ဖံထၢၣ်ဒူၣ်ဖိထၢဖိ အိၣ်လၢ ဟံၣ်ဖးဒိၣ် တဖျၢၣ်လၢ ဝ့ၢ်အချၢန့ၣ်လီၤ. မံးစ်ထၢၣ် ဖံထၢၣ် ထီၣ်တၢ်မၤလၢ ကါဖးဒိၣ်တဆိ ကိးမုၢ်နံၤ ဒဲးဒီး မၤစ့န့ၢ်ဂ့ၤမးလီၤ.
ဖံထၢၣ်ဒီမိ၀ၤ ခံ၈ၤ အိၣ်ဒီးဖိခံဂၤ, အပိာ်ခွါဖိအမံၤ လၢဘီးဘ် (Bob) အိၣ်အနံၣ်တဆံ, အပိာ်မုၣ်အမံၤ မ့ (May) အိၣ်ခွံနံၣ် န့ၣ်လီၤ.
ဘူးထီၣ်ခရံာ်အိၣ်ဖျဲၣ်ကဘၣ်လံ. ဒ်ဒူၣ်ဖိထၢဖိ အဂၤတဖၣ်အသိး, အဝဲသ့ၣ်ကတဲာ် ကတီၤထီၣ်အဟံၣ် ဃံဃံလၤလၤ ဒ်ပှၤညီနုၢ်မၤ လၢခရံာ်အိၣ်ဖျဲၣ် အဆၢကတီၢ် န့ၣ်လီၤ.
ဒ်ဖိသၣ်အလုၢ်အလၢ် အသိး ဘီဘ် ဒီး မ့ ဃ့ၢ်တထီ တလီၤဒီး ကိးထီၣ်ဝဲ မ့ၢ်ခရံာ်အိၣ်ဖျဲၣ် ပကမၤန့ၢ် မနုၤလဲၣ် န့ၣ်လီၤ. ဘီးဘ်စ့း, “မ့ၢ်ယကန့ၢ်ဘၣ် ကီးလ့ၣ်မ့ၣ်အူဖိ တဆိလၢ ယအဲၣ်ဒိး ဃဲးဃဲး လံန့ၣ်ဧါ.” မ့ တခီစံး, “မ့ၢ်ယကန့ၢ် ဘၣ်ကီး တၢ်ဂီၤဖိဖးဒိၣ်လၢ အဟီၣ်သ့တဒု န့ၣ်ကီးဧါ.” အဝဲသ့ၣ် ထဲအဃ့ၢ်တထီဃ့ၢ်တလီၤ ကိးပသူပသီ စၢၢ်စၢၢ် အပၢ်စံးဘၣ်အဝဲသ့ၣ်, “သုမ့ၢ်တထူၣ်ထဲန့ၣ်ညါ သုတန့ၢ်ဘၣ် တၢ်ဟ့ၣ်လၢ ခရံာ်အိၣ်ဖျဲၣ် နီတမံၤဘၣ်.” ဝံၤဒီး မ့ၢ်လၢ တၢ်ဆၢကတီၢ် ဘၣ်လၢ ဖိသၣ်တရၢကမံအဃိ အဝဲမၢအပှၤကွၢ် ဖိသၣ် က့ၤဒုးမံ ဖိသၣ်တဖၣ် န့ၣ်လီၤ.
ဖဲန့ၣ်အခါ ထဲလံဖိ သီၣ်ထီၣ်ဒီး မံးစံးစ် ဖံထၢၣ် လဲၤဃ့ၢ်ကနၣ်လီၤ. ကယံာ်ယဲၢ်မံးနံး ဝံၤ ဟဲက့ၤဒီး အမဲာ်သၣါဖျါလီၤဂာ် သါကဟီၣ်လီၤ. အ၀ၤသံကွၢ်အီၤ လၢမတၤကတိၤလီၤ တၢ်ဒီး တဲတၢ်မနုၤလဲၣ် န့ၣ်လီၤ.
“အိ, မ့ၢ်ဒၣ် ပှၤကွၢ်ထွဲ ပှၤဘၣ်ကီဘၣ်ခဲ အခိၣ်တဂၤ ကတိၤတၢ်လီၤ. ယတဲဘၣ်နၤ တဘျီလၢ ပှၤဘၣ်ကီဘၣ်ခဲ တရၢ အိၣ်တၢ်လီၢ် ကတံာ်ကဲၣ်ဆိး တၢ်လီၢ်တြတီၢ် လၢၤလၢ အဝဲသ့ၣ်အဂီၢ် ဘၣ်န့ၣ်လီၤ. ဒီးပဝဲကိး ဂၤတၢ်မၢ ပဆဲးလီၤပမံၤလၢ ပကတူၢ်လိာ် ပှၤဘၣ်ကီဘၣ်ခဲဖဲ တၢ်လိၣ်ဘၣ်ပှၤတဘျီလၢ်လၢ် န့ၣ်လီၤ. ပတဆိကမိၣ် ကီးလၢ တၢ်ကအၢထဲအံၤညါဘၣ်. ခဲအံၤမၢဝဲ ပတူၢ်လိာ်ပှၤဒီမိ၀ၤခံဂၤ လီၤ.”
