ဒၤ ၁၁း၃၂, မ့မ့ၢ်ပှၤလၢ အသ့ၣ်ညါ အကစၢ်န့ၣ် ကဆူၣ်ထီၣ်ဒီး ကဘီၣ်ထီၣ်ညီထီၣ် ဝဲလီၤ.
လၢကီၢ်စွံးစလဲၣ် ပှၤတဂၤ အမံၤကၠိၣ်ဟဲရှူရၢၣ်, အမံၤအိၣ်တ့ၢ်ဝဲလၢ တၢ်သးဝံၣ်အပူၤဒီး တၢ်ဃဲၤအပူၤလီၤ. အဂ့ၢ်မ့ၢ်ဝဲ, ဟံၣ်ဖိဃီဖိတဒူၣ် လၢအဘုၣ်ဆၣ်ဖိကီၢ်ဖိ န့ၣ် ဖဲတၢ်ကိၢ်ခါ လဲၤဆှၢထီၣ်အဆၣ်ဖိကီၢ်ဖိလၢ တၢ်လီၢ်ထီၣ်ထီတစဲး မ့ၢ်လၢ တၢ်တဂိၢ်ကဲၣ်ဆိးလၢၤဘၣ် အဃိလီၤ. ဖဲအဆၣ်ဖိကီၢ်ဖိအီၣ်အဆၣ် အခါ အဝဲသ့ၣ် ကူးနီၣ်ဒီး ပာ်တ့ၢ်အဖိမုၣ် တနံၣ်တဂၤ ဒီးအဝဲၢ်ပိာ်ခွါ ၄ နံၣ်လၢ သ့ၣ်ကဒုလာ်လီၤ. ပိာ်ခွါဖိတ၈ၤအံၤ အနၢ်တအၢ ဒီးကတိၤတၢ် တသ့ဘၣ်. ထံၣ်ဝဲလၢ လံာ်ဖးဒိၣ် ယူၤစိာ်ကွံာ် အပုၢ်ဒီးလဲၤဃ့ၢ်ဆူ အမိၢ်အပၢ်အအိၣ် ဒီးနဲၣ်စုနဲၣ်ခီၣ်လီၤ. အမိၢ်အပၢ် က့ၤကွၢ်အဖိဆံးဒီး တထံၣ်ဝဲလၢၤဘၣ်. နၢ်ပၢၢ်ဝဲလၢ လံာ်အံၤ ယူၤစိာ် အဖိလၢ အကအီၣ်ဝဲအဂီၢ်, ဒီးအသွံအိၣ်ဝဲလၢ လ့ဖးထီအခိၣ်စိၣ် လၢပှၤလဲၤမၤထူၣ်ဖျဲးအီၤ တသ့ဘၣ်. မၤဝဲသ့ထဲတမံၤဧိၤလၢ အဘါထုကဖၣ် သပှၢ်ပှၢ် လၢအဖိအဂီၢ်လီၤ.
