တံတူး ၂း၁၀, မၤကယၢကယဲ တၢ်အုၣ်က့ၤခီၣ်က့ၤ ပှၤယွၤအတၢ်သိၣ်တၢ်သီလၢ တၢ်ခဲလၢာ်အပူၤ တက့ၢ်.
လံာ်စီဆှံတဆၢအံၤ ပှၤအါဂၤကနၢ်ပၢၢ်ဒီး ပာ်ဖျါဝဲ အခီပညီ အါမံၤလီၤ. လၢပနၢ်ပၢၢ် ကညီအဂီၢ် ပကစံးလၢ ပကဘၣ်စူၢ်ယွၤ အတၢ်သိၣ်တၢ်သီလၢ တၢ်ခဲလၢာ် အပူၤလီၤ. စီၤပီလူး ကွဲးမၤလိာ် စီၤတံတူးတၢ်လၢ အကဘၣ်မၤဝဲအံၤ မ့ၢ်စ့ၢ်ကီး လၢပဝဲခဲလၢာ်အဂီၢ် လီၤ. တၢ်စူၢ်ယွၤအတၢ်သိၣ်တၢ်သီ မ့ၢ်စ့ၢ်ကီး တၢ်မၤဃံ မၤလၤ, တၢ်ကယၢကယဲဒီး တၢ်သံၣ်ခွဲၣ်ကတီၤ ယွၤအတၢ်သိၣ်တၢ်သီ န့ၣ်လီၤ. ပဘၣ်မၤအီၤလၢ တၢ်မၤကိးမံၤအပူၤ န့ၣ်လီၤ.
ပှၤအါရဲးမုၣ် ဖိတဂၤ အမံၤ့ၢ်ဝဲ မၤစၣ်, အိၣ်ဝဲလၢ အဲလ်ကၠံရယၣ်, ကီၢ်အၤြဖံၤကၤ န့ၣ်လီၤ. ပိာ်မုၣ်အံၤ ဘုၣ်ဝဲကသ့ၣ် တဒုလၢ ပှၤစံးဝဲလၢ အနီၢ်ခိအက့ၢ်အဂီၢ် ဒီးအသးဂ့ၤဒိၣ်မး လၢအမံၤ မ့ၢ်ဝဲ မိဟၢၣ် (Mohul) လီၤ. မၤစၣ် အဲၣ်မိဟၢၣ် လၢာ်သး, ဒီးမိဟၢၣ် စ့ၢ်ကီး အဲၣ်အကစၢ်မုၢ်အံၤ လၢာ်သးလီၤ. အပၢ်ဘၣ်န့ၢ် တၢ်ညၣ်ဂိၢ်ဒီး သံဝဲလီၤ. ဘၣ်အိၣ်ဝဲဒီး အမိၢ် မုၣ်ကမဲ ဒီးအဒီပုၢ်ဝဲၢ်ခွါ တဂၤလၢ အတအိၣ်ဆူၣ်အိၣ်ချ့ ဒီး ဖံးတၢ်မၤတၢ် တကဲဘၣ်န့ၣ်လီၤ.