ဖံထၢၣ်အမဲာ်လီၤ သပှၢ်ဒီးစံး, “တတဲပာ်စၢၤပှၤ တၢ်နီတမံၤဘၣ် ဒီး ကမၢပတူၢ်လိာ်ပှၤ သတူၢ်ကလာ် ဒ်အံၤန့ၣ်, မၤပှၤတတီဝဲဘၣ်. မ့ၢ်နတတဲအီၤ တၢ်နီတမံၤဘၣ်ဧါ.”
“ယတဲအီၤဒီး အဝဲစံးဆၢဒၣ်ယၤလၢ သါသးအုးဒိၣ်မး လီၤ. စံးဝဲ ပှၤကိးဂၤဒဲးဘၣ်တူၢ်လိာ် ပှၤဘၣ်ကီ ဘၣ်ခဲ လၢအဟံၣ်ပူၤ န့ၣ်လီၤ. အဝဲစံး လၢတၢ်အံၤ မ့ၢ်တၢ်လၢ ပှၤဘၣ်မၤ, ပှၤတမၤ ပှၤအိၣ်တသ့ဘၣ် န့ၣ်လီၤ.”
“အဝဲသ့ၣ် မၤပှၤဒ်န့ၣ် တသ့ဘၣ်.” ဖံထၢၣ်စံးလၢ တၢ်သးဒိၣ် အပူၤ. “ယကလဲၤ ကတိၤတၢ်ဒီး ပှၤခိၣ်ပှၤနၢ် ဒီးပှၤလၢ အမၤတၢ်ဒ်အံၤ တဂၤ ယကမၤတုၤ တၢ်ဒုးဟးထီၣ်ကွံာ် အီၤလၢ အတၢ်မၤန့ၣ်လီၤ. ယကလဲၤလၢ ယနီၢ်ကစၢ် န့ၣ်လီၤ.”
“အိ, အဘျုးအိၣ်မနုၤလဲၣ်. တဘၣ်ပျဲ ပသးဒိၣ် ကလီကလီတဂ့ၤ, ခဲအံၤ မ့ၢ်ခရံာ်အိၣ်ဖျဲၣ် အဟါဒီး ပှၤအါတက့ၢ် ဟးဒီး နမ့ၢ်လဲၤနာ်သက့ တမ့ၢ် နကထံၣ်ပှၤဘၣ်. အမဲာ်ညါ ခဲအံၤန့ၣ် ပှၤလၢပဘၣ်တူၢ်လိာ် တဖၣ် ဟဲလံလၢကျဲန့ၣ်လီၤ. ဒီးပကးတံာ် ပဟံၣ်တသ့ဘၣ်. ယဆိကမိၣ် ယြကၢးတဲဘၣ်ပာ်စၢၤ တၢ်ခ့တၢ်ပှၤ တဖၣ် န့ၣ်လီၤ.”
“မ့ၢ်ပကလဲၤဒုးအိၣ်အဝဲသ့ၣ် ဖဲလဲၣ်” ဖံထၢၣ်စံး “ပဒၢးတရၢဒု ပတံၤသကိး ြဘီဒီး အပှၤဟံၣ်ဖိ, မ့ၢ်ဟဲခဲမဆ့ၣ် န့ၣ်ကပှဲၤလၢာ်လီၤ.”
“တၢ်အဝဲန့ၣ် မၤစၢၤပှၤဖးဒိၣ်လီၤ. ပစံးလၢ ပဟံၣ်ပှဲၤ န့ၣ်တမ့ၢ် ပလီတၢ်ဘၣ်. ဘၣ်ဆၣ် ပှၤဘၣ်ကီဘၣ်ခဲ တရၢ ပဒုးအိၣ်အီၤ လၢဒၢးလၢ ပပာ်ကါ အလီၢ်အဖီခိၣ် တဖျၢၣ်အပူၤ သ့ကစီဒီ လီၤ. ဒၢးန့ၣ် ပှၤမၤကဆှဲ ကဆှီဝံၤကီးလံ. ပအိၣ်ဒီး ကတဲာ် ဒီးဖၣ်ကပူၤ လီၢ်ဖဲန့ၣ်လီၤ.”
ဖံထၢၣ် နံၤကမှံထီၣ်ဒီးစံး, “နကျဲၤပာ်စၢၤ တၢ်ဝံၤတခီလံမီၣ်, နၤအံၤနသ့ကတၢၢ်လီၤ. တၢ်မ့ၢ်တဘၣ်တံာ်တာ် ပှၤနီတမံၤဒီး ဆိကီးလီၤ. တပူၤဂ့ၤတပူၤဂ့ၤ, ပတပျဲ တၢ်အံၤမၤဟးဂီၤ ပတၢ်သးဖှံန့ၣ်ဘၣ်.”