လၢတၢ်လူၢ်တၢ်ကွာ်ဘးခီ တကပၤန့ၣ်, ပှၤနၢ်ဟူ ပှၤဖိသၣ်ဟီၣ်သီၣ်ဝဲ, ဒီးပှၤခးတၢ်ဖိတဂၤ ထံၣ်ဝဲလၢ လံာ်ဖးဒိၣ် ယူၤစိာ်နုာ်ဖိသၣ် အဲနံၣ် လၢအသွံအပူၤလီၤ. အဝဲထီၣ်သ့ၣ် ဖးထီအံၤ ဝံဒီး အကျိလၢ အဖံဘၣ်ခိၣ်လီၤ. ထိၣ်အဖါတဘ့ၣ် ဟဲလီၤစိးအီၤ လၢအနိးလီၤ. အဝဲခးဝဲ အကျိဒီး လီၤတဲာ်သံဝဲ တဘျီဃီ လီၤ. ထိၣ်အမိၢ်တဘ့ၣ် ဟဲလီၤစိးအီၤ, စှီၤအဖံဘၣ်ခိၣ်လၢ အစုမ့ၣ်, ဒီးတံာ်အခိၣ်, အမဲာ်, အကိာ်လၢ အနိးဖးဒိၣ် ဖးထီ, ဒီးပၤအီၤလၢ အဒံးဖးဒိၣ် ခံခီန့ၣ်လီၤ. ကၠိဟဲရှူရၢၣ် ဒုးဆၢအီၤ တညီဘၣ်. မ့ၢ်လၢအစု တခီဘၣ်ဖီၣ်ဃာ်ဝဲ သ့ၣ်အဃိ, ကခွဲးကျိအမဲာ်ခွဲး အဂီၢ်အစုတအိၣ်ကလီဘၣ်. အဝဲဘၣ်ဃၣ်ကပၤကွံာ် အမဲာ်ဒ် သိးအမဲာ်ချံ သုတဘၣ်ဒိတဂ့ၤ လီၤ. ပာ်လီၤအသးနီၢ်ကီၢ် လၢအကမၤပူၤဖျဲး ဖိသၣ်အံၤ လီၤ. အဝဲထိးဃီၤအကျိအခိၣ် လၢလံာ်အသးနါပှၢ်ဒီး သုးဃီၤ အခီၣ်မုၢ်ကျၢၢ် လၢကျိအမဲာ်ခွဲး အဖီခိၣ် ဒီးတုၤအယီၢ်သူဝဲဒီး တဘျီဃီ လံာ်အံၤ လီၤပဲကွံာ် ဝဲဆူ ြတီၤဖးယိာ် အပူၤလီၤ. အဝဲဘၣ်ဒိ ဘၣ်ဆၣ် လဲၤဟံးက့ၤဖိသၣ်ဒီး ဟဲက့ၤစိာ်လီၤအီၤ, ဒီးသ့ၣ်ညါဘၣ်ဝဲလၢ ဖိသၣ်အံၤ တဘၣ်ဒိဘၣ်ထံးဘၣ်. လံာ်အခီၣ်မ့ၣ်တုၢ်ဖျိ အယၣ်ဒီး အတၢ်ကူတၢ်သိး သနာ်က့ တတုၤလီၤလၢ အညၣ်ဘၣ်.
အမိၢ်အပၢ်တဖၣ် သးခုဝဲဒိၣ်ဒိၣ်ကလဲာ် ဖဲအထံၣ်ဘၣ်က့ၤအဖိလၢ ပှၤအဒူတဂၤ အံၤဟဲဆှၢ န့ၢ်က့ၤအီၤ န့ၣ်လီၤ. အဝဲသ့ၣ်စံးဘျုးယွၤဒီး ဟ့ၣ်မၤဘျုးပှၤခးတၢ်ဖိ ကၠိဟဲရှူရၢၣ်ဂ့ၤဂ့ၤ ကလဲာ်လီၤ. ပှၤခးတၢ်ဖိ တဂၤအံၤ အသးအိၣ်အီၤ ဒီးမၤထူၣ်ဖျဲးအီၤလၢ တၢ်သံန့ၣ် မ့ၢ်တၢ်လီၢ်ဖျါထီၣ်ခရံာ် အတၢ်အဲၣ်ပှၤဟီၣ်ခိၣ်ဖိ ထဲတဖှံၣ်တ၀ာ်လီၤ. ပမ့ၢ်သ့ၣ်ညါဆၢက့ၤ ခရံာ်အတၢ်မၤဘျုးပှၤဒီး ပကဆူၣ်ထီၣ်ဘီၣ်ထီၣ် ညီထီၣ် လီၤ. ဖိသၣ်မုၣ်အံၤ အိၣ်မူဘၣ်ဝဲ ၉၂ နံၣ်, ဘၣ်ဆိၣ်ဂ့ၤလၢ အတၢ်အိၣ်မူအပူၤ လၢကျဲအါဘိ ဒီးထံၣ်ဘၣ်အဖိအလံၤ ဒီးအလိၤတဖၣ်လီၤ.