တၢ်အီၣ်လၢ ဟံၣ်ပူၤတလၢဘၣ် ဒီး ကပှ့ၤတၢ်အီၣ်အဂီၢ် မၤစၣ်ဆါကွံာ် အနၢ်ဒံး ထူဝံၤ အဖဲကွီၤထူ လီၤ. စ့လၢအန့ၢ်န့ၣ် အဝဲပှ့ၤ တၢ်အီၣ်တၢ်အီလၢ ဟံၣ်အဂီၢ် လီၤ. အစ့မ့ၢ်လၢာ်ကွံာ်ဒီး တဘျီအံၤ အိၣ်တ့ၢ်ဒၣ်ထဲ ကဘၣ်ဆါကွံာ် အကသ့ၣ် မိဟၢၣ်န့ၣ်လီၤ. လၢမဲာ်ထံမဲာ်နိအပူၤ မၤစၣ်လဲၤမိၤအကသ့ၣ် ဆူြဖၣ်စ့ၣ် အသုးတဖု အိၣ်ဝဲ အလီၢ်န့ၣ်လီၤ. ကဘၣ်လီၤဖးဒီး အကသ့ၣ်အဃိ တဒိးမိဟၢၣ်ဒ် အညီနုၢ်အသိးဘၣ်. တုၤလၢ ပှၤခိးသုးအြတဲၤ အလီၢ်ဒီး တဲဝဲလၢ သါဟဲဆါ သါကသ့ၣ်တဒု အံၤလီၤ. တဲတၢ်အံၤ သုးခိၣ်ဖိ နၢ်ဟူဝဲ ဒီး သံကွၢ်အီၤ, ပိာ်မုၣ်ဖိဧၢ, နကဆါနကသ့ၣ်အံၤ ဆံးအါလဲၣ်. အဝဲတဲ ယကသ့ၣ်အံၤ ယတအဲၣ်ဒိး ဆါဘၣ်. ဘၣ်ဆၣ် ပအီၣ်တၢ်တအိၣ် လၢၤဘၣ်အဃိ ယကဘၣ်ဆါအီၤလီၤ. နမ့ၢ်သးကညီၤယၤဒီး ဟ့ၣ်ယၤ ြဖၣ်စ့ၣ်အစ့ ၁၀၀၀ ြဖဲမီၤ. သုးခိၣ်ဖိအံၤ တဲအီၤ, ပိာ်မုၣ်ဖိဧၢ, နကသ့ၣ်လၢ အဂ့ၤဒိၣ်မးအံၤ နကဆါဒၣ်ထဲ ြဖဲတကထိ ဘးအံၤ တြကၢးဘၣ်. ယကဟ့ၣ်နၤ ြဖဲခံကထိလီၤ. (ြဖၣ်စ့ၣ်အစ့ ြဖဲတကထိ လီၤလိာ်အမဲရကၤ အဒီလၣ် ၂၀၀ လီၤ.) သုးခိၣ်ထုးထီၣ် ဟ့ၣ်အီၤစ့ ဒီးအဝဲဟီၣ်ဝဲလီၤ. သုးခိၣ်တဲအီၤ ယဟ့ၣ်နၤစ့အါန့ၢ် ဒံးနပာ်အပှ့ၤခံဘျီ ညါလီၤ. ဘၣ်မနုၤ လၢအဘၣ်ဟီၣ်လဲၣ်. မၤစၣ်စံးဆၢ အီၤ ယအဲၣ်မိဟၢၣ် ဒိၣ်မးလီၤ. ယသးသမူ ဒီး မိဟၢၣ် အသးသမူ ပိာ်ပျံၤလိာ် အသးလီၤ. ဘၣ်ဆၣ် ယဘၣ်ပျဲ ကွံာ်အီၤလီၤ.
တုၤမၤစၣ် က့ၤတုၤလၢ ဟံၣ်ဒီး အမိၢ်အသးခု လၢကသ့ၣ်အပှ့ၤန့ၢ်ဝဲ ြဖဲခံကထိ အဃိလီၤ. ဖဲအဝဲမံပၢၢ် ထီၣ်လၢ မုၢ်ဆ့ၣ်ထီၣ်ဒီး အိးထီၣ်အကရၢၢ် အကျဲစၢၤန့ၣ်, ထံၣ်ဝဲလၢ မိဟၢၣ် ဟဲသဂၢၢ်အခိၣ် သါဟဲၣ်ဟီၣ်ဝဲ န့ၣ်လီၤ. မၤစၣ်သ့ၣ်ညါဝဲ လၢမိဟၢၣ် ယူထူၣ်ဖျဲးအသး လၢတၢ်စၢဃာ်အီၤဒီး ဟဲက့ၤဃ့ၢ်ဆူ အအိၣ်န့ၣ်လီၤ. ခိးဝဲတုၤ ကသ့ၣ်တၢ်ဘှံးအသးလီၤစၢ်ဝဲ, ဒုးအီၣ်အဆၣ်ဝံၤ လဲၤဆှၢကဒီး မိဟၢၣ်ဆူ သုးခိၣ်ဖိန့ၣ် အအိၣ်ဒီး တဲအီၤလၢ တဘၣ်ဒူမိဟၢၣ် တဂ့ၤ. ထဲစၢဃာ်အီၤ ဂ့ၤဂ့ၤ ဖဲယက့ၤပူၤ အလီၢ်ခံ တက့ၢ်. ဒီးဟီၣ်ဝဲဒၣ်လီၤ. ဖဲအဟဲဆှၢ ကဒါက့ၤ မိဟၢၣ်တုၤ အဆၢကတီၢ်န့ၣ်, သုးခိၣ်ဖိ ဖးတၢ်ပရၢတဘ့ၣ်လၢ အန့ၢ်ဘၣ်ဝဲ တဂီၤန့ၣ်လီၤ. တုၤအထံၣ်ဘၣ် ပိာ်မုၣ်ဖိ အမဲာ်ထံလီၤန့ၣ်, အသးဘၣ်ဒိဝဲဒီး တဲအီၤ ခိးတစိၢ် တက့ၢ်. ယဖး တၢ်ပရၢအံၤ တဲယၤလၢ ယကဘၣ်က့ၤဆူ ယထံယကီၢ်လီၤ. မိဟၢၣ် အလုၢ်အပှ့ၤ အဘျုးတအိၣ်လၢ ယဂီၢ်ဘၣ်. ယကဒုးဒိးအီၤ ကဘီလၢ ယသကိး တသ့ဘၣ်. ဟံးက့ၤနဲ မိဟၢၣ် တက့ၢ်. ပိာ်မုၣ်ဖိတဲဆၢအီၤ, ဘၣ်ဆၣ် ယတိၢ်တအိၣ်လၢ ယစုပူၤ ခဲအံၤဘၣ်. အိၣ်လၢဟံၣ် ဒီးတပှဲၤအလီၢ် လၢၤဘၣ်. မ့ၢ်လၢ ပပှ့ၤ တၢ်အီၣ်အဃိလီၤ.
သုးခိၣ်အံၤတဲကဒီးအီၤ, ဂ့ၤလံ, ပိာ်မုၣ်ဖိလၢ အအိၣ်ဒီး တၢ်သးဒူ တဂၤဧၢ, လံာ်ပရၢအံၤ တဲယၤလၢ ယကဲထီၣ်ဘၣ် ပှၤလၢအထူးတီၤ ဖးဒိၣ်တဂၤလံ. ဟံးက့ၤနဲ မိဟၢၣ်ဒီး စ့စ့ၢ်ကီး တက့ၢ်. ယတဃ့နၤဘၣ်. အဝဲအံၤ မ့ၢ်တၢ်ပာ်ဖျါထီၣ် တမံၤလၢ ယစံးဘျုးယွၤ လၢအဆိၣ်ဂ့ၤယၤ အဃိလီၤ. ဟီၣ်လၢၤတဂ့ၤ. မၤစၣ်စံး ဘျုးအီၤ ဒီးက့ၤလၢတၢ်သးခု အပူၤလီၤ.
သုးခိၣ်တဂၤအံၤ တၢ်ဂ့ၤလၢ အမၤဘၣ် မၤစၣ် လၢအဟ့ၣ်က့ၤအီၤ မိဟၢၣ်ဒီး တဃ့က့ၤဝဲ ကသ့ၣ်အပှ့ၤဘၣ်အဃိ, မ့ၢ်ဝဲ တၢ်ကယၢကယဲ ယွၤအတၢ်သိၣ်တၢ်သီ တဖၣ်န့ၣ်လီၤ. တၢ်သိၣ်တၢ်သီ လၢပစူၢ်အီၤ, ဒ်ပစံးတၢ်အသိး, ပဒိကနၣ် အီၤဒီး မၤထွဲအီၤန့ၣ် မ့ၢ်တၢ်ကယၢကယဲ တၢ်မၤလိာ်တဖၣ်လၢ ယွၤပာ်လီၤဝဲ လၢပဂီၢ် န့ၣ်လီၤ. သုးခိၣ်အံၤ အိၣ်ဒီး ခရံာ်အသးလၢအပူၤ, ဟ့ၣ်ကလီတၢ် မၤစၢၤလၢ မၤစၣ်မ့ၢ်ဝဲ တၢ်အဲၣ်ပှၤလၢပဃၢၤ န့ၣ်လီၤ.