ဘီးဘ် ဒီး မ့ ခံဂၤ ဂ့ၢ်လိာ်အသး တဂၤစံး အတဂၤန့ၢ်ဘၣ် တၢ်အါ စၢၢ်စၢၢ် အပၢ်အသး အ့န့ထီၣ်ဒီး ကိး အနၢးစ် ဒ်သိး ကက့ၤဒုးမံ အဝဲသ့ၣ်န့ၣ်လီၤ. ဖဲဖံထၢၣ် သါကလဲၤ လီၤဆူ တၢ်ဖီ လာ်န့ၣ် ဘၣ်သဂၢၢ်ဒီး အမါလၢ ကျဲ, ဒီးအမါတဲအီၤလၢ ပှၤဘၣ်ကီဘၣ်ခဲ တရၢဟဲတုၤလံ န့ၣ်လီၤ. ဒီးအမါ မၤအမဲာ် ဒ်ပှၤသး ဟးဂီၤ လၢပှၤတရၢအံၤ တမ့ၢ် အပှၤကလုာ်ဘၣ် မ့ၢ် ပှၤယူဒၤဖိ အဃိန့ၣ်လီၤ.
ဖံထၢၣ်စ့ၢ်ကီး အသးဟးဂီၤလီၤ. မ့ၢ်သ့ တၢ်တမိၣ်ထံၣ် အသး ပှၤတရၢအံၤဘၣ်. ဘၣ်ဆၣ် ဒ်ဟံၣ်ကစၢ် တဂၤအသိး ဘၣ်လဲၤထံၣ်အဝဲသ့ၣ် ဒီးတူၢ်လိာ် ခီၣ်ဆၢ အဝဲသ့ၣ်န့ၣ်လီၤ. အဝဲ ကျဲးစၢး ပာ်မုာ်အမဲာ် သၣ်ဒီး လဲၤထီၣ်ဆူ ဒၢးဖိလၢ အပာ် အဝဲသ့ၣ်န့ၣ်လီၤ. ဖဲအထံၣ်ဘၣ် အဝဲသ့ၣ် န့ၣ် သံကွၢ်သံဒိးအဝဲသ့ၣ် လၢအအိၣ်ဘၣ် ဂ့ၤဂ့ၤ စ့ၢ်ကီးဧါ န့ၣ်လီၤ.
ဒၢးတဖျၢၣ် ခံးတစဲး မ့ၢ်လၢ မ့ၣ်အူ ဒၢလၢ အအိၣ်ထဲတဖျၢၣ် ဧိၤအံၤန့ၣ် တၢ်တထွါကဆှီဘၣ် ဒီးအမဲာ်ညါ အိၣ်ကဒီးလၢ ဒၢးအသနၢၣ် န့ၣ်လီၤ.
ပှၤတမှံၤခံဂၤအံၤ တကတိၤ တၢ်ဘၣ် အိၣ်ဘှ့ၣ်မးတတီၤညါ န့ၣ်လီၤ. အပိာ်မုၣ်တဂၤ ဆ့ၣ်နီၤလၢ စပွဲကပၤဒီး ထုးထီၣ်တၢ် အီၣ်တၢ်အီ လၢအဟဲစိာ်ဝဲလၢ တီၣ်ပူၤ န့ၣ်လီၤ.
တစိၢ်ဖိ အပိာ်ခွါတဂၤစံး, “ပစံးဘျုးသုဒိၣ်မးလီၤ. တၢ်လီၢ်အဂၤ ပှဲၤခဲလၢာ်, မတၤမး တူၢ်လိာ်ပှၤတသ့ ဘၣ်. သုမၤဂ့ၤ ဘၣ်ပှၤဒိၣ်မးလီၤ.”
“အိ, ပမၤစၢၤသု မ့ၢ်ဒၣ်တၢ်တစဲးဖိလီၤ. မ့ၢ်တၢ်ဂ့ၤတမံၤလၢ ဒၢးတဖျၢၣ်အံၤ အိၣ်ကလီန့ၣ်လီၤ. ဒီးမ့ၢ် သုလိၣ်ဘၣ် ဒံး တၢ်အဂၤတမံၤမံၤဧါ. သုမ့ၢ်လိာ်ဘၣ် ယၣ်မ့ၢ်ဂ့ၤ, တၢ်အီၣ်တၢ်အီမ့ၢ်ဂ့ၤ လဲၤတဲဘၣ် တၢ်ခ့တၢ်ပှၤ တရၢတက့ၢ်. ယကက့ၤပာ်စၢၤလီၤ.”
“နၤမုာ်မုာ်” အဝဲသ့ၣ် ဒီမိ၀ၤ ခံဂၤ စံးသကိး ဃူဃူဒီး အပိာ်မုၣ်တဂၤ စံးအါထီၣ်, “ခရံာ်အိၣ်ဖျဲၣ် တၢ်သးဖှံ ဘၣ်နၤအါအါတက့ၢ်.”
“တၢ်ဘျုးဒိၣ်မးလီၤ.” ဖံထၢၣ်စံးဆၢဝံၤ ဟးထီၣ်ကွံာ်လၢ ဒၢးပူၤန့ၣ်လီၤ.
