မးသဲ ၅း၂၄, အိၣ်ဃူအိၣ်ဖိးဒီး နဒီပုၢ်ဝဲၢ်တက့ၢ်. တုၤနုၤတစု ဟဲစိာ်နတၢ်မၤ ဘူၣ်တက့ၢ်.
ပှၤလၢအတအဲၣ်နၤ, တရ့ဒီးနၤ, ဒီးတကနၣ်ဃုာ်နၤဘၣ်န့ၣ် မ့ၢ်ပှၤလၢအသး ဟ့နၤဒီး မ့ၢ်နဒုၣ်နဒါ လီၤ. ခရံာ်မၤလိာ် ဝဲလၢ ပကမၤဃူမၤဖိးပသးဒီး ပှၤလၢအတအိၣ်ဃူအိၣ်ဖိးဒီး ပှၤတဖၣ်န့ၣ်လီၤ.
ကျဲးဒ့ၣ် အမိၢ်ထံၣ်ဝဲလၢ အဖိမုၣ် အမဲာ်တမုာ်ဘၣ်, တအိၣ်ဒီး တၢ်သးခုဘၣ်. မ့ၢ်ဘၣ်လဲၤလၢ ကၠိလၢဂီၤန့ၣ် ခိးဝဲတုၤ တၢ်ဆၢကတီၢ်ဘၣ်မးဒီး လဲၤဝဲန့ၣ်လီၤ. ဒ်သိး အသုတစဲၤခံတဂ့ၤန့ၣ် ဘၣ်ဃ့ၢ်ဝဲလီၤ.
အမိၢ်သံကွၢ်အီၤ ကျဲးဒ့ၣ်ဧၢ, ဘၣ်မနုၤ နဘၣ်မၤယံာ်မၤနီၢ်နသး လၢနကလဲၤဆူ ကၠိလဲၣ်. နကတဲာ်ကတီၤနသး လၢနကလဲၤကၠိအဂီၢ်ဝံၤလံန့ၣ် နြကၢးလဲၤကၠိတဘျီဃီလီၤ. ယကွၢ်နၤဖျါ လၢနတသးဖှံဘၣ်ဒီး နမၤယံာ်မၤနီၢ်နသးလၢ နကလဲၤကၠိအဂီၢ်အိၣ်လံတဘျုးနံၤလံ.
ကျဲးဒ့ၣ်ကအုကစွါ လၢအတၢ်စံးဆၢအပူၤ, ပှၤမၤစၢၤယၤတသ့ နီတဂၤဘၣ်. ယသကိးမုၣ် အဲလစံၣ်တဂၤ လၢအပူၤကွံာ် န့ၣ်ပရ့လိာ်ပသး ဂ့ၤမးလီၤ. ခဲအံၤအဝဲ တကတိၤတၢ်ဒီးယၤဘၣ်. တလိာ်ကွဲဒီးယၤဘၣ်. ဒီးအဝဲ ဟးဆှဲးယၤ အိၣ်လံ တနွံလံ. အမိၢ်သံကွၢ်အီၤ, မ့ၢ်နမၤ မနုၤတမံၤ လၢအမၤတမုာ် အဲလစံၣ် အသးန့ၣ်လဲၣ်. တၢ်ဂ့ၢ် ကဘၣ်အိၣ်ဝဲ တမံၤမံၤလီၤ. အဖိမုၣ်တဲအီၤ, ဖဲယသ့ၣ်ညါသ့န့ၣ် တၢ်ဂ့ၢ်တအိၣ်နီတမံၤဘၣ်.
အမိၢ်တဲကဒီးအီၤ, မ့မ့ၢ်ဒ်န့ၣ်ဒီး ဘၣ်မနုၤလၢ နတလဲၤဆူအအိၣ်ဒီး သံကွၢ်အီၤလၢ နမၤဘၣ်အီၤ တၢ်မနုၤလၢ အသးထီၣ်နၤန့ၣ်လဲၣ်. ကျဲးဒ့ၣ်တဲဆၢဝဲ ယဆိကမိၣ်လၢ ယတလဲၤဘၣ်. အဲလစံၣ်ြကၢးဟဲဆူယအိၣ် တခီဒီး တဲနၢ်ပၢၢ်ယၤ လၢတၢ်ဂ့ၢ်လၢ အမၤသးတမုာ်အီၤ န့ၣ်လီၤ.
