ကစၢ်ယွၤမ့ၢ် ကစၢ်လၢ အအဲၣ်တၢ်အသီ, မၤတၢ်အသီ, တ့တၢ်အသီ, ဒ်လံာ်လီၣ်ဖျါ ၂၁း၁, ၂ ပာ်ဖျါဝဲ မူခိၣ်အသီ, ဟီၣ်ခိၣ်အသီ, ဝ့ၢ်စီဆှံယရူၤရှလ့ၣ် အသီ အိၣ်ကတဲာ်ကတီၤအသး လီၤ. ပှၤဟီၣ်ခိၣ်ဖိ လၢယွၤတ့လီၤအီၤ တဖၣ်စ့ၢ်ကီး သးလီ တၢ်အသီအသီ တဖၣ်လီၤ. ကူကၤမ့ၢ်လီၢ်လံၤ, ပှ့ၤန့ၢ်အသီ, မ့ၢ်တပှ့ၤဘၣ်ဒီး ဆှုၣ်သီထီၣ်အီၤလၢ ချါသိ, ချါကမူၣ်, ဟံၣ်ဃီ, တၢးဖီ, ခူဧိၤဝ့ၢ်ဧိၤ အလီၢ်လံၤတဖၣ် တၢ်ရူၢ်လီၤဒီး မၤသီထီၣ် က့ၤအီၤ ပှီၢ်ပှီၢ်လီၤ.
၂ ကရံၣ် ၅း၁၇ “မၤသးဒ်န့ၣ်ဒီး ပှၤတဂၤဂၤမ့ၢ်အိၣ်လၢ ခရံာ်အပူၤဒီး မ့ၢ်အမ့ၢ် တၢ်တ့အသီလီၤ.” ဖဲပှၤတဂၤဂ့ၤတဂၤဂ့ၤ, ဘၣ်တၢ်ပာ်ဖှိၣ်ဃုာ်အီၤဒီး ခရံာ်န့ၣ် အဝဲဒၣ် မ့ၢ်ပှၤအသီတဂၤလီၤ.
သီထီၣ်လၢတၢ်စူၢ်တၢ်နာ်
ပဝဲလၢအမ့ၢ် ခရံာ်ဖိမိၢ်လုပၢ်လၢ် ဒ်ပစံးတၢ်အသိး ပမိၢ်ပၢ်, ဖံဖုလၢ ပလီၤစၢၤလၢအီၤတဖၣ် လဲၤဘူၣ်ထူဘါယွၤ လၢသရိာ်ပူၤ လၢဟံၣ်ပူၤဃီပူၤကစုဒု, ဘှ့ၣ်ဘှ့ၣ်ဘှီၣ်ဘှီၣ်, သညူးသပှၢ်, သးဝံၣ်တၢ်ကုၤရုၤကုၤရုၤ, တထုးသူၣ်ထုးသး, မ့ၢ်စူၢ်မံခ့န့ၣ်လီၤ. မ်ပကမၤသီထီၣ်က့ၤ ပတၢ်စူၢ်တၢ်နာ် ဒ်စံး ၁၂၂း၁ “တုၤပှၤစံးဘၣ်ယၤ, မ်ပလဲၤထီၣ်သကိးဆူ ယွၤအဟံၣ်တက့ၢ်န့ၣ်, ယသူၣ်ခုယသးခုလီၤ.” ယတမံခ့ဘၣ်. ယနံၤကမှံထီၣ်, ယနၢ်ဟူယွၤ ကတိၤဒီးယၤ ခီဖျိ တၢ်စံၣ်တဲၤတဲလီၤ, တၢ်သးဝံၣ်, တၢ်ဒ့တၢ်အူ အမုာ်တဖၣ်လီၤ. စံး ၁၀၀း၁ ဒီး ၂ “ကယဲၢ်ဟီၣ်ခိၣ်ဖိခဲလၢာ်သ့ၣ်ဧၢ, ကိးထီၣ်ယွၤလၢ တၢ်သူၣ်ဖှံသးညီ အပူၤန့ၣ်တက့ၢ်. မၤယွၤ အတၢ်ဒီး တၢ်သးခု, ဟဲဆူအအိၣ်ဒီး တၢ်သးဝံၣ်န့ၣ် တက့ၢ်.” မၤသီထီၣ်က့ၤ ပတၢ်နာ်လၢ ယွၤန့ၣ်ဂ့ၤဝဲ, ဒီးအဘျုးအဖှိၣ် အိၣ်ဝဲလီၤထူလီၤယိာ်, ဒီးအတၢ်မ့ၢ်တၢ်တီ အိၣ်ဝဲ အစိၤစိၤ အဃၣ်ဃၣ်န့ၣ်တက့ၢ်.”