တၢ်အီၣ်အဆၢကတီၢ် ဘၣ်ဒီး ဖံထၢၣ် ဟဲက့ၤဆူဟံၣ်န့ၣ်လီၤ. ဖံထၢၣ်စံးဘၣ် အမါ, “တၢ်လီၤနံၤ ယသးဒိၣ်မး, ပိာ်မုၣ်တဂၤန့ၣ် ဆၢဂ့ၤယၤလၢ ခရံာ်အိၣ်ဖျဲၣ် တၢ်ဆၢဂ့ၤလီၤ. ယတသ့ၣ်ညါ နီတဘျီလၢ ပှၤယူဒၤဖိ ပာ်ကဲစ့ၢ်ကီး ခရံာ်အိၣ်ဖျဲၣ် န့ၣ်ဘၣ်.”
အမါစံး, “နတၢ်န့ၣ် ယဆိကမိၣ် တနၢ်ပၢၢ်ဝဲ အခီပညီဒါခီဘၣ်. ကစံးဝံၤဒၣ် တၢ်မံၤလီၤ.”
မုၢ်နၤယိာ်ထီၣ်လံ ဒီး ဖံထၢၣ် ဒူၣ်ဖိထၢဖိ အမ့ၣ်အူလီၤပံာ် ကွံာ်လၢာ်လံ. ဆၣ်တဖၣ် ကပီၤဂ့ၤမး လၢမူကပိာ်လိၤ န့ၣ်လီၤ. လၢမီထိၣ်ကါအလီၢ်ဖီခိၣ် ဒၢးတဖျၢၣ်အပူၤ မ့ၣ်အူတဖျၢၣ် ကပီၤဝဲန့ၣ်လီၤ.
“ကွၢ်လၢအံၤတဘီ, ယမၤန့ၢ်ကဘီယူၤဖိတဘ့ၣ် ဒီးစဲး အသီလၢ ယလ့ၣ်မ့ၣ်အူဖိ တဆိအဂီၢ်လီၤ. ကွၢ်တဘီ, လီၤဂာ်ထဲကဘီယူၤ နီၢ်ကီၢ်လီၤ.” ဘီးဘ် စံးဘၣ် အပုၢ် မ့.
“ယဲမ့ၢ် ယန့ၢ်ဘၣ် တၢ်လၢ ဒဲဒံၣ်အအိၣ် ခံမံၤဧါ.” မ့ ကတိၤထီၣ်ဝဲ ဖဲ အစုတခီလူၤဃုကမူၣ်ခွဲးခွး တၢ် လၢစးခိ တဖၣ်အကျါဒီး ပာ်ကွံာ် အတၢ်ဂီၤဖးဒိၣ် လၢအဒိးန့ၢ်ဝဲ သီသီ ဒီး အိးထီၣ်ကွၢ်ဝဲဝံၤဒၣ် ခဲအံၤန့ၣ်, အဝဲဃု တၢ်အဂၤတဘၣ် အသးအ့န့ ဒီး ကိးဃါအနၢးစ် တဂၤန့ၣ်ဒီးစံး, “ယတၢ်ဟ့ၣ်အဂၤတခါ အိၣ်ဖဲလဲၣ်.”
“ယသးခုဒိၣ်မး, နအဲၣ်ဒိးန့ၢ် တၢ်အါန့ၣ် ပှၤ၈ၤအဃိ နကၢကီၣ်ဒၣ် ဒ်န့ၣ်လီၤ. ကွၢ်လၢအံၤ နထံၣ် ယကဘီ ယူၤဧါ.” ဘီးဘ် စံး.
“နကဘီယူၤနါစိၤန့ၣ် ယကမၤကၢ်ကွံာ် နတၢ်လီၤ.” မ့ တဲဆၢဝံၤ ဟီၣ်ဖးဒိၣ်န့ၣ်လီၤ.
“ခရံာ်အိၣ်ဖျဲၣ် အဆၢကတီၢ် သုတဘၣ်အ့ၣ်လိာ်သုသး ဘၣ်.” နၢးစ်တဲအဝဲသ့ၣ် ဝံၤထုးထီၣ် ဝဲစးခိ အဘူဖိ တဖျၢၣ် လၢ စးခိလၢ တၢ်စူးကွံာ် တရၢအကျါဒီး နဲၣ်ပၠး ဝဲ မ့ဒီး စံး, “ကွၢ်လၢအံၤ, တၢ်အံၤမနုၤလဲၣ်.”
မ့ဟံးဃီၤစးခိ ဘူဖိ ဒီး အိးထီၣ်ဝဲဝံၤ ထုးထီၣ်ဖဲတဘိလၢ အကြတ့ၣ်ကြတိၣ်ဒီး လံာ်ထီၣ်ဝဲလၢ အကိာ်ဒီး စံးဝဲ, “ကွၢ်ယၤတဘီ, ယတလီၤဂာ် စီၤပၤအဖိမုၣ် ဘၣ်ဧါ.”
