့ၣ်သၣ် ဒ်လဲၣ်ဒ်လဲၣ် န့ၣ်လီၤ. ယပၢ်ဆ့ၣ်နီၤ ဝဲဒီး ထံၣ်ဝဲ ယတီၣ်ဖးဒိၣ် အပူၤန့ၣ် ပှဲၤဒီး တၤသၣ်ဖိတဖၣ်န့ၣ်လီၤ. ယပၢ်တဲယၤ, နမၤဂ့ၤမးလီၤ. နမၤထွဲ ယတၢ်မၤလိာ်နၤန့ၣ်လီၤ. လၢနသးသမူ ဒီကတီၢ် န့ၣ်မၤဒ်အံၤ တက့ၢ်. အိၣ်တံၢ်ဃာ်လၢ နတပှီာ်ဖိအပူၤ တက့ၢ်. နကကဲထီၣ် ပှၤလၢအဘျုးအဖှိၣ် အိၣ်ဝဲတဂၤန့ၣ်လီၤ. တနံၤန့ၣ် ဖဲယဂဲၤလိာ်မၤန့ၢ် သ့ၣ်ဘဲရ့ၣ်အသၣ်ဖိန့ၣ် ယပၢ်ဆါထီၣ်ဝဲ သတူၢ်ကလာ် လီၤ. လီၢ်ခံတနွံ ယပၢ်သံဒီး တအိၣ်လၢၤဘၣ်လီၤ. မ့မ့ၢ် အတၢ်သိၣ်လိယၤအံၤ အိၣ်တ့ၢ်ဝဲဒီး ယၤလီၤ. ယမ့ၢ်ထံၣ် န့ၢ်တၢ်မၤ တမံၤလၢ အဂ့ၤလၢ တၢ်ဆူညါ အဂီၢ်န့ၣ်, ယမၤအီၤတုၤ လီၤတီၤလီၤ, ယဟံးဃာ် အီၤဒီး ယတဟးဃု တၢ်မၤအဂၤ ဆူအံၤဆူနုၤ လၢအကဒုးကဲထီၣ် ယၤပှၤထူးပှၤတီၤ တဂၤ ချ့ချ့ န့ၣ်ဘၣ်. ယအိၣ်တံၢ်ဃာ် လၢယတပှီာ်ဖိ အကပၤလီၤ. ပှၤမ့ၢ်တဲယၤလၢ ယကသူယစ့လၢ ယမၤန့ၢ်ယဲလၢ ကျဲအဂၤလၢ ယကထူးတီၤထီၣ်ချ့ချ့န့ၣ်, ယတကနၣ်ဘၣ်.
တယံာ်ဘၣ်ဒီး ယကဲထီၣ်ဘၣ် ကရၢလၢ ယမၤအတၢ် အကရၢဖိတဂၤ, ယမၤတၢ်တုၤတၢ်မၤ အခိၣ်သံဝဲဒီး ယပှ့ၤက့ၤအဝဲ အစူးစး (ရှဲယၣ်) ဒီးယမၤတၢ်ဒီး ကရၢအံၤ တနံၣ်ဘၣ်တနံၣ်လီၤ. ယမၤန့ၢ် ကမျၢၢ် အတၢ်နာ်န့ၢ်ယၤန့ၣ်လီၤ. မ်ပကဟံးဃာ်သကိး ပတၢ်မၤဒၣ်ဝဲ တဂၤဒီးတဂၤ, မၤအီၤဂ့ၤဂ့ၤ, အိၣ်ဒီး တၢ်သးခုလၢ ပတၢ်မၤအပူၤ, အိၣ်ဒီးတၢ်တီတၢ်လိၤလၢ ပတၢ်မၤအပူၤတက့ၢ်.