အမိၢ်ဒုးနၢ်ပၢၢ်အီၤလၢ အဝဲမ့ၢ်ပာ်အသးဒ်န့ၣ်ဒီး အတၢ်ပာ်ကဖၢလၢ အသးအံၤ ဒိၣ်န့ၢ်တၢ်ရ့ဒီး အဲလ်စံၣ် တက့ၢ်လီၤ. လံာ်စီဆှံ တဲပှၤလၢ ပကဘၣ်လဲၤဆူ ပှၤလၢပဃၢၤ အအိၣ်ဖဲ ပဆိကမိၣ်လၢ အတၢ်ပာ်အသး ထီဒါ ပှၤန့ၣ်လီၤ. “မၤသးဒ်န့ၣ်ဒီး နမ့ၢ်လဲၤစိာ် နတၢ်မၤဘူၣ်ဆူ တၢ်လုၢ်လီၢ် ဒီးဖဲန့ၣ် နမ့ၢ်သ့ၣ်နီၣ်ထီၣ်က့ၤလၢ နဒီပုၢ်ဝဲၢ် ပာ်တၢ်ကမၣ်လၢ နလိၤ တမံၤမံၤဒီး ပာ်တ့ၢ် နတၢ်မၤဘူၣ်ဖဲ န့ၣ်လၢ တၢ်လုၢ်လီၢ် အမဲာ်ညါ ဒီးက့ၤက့ၤ တက့ၢ်. အိၣ်ဃူအိၣ်ဖိးလိာ်ဒီး နဒီပုၢ်ဝဲၢ်တက့ၢ်. တုၤနုၤတစု ဟဲစိာ်နတၢ်မၤဘူၣ် တက့ၢ်.” မးသဲ ၅း၂၃, ၂၄. မၤကွၢ်ယၤအကျဲအံၤ ဒီး သ့ၣ်ညါလၢ တၢ်နၢ်ပၢၢ် ကအိၣ်ထီၣ်ဝဲလီၤ.
ကျဲးဒ့ၣ်ဆိကမိၣ် တၢ်ဒီးစံးလၢအသး ဘၣ်တဘၣ် ယမိၢ်အတၢ်တဲအံၤ ကဘၣ်ဝဲလီၤ. တုၤအလဲၤ ဆူကၠိဒီး ထံၣ်အဲလ်စံၣ် ဆၢထၢၣ်လၢ တၢ်ကပၤဒီး သံကွၢ်အီၤ, အဲလ်စံၣ်ဧၢ, ဘၣ်မနုၤ လၢနသးဒိၣ်ယၤလဲၣ်. နတကတိၤဒီး လိာ်ကွဲဒီးယၤဘၣ်မနုၤလဲၣ်. အဲလစံၣ် တဲဆၢအီၤ, နတဲအၢ တဲသီ ယဂ့ၢ်လၢ ပှၤဂၤလီၤ. ယနၢ်ဟူလၢ ယနၢ် လၢနတဲ ဘဲစ့ၣ်ဖီးထၢၣ် လၢယမ့ၢ် ပှၤမၢးကတၢၢ် လၢနသ့ၣ်ညါအီၤလီၤ. နတဲလၢအပူၤကွံာ် မုၢ်လွံၢ်နံၤ န့ၣ်လီၤ. နသ့ၣ်ညါလံဧါ.
တဘျီဃီ ကျဲးဒ့ၣ် နံၤထီၣ်ဖးဒိၣ်ဝံၤ ဖီၣ်ထီၣ် အဲလ်စံၣ်အစုဒီး တဲနၢ်ပၢၢ်အီၤလီၤ. နသ့ၣ်ညါလၢ ယကိးန့ၢ် ထိၣ်ဖိလၢ ယဘုၣ်အီၤတဘ့ၣ် အမံၤလၢ နမံၤလီၤ. ယတဲဘၣ်ဘဲစ့ၣ် လၢထိၣ်ဖိအံၤ တံာ်တဲာ်စးခိလၢ အနိးလၢ အြတၤပူၤဒီး တလဲၣ်လီၤတၢ်ချံ တဖၣ်ပှဲၤဖၣ်ကပူၤန့ၣ်လီၤ. အဲလ်စံၣ်နံၤထီၣ်ဝဲ, ဖီၣ်ဃာ်လိာ်အစု ဒီး လဲၤသကိးဝဲဆူ တီၤပူၤန့ၣ်လီၤ.