ဘီးဘ် ကွၢ်တကျ့ၣ်ဃီၤတဘျးဝံၤစံးဝဲ, “နတၢ်န့ၣ် တဒိၣ်ထဲသိး ယကဘီယူၤဘၣ်.”
လၢဟံၣ်ဖီလာ်တတီၤ ဖံထၢၣ်ဒီး အမါအိ သကိး လာ်ဖးထံ လီၤ. အဝဲသ့ၣ် တအိးထီၣ်ဒံး အတၢ်ဟ့ၣ်ဘၣ်. ဘၣ်ဒိကနၣ်ဒံး အပျဲၢ်မုၣ် အဲနၣ် တဲဘၣ်အီၤ တၢ်ဂ့ၢ်တၢ်ကျိၤ လၢအလီၤကမၢကမၣ် ဘၣ်အဝဲသ့ၣ် န့ၣ်လီၤ.
“နတဲတၢ်တခါဒု တလီၤနာ်ယၤနီတစဲး ဘၣ်.” ဖံထၢၣ်စံး, “ယဲယနာ်လီၤ. ပှၤတကလုာ် န့ၣ်အဂံၢ်အါဆူၣ် လီၤဆီစဲဃဲၤလီၤ.” ဖံထၢၣ် အမါစံး.
“မ့ၢ်ပှၤခိၣ်ပှၤနၢ် လၢအကွၢ်ထွဲ ပှၤဘၣ်ကီဘၣ်ခဲ တဖၣ် တသ့ၣ်ညါ တၢ်အံၤဧါ.” ဖံထၢၣ်သံကွၢ်.
“ယဆိကမိၣ်တသ့ၣ်ညါ ဝဲဘၣ်အဃိလီၤ. အဝဲသ့ၣ် မၤတၢ်အိၣ်ဒီး တၢ်ပလီၢ်ပဒီ အသးအါမး ဒ်သိး တၢ်ဒ်န့ၣ် အသိးသုတမၤ အသးတဂ့ၤန့ၣ်လီၤ. ဘၣ်ဆၣ် ခဲအံၤဒု ပပာ်အဝဲသ့ၣ် ဖဲအံၤ တသ့လၢၤဘၣ်. ပှၤလၢ အကအံးက့ၤကွၢ်က့ၤ ပိာ်မုၣ်န့ၣ် တအိၣ်နီတဂၤဘၣ်.” မံးစံးစ် ဖံထၢၣ်စံး.
“ပကဘၣ်မၤလိာ် တၢ်ဆါဟံၣ်အကါလၢ ကဟဲဟံးန့ၢ်အီၤ ဒီးက့ၤဆှၢအီၤဆူ တၢ်ဆါဟံၣ် န့ၣ်လီၤ. ပိာ်မုၣ် န့ၣ် မဟါယကွၢ် လီၤဘီလီၤဝါ စဲဃဲၤလီၤ. အဝဲတူၢ် တၢ်ဆါ သ့ထဲအံၤ ညါန့ၣ် အဂံၢ်အဘါ ကဂ့ၤဖးဒိၣ်လီၤ.” ဖံထၢၣ်စံး.
“အိ, ပှၤကလုာ်အဝဲန့ၣ်န့ၣ်, အိၣ်ဖျဲၣ်အဖိ ညီမးလီၤ.” အဝဲသ့ၣ် မးတသ့ၣ်ညါ အဟၢဖၢဆါဘၣ်. ယသးခု ဒိၣ်မးလၢ ပလဲၤပာ်ဘၣ်အီၤလၢ ကါလီၢ်အဖီခိၣ် န့ၣ်လီၤ. အဝဲသ့ၣ် မၤဟးဂီၤ တၢ်ဖဲန့ၣ် တသ့ကဲၣ်ဆိးဘၣ်. ဒီးအဲနၣ်ဧၢ,” အဝဲကိးထီၣ်ဖဲ အပျဲၢ်မုၣ် န့ၣ်ဟးထီၣ်လၢဒၢးပူၤဒီးစံး, “တဲဘၣ် နၢးစ် လၢအသု တပျဲဖိသၣ် လဲၤဘူးဖဲန့ၣ် တုၤလီၤလၢ ကါဟဲတုၤ တစုန့ၣ်တဂ့ၤ.”
ဝံၤဒီး အဝဲသ့ၣ် ဒီမိဝါ ခံဂၤအီၣ် တၢ်အီၣ်ဒီး အိးထီၣ်ကွၢ်ကီ တၢ်ဟ့ၣ်လၢ အဒိးန့ၢ်ဘၣ်ဝဲ န့ၣ်လီၤ. ဖိသၣ် ခံဂၤစ့ၢ်ကီး ကွၢ်ကီ အတၢ်ဟ့ၣ်တဖၣ်လီၤ.
ဖဲဖံထၢၣ် ဒီးအမါအီၣ်တၢ်ဝံၤ အဝဲသ့ၣ်လဲၤဆူ ကါအလီၢ်ဒ်သိး ကသုးကျဲၤ တၢ်လၢ ပှၤဘၣ်ကီဘၣ်ခဲ ခံဂၤ အဂီၢ် န့ၣ်လီၤ. ဖဲအဝဲသ့ၣ် လဲၤတုၤဖဲန့ၣ် ထံၣ်ဝဲ တၢ်ခ့တၢ်ပှၤတရၢ စူးရိအိၣ်ဖှိၣ် ကတိၤသကိးတၢ် န့ၣ်လီၤ.