သီထီၣ်က့ၤလၢတၢ်ဖံးတၢ်မၤ
ပဆိကမိၣ်ဒၣ်လၢ ပဖံးတၢ်မၤတၢ်တမံၤ လၢ်လၢ်န့ၣ် မ့ၢ်ဒၣ်လၢ ပကအီၣ်ဘၣ်အီဘၣ်, ကူဘၣ်သိးဘၣ်ဒီး အိၣ်ဘၣ် ဆိးဘၣ် သူသူကၠီးကၠီး အဂီၢ်လီၤ. မၤသီထီၣ်က့ၤ ပတၢ်ဖံးတၢ်မၤ, လဲလိာ်က့ၤပသးတက့ၢ်. ပတၢ်မၤခဲလၢာ် မ့ၢ်ယွၤဟ့ၣ်လီၤပှၤ, ပကမၤလၢ တၢ်အဲၣ်ယွၤ, ပကအဲၣ်ပှၤလၢပဃၢၤ မ့ၢ်သ့, တုၤလၢ ပအဲၣ်ပဒုၣ်ပါ န့ၣ်တက့ၢ်. ပမ့ၢ်မၤတၢ်ခဲလၢာ် လၢယွၤအလၤကပီၤ အဂီၢ်ဒီး ယွၤအကစၢ်ဒၣ်ဝဲ ကလူလီၤန့ၢ်က့ၤပှၤ တၢ်ဆိၣ်ဂ့ၤ ဆိၣ်ဝါ တဖၣ်န့ၣ်လီၤ. ကယဲၢ်တၢ်ဖံးတၢ်မၤ လၢနစုထံၣ်န့ၢ်အီၤ န့ၣ် မၤအီၤလၢ နဂံၢ်နဘါ ခဲလၢာ်တက့ၢ်. မၤတၢ်ခဲလၢာ်လၢ ယွၤအလၤကပီၤအဂီၢ် တက့ၢ်.
သီထီၣ်က့ၤလၢသးအတၢ်ဒုးတၢ်ယၤ
မုၢ်မဆါတနံၤအံၤ ပထံၣ်ဘၣ် နၢ်ဟူဘၣ် ခီဖျိ ဘၣ်တၢ်မၤအသး အါမးတဖၣ် လၢကထုးကွံာ်ပှၤဒီး တၢ်နာ်က့ၤယ့ၣ်ရှူးခရံာ် န့ၣ်လီၤ. တၢ်အၢတၢ်သီတဖၣ်အံၤ ပမှံၤပပှၢ်လၢ ပျၢၤကိးန့ၢ်ပှၤ အမံၤလၢ တၢ်ဝံတၢ်နါ, တၢ်ယူာ်တၢ်ပျဲၤ, ကူဧီၢ်နါဒိ, တလိၣ်နါထံ, ပျုၤ, စှၢၤ, ခိၣ်ဩ့ၣ်, ဃးမီၤ, သမံအံ, သမံြပီၢ် ဒီး အဂၤတဖၣ် အါမးန့ၣ်လီၤ. စီၤပီလူးတဲပှမ, အ့းဖ့းစူး ၆း၁၂ တမ့ၢ်ဘၣ် ပကနိဒီး တၢ်သွံၣ်ဒီး တၢ်ဖံးတၢ်ညၣ်ဘၣ်. မ့ၢ်လၢ တၢ်အခိၣ်, တၢ်နါအိၣ်လၢ မူခိၣ်အလီၢ်တဖၣ်လီၤ. ပကဘၣ်ကံၢ်တူာ်ပယီၢ်ဒ့ဒီး တၢ်မ့ၢ်တၢ်တီ, သိးထီၣ် တၢ်တီတၢ်လိၤအသဃိး, ဖျီၣ်ထီၣ်ပခီၣ်လၢ တၢ်သးခုကစီၣ်, ဟံးထီၣ်တၢ်နာ်အကတီၤ, ကုာ်ထီၣ်တၢ်အုၣ်က့ၤခီၣ်က့ၤ အခိၣ်ကုာ်သုး, ဟံးထီၣ်သးအနး လၢအမ့ၢ် ယွၤအကလုၢ်ကထါ, ဘါထုကဖၣ် လၢကယဲၢ်တၢ်ဘါထုကဖၣ် အိၣ်ဒီးတၢ်နာ်ယိာ်ယိာ် တက့ၢ်. ပဝဲခဝ့ရှၢၣ်ဖိလံၤ ပအီၣ်မံအီၣ်မံ တသ့လၢၤဘၣ်. တၢ်သးဝံၣ် စံးဝဲ, ဒုးတၢ်ဆူၣ်ဆူၣ်ခရံာ်ဖိဧၢ, လၢတၢ်ဒုးနးကဆူးန့ၣ်, လဲၤနုာ်ဒုးတၢ်တက့ၢ်. တၢ်ဒုးတဝံၤချ့ချ့ဘၣ်. ပဘၣ်ဝံသးစူၤ, ထံဒုတမၤဃၣ်ထံဆှံ, တၢ်သးဒိၣ်တမၤ ဃၣ်တၢ်သးစူၤဘၣ်. မ်ပကမၤသီထီၣ်က့ၤ ပသး လၢသးအတၢ်ဒုး, တၢ်နာ် အတၢ်ဒုးတမံၤအံၤဒီး မၤနၢၤတၢ်တက့ၢ်.
“ဆီလီၤနသးမ့ၢ်တုၤယွၤ
တၢ်ဘၣ်တၢ်တုၤအိၣ်ဒၣ်နၤ.”
ပှၤကညီဖိအထါအိၣ်တယုၢ်လၢ အဘၣ်ဃးဒီး တၢ်ဂုၤထီၣ်ပသီထီၣ် န့ၣ်လီၤ. မ့ၢ်ထါတဆၢလၢ အလဲလိာ် ဝဲတၢ်ကတိၤ အမဲာ်ဖျၢၣ် သၢကလုာ်အဃိ အိၣ်ဒီး အခီပညီ အဒိၣ်အယိာ် သၢမံၤ စ့ၢ်ကီး န့ၣ်လီၤ. ပှၤလၢအနၢ်ပၢၢ်ထါတဖၣ် ကဖးဒၣ်ဝဲ အခီပညီ ဒ်အတၢ်သ့ၣ်ညါ ထီၣ်ဘးန့ၣ်တက့ၢ်.
ထံဂ့ၤဒၣ်ထံအလီၢ်လံၤ
ဖဲဂ့ၤဒၣ်ဖဲအလီၢ်လံၤ
မ့ၢ်သူနာ်က့ယတစံး
မ့ၢ်ဝါနာ်က့ယတစံး
လံာ်သ့လံာ်သ့အီၤလၢထံ
ဂ့ၤန့ၢ်အသီပၢၢ်လၢခံ
ထံဂ့ၤဒၣ်ထံအလီၢ်လံၤ
ဖဲဂ့ၤဒၣ်ဖဲအလီၢ်လံၤ
မှံၤစူးကွံာ်လၢတူၤနၢၣ်ထံး
ပှၢ်စူးကွံာ်လၢတူၤနၢၣ်ထံး
လံာ်သ့လံာ်သ့အီၤလၢထံ
ဂ့ၤန့ၢ်အသီပၢၢ်လၢခံ
ထံဂ့ၤဒၣ်ထံအလီၢ်လံၤ
ဖဲဂ့ၤဒၣ်ဖဲအလီၢ်လံၤ
မ့ၢ်သူဒီးသူတကျ့ၤတ့
မ့ၢ်ဝါဒီးဝါတကျ့ၤတ့
သူၣ်စံၣ်ြပိာ်ဝါစံၣ်စ့ြပ့
ကတိၤတၢ်ပှၤနာ်တသ့.
သရၣ်ဒိၣ်ဧ့ြစၤ
(ဟံးန့ၢ်အီၤလၢ လဲၤဆူညါ ကြတူၢ် ၆၂, နီၣ်ဂံၢ် ၁ အပူၤန့ၣ်လီၤ.)
