ဟိၤရှ့ ဂး၇ , မ့ၢ်အဖှံကလံၤဒီး ကကူးကလံၤသဝံးလီၤ.
ဝံဟိၤရှ့ဒုးပလီၢ်ဒီး ကတိၤဆိဝဲလၢ ပှၤအံၣ်စရ့လးဖိတဖၣ် မ့ၢ်လၢ အဘါထဲ ပှၤကလုာ်ဂၤ အတၢ်ဂီၤ တၢ်ဖီၣ်အဃိ အဝဲသ့ၣ်ကဘၣ် တၢ်မၤနၢၤမၤဃၣ် အီၤလၢ ပှၤကလုာ်တဖုလၢ အမ့ၢ်ပှၤအံၣ်စရ့လးဖိ အဒုၣ်အဒါ န့ၣ်လီၤ. မ့ၢ်လၢ အမၤတၢ်ဒဲးဘးအံၤ အဃိ, မ့ၢ်ဝဲ အသူၣ်လီၤတ့ၢ်လံ ကလံၤဒီး ကကူးဘၣ်ဝဲ ကလံၤသဝံး လီၤ. ပှၤကညီ ကကူးဘၣ်က့ၤ တၢ်ချံလၢ အဖှံဝဲန့ၣ်လီၤ.
ယွၤတ့လီၤ တၢ်န့ၣ် မ့ၢ်တၢ်အဒိတဖၣ် လၢပကဘၣ်ထိၣ်သြတီၤ အီၤအဂီၢ်လီၤ. တၢ်ဖှံတၢ်ဒီးကူးတၢ် လၢအဘၣ်ဃးနီၢ်သး တကပၤန့ၣ်, ပသ့ၣ်ညါဟိဟိပျီပျီ လၢပမ့ၢ်မၤတၢ်လၢ အတဂ့ၤဘၣ်ဒီး ကပဘၣ်ကူးက့ၤ တၢ်လၢ အတဂ့ၤ ဘၣ်လီၤ. ပမၤတၢ်ဒဲးဘး ဒီး တၢ်စံၣ်ညီၣ် အိၣ်ဝဲဒီး မ့ၢ်ဝဲတၢ်သံန့ၣ်လီၤ.
စီၤကၤယံၣ် မၤသံစီၤဟ့းဘ့းလး ဒီးယွၤစံၣ်ညီၣ်အီၤ လၢအကကဲထီၣ် ပှၤလဲၤဝ့ၤလဲၤဝီၤတၢ်ဒီး ပှၤဃ့ၢ်တၢ်လၢ ဟီၣ်ခိၣ်ချၢလီၤ. အစိၤအဃၣ်ခဲအံၤ တၢ်အၢတၢ်သီ, တၢ်ဒဲးဘး အါထီၣ်ဝဲ ဒိၣ်ဒိၣ်ကလဲာ် တုၤဒၣ်လဲာ် တၢ်ထီဒုၣ်ထီဒါ, တၢ်ဂၢ်သွံၣ် ဂၢ်စီၤဒီး တၢ်ဒုးတၢ်ယၤ အိၣ်ဝဲလၢ ကီၢ်ကိးဘ့ၣ်ဒဲး န့ၣ်လီၤ. တၢ်ကလုာ်ကလိၤ, တၢ်မၤတရီတပါဖိသၣ်, တၢ်ဟ့ၣ်လီၤကွံာ် နီၢ်ခိဒ် ဃဲသဲမုၣ်အသိး, ဒီမါ၀ၤ အဲၣ်ဘၢလိာ်သး, ဒီမါ၀ၤ ပာ်မၢ်လိာ်ကွံာ်အသး, တၢ်ဟုၣ်န့ၢ်ဖိသၣ်ဒီး မၢကုၢ်အီၤလၢ အတၢ်ဘၣ်ဘျုး ဒၣ်ဝဲအဂီၢ်, တၢ်ဟုၣ်တၢ်ဘျၣ်, တမျိးတမျာ်, ဒီးတၢ်အၢတၢ်သီဒိၣ်မး လၢအအိၣ်ထီၣ်လၢ စိၤခဲအံၤ မ့ၢ်ဝဲ တၢ်မၤပျံၤ မၤဖုးပှၤဂၤ လၢတၢ်မၤသံ အကလုာ်ကလုာ် ခီဖျိ တၢ်မၤပိၢ်ဖးမ့ၣ်ပိၢ်, တၢ်ပျၢ်လီၤ ကလံၤအၢလၢ ပှၤနၢဘၣ်ဒီး ပှၤသံဝဲ, တၢ်ဖီၣ်န့ၢ်ဆူၣ် ပှၤဂၤဒီး ဃ့စ့ အီၣ်လီး အါအါဂီၢ်ဂီၢ် ဒီးအဂၤတဖၣ်လီၤ. တၢ်မၤပျံၤ မၤဖုးပှၤဂၤဒ်အံၤ, ကိၤလၤကိးဝဲ လၢ (terrorism) လီၤ.
မ့ၢ်လၢ တၢ်အၢတၢ်သီအါထီၣ် ဒ်အံၤအဃိ, ပိာ်မုၣ်ဒီး ပိာ်ခွါလၢအဖှံတဖၣ် ဒုးအိၣ်အါထီၣ် အစၢၤအသွဲၣ်, အဖိတဖၣ် လၢအဖှံဝဲ စ့ၢ်ကီးဒီး ကဲထီၣ်ပှၤလၢ အခိၣ် နူာ်တပှဲၤဘၣ်, ပှၤအီပီဖိဒီး ဘၣ်တၢ်ပာ်အီၤလၢ ပှၤအသးတဘၣ် အတၢ်ဆါဟံၣ်လီၤ. ဖှံလီၤတၢ်ချံ လၢအဂ့ၤတက့ၢ်. နကကူးဘၣ်တၢ်ဂ့ၤ အသၣ်လီၤ.