“မ့ၢ်သုတဲသကိး မနုၤလဲၣ်.” ဖံထၢၣ်သံကွၢ်.
“အဝဲသ့ၣ်ဟးထီၣ်လံ” ပှၤနီၣ်ကါစံး “အပိာ်ခွါတဂၤ န့ၣ် ဖဲပအီၣ်ဂီၤတၢ်အီၣ် အခါအဝဲလဲၤကိး ထဲးကစံာ် လီၤ. တတဲဘၣ် ပဝဲတရၢ တၢ်နီတမံၤဘၣ်.” ဝံၤပှၤဖီတၢ်ဖိတဂၤ စံးအါထီၣ်ဝဲ, ပနၢ်ဟူ ကါဟဲအသီၣ်လၢ တၢ်လီၢ်ခံ ဒီးအဝဲဒီး ပှၤနီၣ်ကါခံဂၤ စိာ်လီၤပိာ်မုၣ်ဆူ ကါပူၤန့ၣ်လီၤ.”
“အပိာ်ခွါတဂၤန့ၣ် သံကွၢ်ပှၤ တၢ်ဆါဟံၣ်အမံၤ ဒီးပစံးအီၤ လၢပှၤယူဒၤဖိ အတၢ်ဆါဟံၣ်အိၣ်တဖျၢၣ် န့ၣ်လီၤ. အဝဲစံးဝဲလၢ သါသးအုးဒိၣ်မးလၢ သါဘၣ်မၤတံာ်တာ် ပှၤအဃိ န့ၣ်လီၤ.”
“ပထံၣ်ဘၣ် ဖိသၣ်န့ၣ် လီၤဂာ်ဒၣ် ပှၤယူဒၤဖိ, လီၤဂာ်အပၢ် ဒိၣ်မးလီၤ.” ပှၤဖီတၢ်ဖိစံး.
စံးတၢ်ဝံၤ နံၤသကိး မးဝဲ ဝံၤ ကွၢ်လိာ်အမဲာ် တဂၤတဂၤ န့ၣ်လီၤ. “အၢၣ်, ယဆိမိၣ် မၤတၢ်လၢ အဂီၢ် တသ့လၢၤနီတမံၤဘၣ်.” ဖံထၢၣ် တၢ်ခ့တၢ်ပှၤတဖၣ် က့ၤတဂၤဆူအတၢ်ဖံး တၢ်မၤအလီၢ်ဒၣ်ဝဲ စုာ်စုာ်လီၤ. အဝဲသ့ၣ် ကဘၣ်ကတဲာ်ကတီၤ တၢ်လၢ ခရံာ်အိၣ်ဖျဲၣ် အဖးထံၣ် အဂီၢ်ဒံးလီၤ.
“ပကလဲၤကွၢ်အဝဲသ့ၣ် အလီၢ်အကျဲတဘီ.” ဖံထၢၣ်စံးဘၣ်အမါ ဒီးအမါမၤထီၣ် အမဲာ် အုၣ်သပှီၤဒီး ပိာ်ထီၣ်အခံလီၤ. အဝဲသ့ၣ် လဲၤထီၣ်ဆူဒၢးဖိန့ၣ်လီၤ. တၢ်ကိးမံၤဒဲး အိၣ်ဘၣ်လီၢ်ဘၣ်ကျဲ ခဲလၢာ်လီၤ. ကတဲာ်န့ၣ် တၢ်ပာ်သန့ၤထီၣ်က့ၤအီၤ လၢတၢ်ဒူၣ်ကပၤ ဒ်လၢညါ အသိးလီၤ. ဒီးယၣ် ဘၣ် တၢ်ချံးက့ၤဂ့ၤဂ့ၤ ဒီးစပွဲဒီး လီၢ်ဆ့ၣ်နီၤ အိၣ်လၢအလီၢ်ဒ် လၢညါန့ၣ်လီၤ. ပဲြတီ ဘၣ်တၢ်အိးထီၣ်ဒ်သိး ကလံၤကဆှီကဟဲနုာ်လီၤ န့ၣ်လီၤ. တၢ်အိၣ်ထဲတမံၤလၢ အမၤဖျါထီၣ် လၢဒၢး ဘၣ်တၢ်သူအီၤန့ၣ် လီၤ. လၢသ့ၣ်ဘၣ်ခိၣ်လၢ ကတဲာ် ကပၤထံခုၣ် အိၣ်ဝဲတခွး န့ၣ်လီၤ.
