ကတိၤဒိ ၁၀း၅, ပှၤလၢအထၢဖှိၣ်တၢ်လၢ တၢ်ကိၢ်အကတီၢ်န့ၣ် မ့ၢ်ဖိခွါလၢ အကူၣ်တၢ်သ့လီၤ. မ့မ့ၢ် ပှၤလၢအမံလၢ ကူးဘုအကတီၢ်န့ၣ် မ့ၢ်ဖိခွါလၢ အဒုးမဲာ်ဆှး တၢ်လီၤ.
ကွၢ် ဆိကမိၣ် သူတၢ်ဆၢကတီၢ် အဂ့ၤအလၢအပှဲၤလၢ ခါဆူညါ အတၢ်ဘၣ်ဘျုးတဖၣ် အဂီၢ်တက့ၢ်. ပှၤလၢ အတၢ်ကူၣ်တၢ်ဆး ဂ့ၤတဖၣ် တနါစိၤ သူတၢ်လၢ အအိၣ်ဒီး အဝဲသ့ၣ် ကလီကလီဘၣ်. မ့မ့ၢ် ကၢၤဃာ် တၢ်အီၣ်တၢ်အီ, ကျိၣ်ဖိစ့ဖိဒီး တၢ်စုလီၢ်ခီၣ်ခိၣ်လၢ တၢ်ဆၢကတီၢ် လၢအကဟဲဝဲ အဂီၢ်လီၤ.
ဖိသၣ်တနီၤ မ့ၢ်န့ၢ်ဘၣ် စ့ဒီး ပှ့ၤအီၣ်ကိၣ်, ပှ့ၤအိပှ့ၤအီၣ် တၢ်ဝံၣ်တၢ်ဆၢ တၢ်ဘဲတဖၣ်လီၤ. မ့မ့ၢ်ဖိသၣ် တနီၤ ပာ်ကီၤဃာ်ဝဲဒီး လီၢ်ခံ အစ့အိၣ်ဝဲလၢ အကပှ့ၤစက့း, လ့ၣ်ယီၢ်ခီၣ်ဒီး အဂၤတဖၣ်လၢ အလိၣ်ဘၣ်ဝဲ န့ၣ်လီၤ. လံာ်စီဆှံ တဲဘၣ်ပှၤလၢ ပကဘၣ်လဲၤဆူ တၢၢ်တဖၣ်အအိၣ် ဒီးမၤလိန့ၢ် တၢ်လၢအအိၣ်န့ၣ်လီၤ. အဝဲသ့ၣ် ပာ်ဖှိၣ်တၢ်ညၣ်, တၢ်အီၣ်တၢ်အီလၢ တၢ်ကိၢ်ခါလီၤ. အဝဲသ့ၣ်ထၢဖှိၣ် တၢ်အီၣ်လၢ ကူးဘုအကတီၢ် န့ၣ်လီၤ.
ကွၢ်စ့ၢ်ကီး အဒိလၢ ထိၣ်တလ့တဖၣ် တက့ၢ်. အဝဲသ့ၣ် ဖျးအကိလၢ သ့ၣ်ကပၤ သ့မးဒီး ဖျးတရဲၣ်ဝဲ ချ့မးဒီး တုၤအကိဝံၤလံ, ပာ်ဖှိၣ်ပာ်တံၤ တၢ်အီၣ်တဖၣ် လီၤဆီဒၣ်တၢ် သ့ၣ်သၣ်လၢ အကအီၣ်ဝဲ လၢတၢ်ဆၢကတီၢ် လၢအကဟဲဝဲ အဂီၢ်န့ၣ်လီၤ. ဆၣ်ဖိကီၢ်ဖိလၢ အခူၣ်အပူၤလၢ ဟီၣ်ခိၣ် လာ်လၢ အကမံဝဲ အိၣ်ဝဲအဂီၢ်တဖၣ် ထၢဖှိၣ်ဝဲတၢ်အီၣ် ဆူအအိၣ်ဝဲဆိးဝဲ အလီၢ်န့ၣ်လီၤ. ပမ့ၢ်လဲၤကွၢ် သူၣ်ဖိဘါဖိ, ဝံၤဖိခီဖိ, ယုၢ်အကလုာ်ကလုာ်, ဖျံဒီး ပဒဲတဖၣ် အပူၤန့ၣ်, ပကထံၣ်ဘၣ် တၢ်အကလုာ်ကလုာ် လၢအပာ်ဖှိၣ်ဝဲလၢ အကအီၣ်ဝဲ လၢ တၢ်ဂိၢ်, တၢ်စူၤအကတီၢ် န့ၣ်လီၤ. လၢတၢ်အံၤအဂီၢ် ဆၣ်ဖိကီၢ်ဖိ နီၣ်သူၣ်နီၣ်သး, ဒီးထၢဖှိၣ် ၀ာ်ဖှိၣ် တၢ်ဂ့ၤန့ၢ် ပှၤကညီန့ၣ်လီၤ.
အဒိအဂ့ၤကတၢၢ်မ့ၢ်ဝဲ, ခရံာ်အတၢ်ကတိၤဒိ ဘၣ်ဃးမုၣ်ကနီၤ ဆံဆဲၣ်ဂၤန့ၣ် လီၤ. ယဲၢ်ဂၤအိၣ်ဒီး တၢ်ကူၣ်တၢ်ဆး လၢအဂ့ၤ, ဒီးစိာ် ပလီၢ်သိလၢ အမ့ၣ်အူဒၢ အဂီၢ်န့ၣ်လီၤ. အဝဲသ့ၣ်ခိးတလးမူး ပိာ်ခွါ အခိၣ်ခဲလၢာ်လီၤ. တလးမူးပိာ်ခွါ ဘၣ်တံာ်တာ် လၢတၢ်တမံၤမံၤအဃိ ဒီးဟဲတုၤဖဲ မုၣ်ကနီၤ ဆံဆဲၣ်ဂၤအိၣ်ခိး တၢ်အလီၢ်န့ၣ် စဲၤခံဝဲလီၤ. ပိာ်မုၣ် လၢအတစိာ်ပလီၢ် အသိတဖၣ်န့ၣ်, အမ့ၣ်အူဒၢ ကဲၤတဂ့ၤလၢၤဘၣ်. ဃ့သိလၢ အသကိး ယဲၢ်ဂၤအအိၣ်, ဘၣ်ဆၣ် ဃ့ဝဲတန့ၢ်ဘၣ်. ပိာ်မုၣ်လၢ အသးဆး ယဲၢ်ဂၤ လဲၤဘၣ်ဝဲဆူ တၢ်တ့တၢ်ဖျီ အမူး လၢတၢ်သူၣ်ခုသးခု အပူၤလီၤ. ပိာ်မုၣ်ယဲၢ်ဂၤလၢ အသိတလၢဘၣ် န့ၣ် လဲၤဝဲလၢ ပှၤသကိး တသ့ဘၣ်. မ့ၢ်လၢ အမ့ၣ်အူဒၢ တကဲၤလၢၤဘၣ် အဃိလီၤ. တၢ်သိၣ်ထူ လၢပဂီၢ်မ့ၢ်ဝဲ, လၢပကပလီၢ် ပာ်ဖှိၣ် ပာ်တံၤတၢ်လၢ အလိၣ်တဖၣ် လၢတၢ်ဆၢကတီၢ်လၢ အကဟဲဝဲ အဂီၢ်န့ၣ်လီၤ.