ဖံထၢၣ်မ့ၢ်ဂ့ၤ အမါမ့ၢ်ဂ့ၤ တစံးတၢ်နီတမံၤဘၣ်. အဝဲသ့ၣ် က့ၤဆူအဟံၣ် ဆူ တၢ်အိၣ်သကိး အဒၢးလီၤ. ဖံထၢၣ်လဲၤဃီၤဆူ ပဲြတီဒီး ကွၢ်လီၤတၢ်ဆူ ကရၢၢ် ပူၤန့ၣ်လီၤ. အမါ တခီအိးထီၣ် ကွၢ်တၢ်ဟ့ၣ် တဘိၣ်လၢ အတအိးထီၣ်ကွၢ်ဒံးဝဲ ဘၣ်န့ၣ်လီၤ. ဖိသၣ် တဖၣ် ကတဲာ်ကတီၤ သူၣ်ဖှံသးညီဂ့ၤမးလီၤ.
“မ့ၢ်နတလဲၤလိာ်ကွဲ ဂီး (Golf) ဘၣ်ဧါ.” ဖံထၢၣ်အမါသံကွၢ်အီၤ. ဖံထၢၣ်ဆ့ၣ်နီၤ လၢပဲြတီ ခိၣ်ဒူလိၤဝံၤ စံး, “ယသးတဆူၣ်ကဲၣ်ဆိးဘၣ်. ယသးဃၢ ဒိၣ်မးလီၤ.”
“တၢ်လီၤဆီလီၤ.” ဖံထၢၣ်အမါစံး, “ယဲနာ်သက့ ယသးတဖှံဘၣ်. တလီၤဂာ်ဘၣ်ယၤလၢ ခရံာ်စမၢး နီတစဲးဘၣ်”
လၢပဲြတီအိးထီၣ်အသးအပူၤ ထံၣ်ဘၣ်ဝဲ စီၤနီၤခိၣ်အိၣ်ကတဲာ်ကတီၤ အသးဃံဃံလၤလၤ တၢ်အီၣ် ဝံၣ်အီၣ်ဆၢန့ၣ်လီၤ.
“ပြကၢးမၤဒံး မနုၤအဂၤလၢ အဝဲသ့ၣ်အဂီၢ်လဲၣ်န့ၣ် ယတသ့ၣ်ညါ စဲဃဲၤဘၣ်.” မၢၤ ဖံထၢၣ်စံး.
ဖံထၢၣ် တတဲ တၢ်နီတမံၤဘၣ်. အဝဲဂဲၤထၢၣ် ဒီးဟးတထီ ဟးတလီၤ လၢဒၢးပူၤန့ၣ်လီၤ.
“အကတၢၢ်တခီ အဝဲသ့ၣ် မးတတဲပှၤ တၢ်နီတမံၤ ပကသ့ၣ်ညါစၢၤဧါ. မၢၤဖံထၢၣ်စံး, ဝံၤစံးကဒီးဝဲ, “ပိာ်မုၣ်န့ၣ် ဆါနးမ့ၢ်ဂ့ၤ, ဖိသၣ်ဆါနးမ့ၢ်ဂ့ၤန့ၣ်, အ၀ၤကတဲဘၣ်ပှၤကီးသၢၣ်. ယနာ်လၢ ဖိဒီးမိၢ် ခံဂၤလိာ် ကအိၣ်ဆူၣ်ဂ့ၤဂ့ၤန့ၣ်လီၤ. ပှၤကလုာ် အဝဲန့ၣ် အဂံၢ်အဘါ ဆူၣ်ဒိၣ်မးလီၤ.”
ဖံထၢၣ်ဟံးထီၣ်အမိာ်ဒီး သါကအိဝဲ ဝံၤ ပၢနုာ်ကဒါက့ၤ ဝဲဆူ အထၢၣ်ပူၤန့ၣ်လီၤ.
“အဝဲသ့ၣ်အိၣ်လၢ ယူဒၤတၢ်ဆါဟံၣ်န့ၣ် ဘၣ်တၢ်အံးတၢ်ကွၢ် အီၤဂ့ၤန့ၢ်ဒံး အိၣ်ဝဲ ဖဲအံၤလီၤ. တၢ်လၢ အလိၣ်ဒီး အီၤကိးမံၤ တၢ်ကမၤန့ၢ်အီၤလီၤ. အမဲာ်ညါ အဝဲသ့ၣ်ဟးထီၣ်ချ့ဒံးချ့ဒူး ထဲအံၤညါ, ပတန့ၢ်အခွဲး အယာ်လၢ ပကဟ့ၣ် ကူၣ်ဟ့ၣ်ဖး အီၤ တၢ်နီတမံၤဘၣ်လီၤ.”
ဖံထၢၣ်ဖီၣ်ထီၣ်လံာ် တဘ့ၣ် သါကဖးဝဲဘၣ်ဆၣ် ကးတံာ်က့ၤဝဲလီၤ. မ့မ့ၢ်အမါတခီ ဝံာ်ပကံးဝံာ်ပကး ဒၣ်အယီၢ်သကိးလၢ အဆ့လိၤန့ၣ်လီၤ.
ဝံၤဒီး ကတိၤထီၣ်တၢ်ချ့ချ့ဒီးစံး, “ယကလဲၤဒီး သံကွၢ် မ့ၢ်အဝဲသ့ၣ် မၤအသးဒ်လဲၣ်, ဒီးလဲၤစိာ် န့ၢ် အတၤသူတၤသၣ် ဒီးတၢ်အီၣ်ဒီး တၢ်လၢၤလၢ ဖိသၣ်အဂီၢ် ဒီးသံကွၢ် မ့ၢ်အလိၣ်ဘၣ် ဒံးမနုၤလဲၣ်န့ၣ်လီၤ. ယအဲၣ်ဒိး လဲၤတဂီၤအံၤ, ဘၣ်ဆၣ် ယဘၣ်လဲၤဆှၢဖိသၣ်တဖၣ်ဆူ တၢ်ဘါလီၢ်လီၤ.”
ဝံၤဒီး ပဲြတီ အိးထီၣ်အသးဒီး ဖိသၣ်တရၢ ဟဲဃ့ၢ်နုာ်လီၤဒီး, မ့စံး, “ကွၢ်လၢအံၤ ယလံာ်ထီၣ်ယဖဲလံ, ဘီးဘ် အတၢ်မနုၤမး တအိၣ်လၢကလံာ်ဝဲဘၣ်.” အဝဲဂဲၤကလံၣ်လၢ အခီၣ်မုၣ်စိးနါ ဒီးစံး, မါမံၣ်ဧၢ, မၤချ့ချ့, ပကစဲၤခံယ ခဲကၢာ် ပတထံၣ်ဘၣ် လၢၤပှၤဟဲနုာ်လီၤဆူ သရိာ်ပူၤဘၣ်ဖုးလီၤ.”
“ယဆၢလၢ ပှၤကသးဝံၣ်, ဒိကနၣ်ကလူးသးဝံၣ်န့ၣ်လီၤ.” ဘီးဘ်စံး, “ပတိၢ်န့ၢ် အဖျၢၣ် လၢကၠိဒီး ပတဘၣ် ကွၢ်လီၤလၢ လံာ်ပူၤဘၣ်. ဒဲးဒံၣ်ဧၢ, ဘၣ်မနုၤ ယ့ၣ်ရှူးအိၣ်ဖျဲၣ်လၢ ကျီၢ်အီၣ်ဆၣ်လီၢ်လဲၣ်.”
“တၢ်လီၢ်လၢအဂီၢ် လၢဘူၣ်ဘျီၣ်ပူၤ တအိၣ်အဃိလီၤ.” ဖံထၢၣ်စံးဆၢ, “တၢ်မနုၤလဲၣ်, မ့ၢ်အဝဲသ့ၣ် မ့ၢ်ပှၤဘၣ်ကီဘၣ်ခဲဧါ.” မ့ သံကွၢ်ဒီး ပှၤတစံးဆၢနီတဂၤ ဘၣ်. မၢၤဖံထၢၣ် ဂဲၤထၢၣ် ကွၢ်လီၤအသးလၢ မဲာ်ထံ ကလၤပူၤဒီး စၢထီၣ်အခိၣ်ဒီးစံး, “သးဘိဧၢ, သံကွၢ်နါစိၤ တၢ်ဒ်န့ၣ် တဂ့ၤ.”
ဖံထၢၣ်အိးထီၣ်ပဲြတီ ဒီးနၢ်ဟူစိဃီၤ ဝဲသရိာ်အဒၢလွဲသီၣ်ထီၣ်လီၤ. မုၢ်ဆဲးလီၤလၢ ထံလီၤသကၤ အဖီခိၣ် ဖျါဝါကြတ့ၣ် ဒ်စ့အသိး လီၤ. မံးစထၢၣ်ဖံထၢၣ် အမဲာ်မၤအသးဒ် အသးဘၣ်တံာ်တာ် ဒိၣ်မးဒီး ကတိၤထီၣ်တၢ်ဒီး စံး, “ယဆၢလၢ , ယဆၢလၢ,” ဘၣ်ဆၣ် အဝဲကတိၤတၢ်တကတၢၢ် န့ၢ်အီၤဘၣ်. မ့ၢ်လၢ ကါခံဆိဟဲတုၤ ဒီး အပှၤသမှံၤလၢ အကွၢ်လၢ်ဝဲအကျဲလၢ အမ့ၢ်ဒူၣ်ဖိထၢဖိ ခံဒူၣ် ဟဲတုၤဝဲန့ၣ်လီၤ. ဘီးဘ်ဒီး မ့ လၢတၢ်သူၣ်ဖှံသးညီအပူၤ ဃ့ၢ်လီၤလဲၤသဂၢၢ်ပှၤသမှံၤ အခိၣ်ဒီး ကိးထီၣ်ဝဲ, “ခရံာ်အိၣ်ဖျဲၣ် တၢ်သးခု ဘၣ်သုတက့ၢ်.” န့ၣ်လီၤ.
(မ်ခရံာ်အိၣ်ဖျဲၣ်အံၤ ကဟဲစိာ်န့ၢ်သု သးလၢအအဲၣ်ဒိးမၤဂ့ၤတၢ် အါအါတက့ၢ်.)
