၂ တံၤ ၁း၆, ပဒုးသ့ၣ်နီၣ်ထီၣ်နၤ ဒ်သိး နကထိၣ်ဂဲၤထီၣ် တၢ်ဟ့ၣ်လၢ အအိၣ်လၢနပူၤ, လၢယပာ် ယစု လၢနလိၤ အဃိလီၤ.ဖဲ မးသဲ အခိၣ် ၂၅ န့ၣ်ခရံာ် ကတိၤဒိ တၢ်ဘၣ်ဃး တၤလၣ် အဂ့ၢ် လီၤ. ပှၤလၢ အန့ၢ်ဘၣ် ယဲၢ်တၤလၣ် တဂၤ မၤအါ ထီၣ်၀ဲဒီး အတၢ်အိၣ်အတၤလၣ် တဆံလီၤ. ပှၤလၢအန့ၢ်ဘၣ် ခံတၤလၣ် တဂၤ မၤအါထီၣ်၀ဲ ဒီး အတၢ်အိၣ် လွံၢ်တၤလၣ် လီၤ. မ့မ့ၢ် ပှၤလၢ အန့ၢ်ဘၣ် တတၤလၣ် တဂၤ တမၤ အါ ထီၣ်၀ဲဘၣ်ဒီး အတၢ်အိၣ်ဒၣ် တတၤလၣ် လီၤ. အကစၢ် ကိးအီၤလၢ ကုၢ်လၢ အအၢ ဒီး အ ကၢၣ် တဂၤလီၤ. တၢ်မၤလိ ဖးဒိၣ် လၢပဂီၢ် မ့ၢ်၀ဲ ဒ်အံၤလီၤ. ပတမ့ၢ် ပှၤစဲၣ်နီးဒီး ပှၤအသ့ ကိးဂၤဒဲး ဘၣ်. ဘၣ်ဆၣ် ပမ့ၢ် ပှၤဂ့ၤဒီး ပှၤအတီ သ့၀ဲ ကိးဂၤလီၤ. လိၣ်ဒၣ် လၢပဘၣ် မၤဂ့ၤ မၤတီ ပသးလီၤ.
ဖိသၣ် တဖၣ် ြကၢးထိၣ်ဂဲၤ ထီၣ်အတၤလၣ် ဖဲ အဆံးဒံး ဒၣ်လဲာ် အခါန့ၣ်လီၤ. မိၢ်ပၢ် တဖၣ် ဘၣ်သိၣ် လိဆိ အ၀ဲသ့ၣ် လၢ ကဘါ ထုကဖၣ် တၢ်, ကဃ့၀ဲလၢ ယွၤကဒုးနၢ်ပၢၢ်အီၤလၢ အကသူ အတၤလၣ် ဒ်လဲၣ်ဒ်လဲၣ် န့ၣ်လီၤ. အဒိလၢအဂ့ၤ မ့ၢ်၀ဲ, ၀ူးလ်ဖ်ကဲမိၣ်စး လီၤ. (Wolfgang Mozart) မ့ၢ်ပှၤလၢ အကွဲးထုးထီၣ် တၢ်သး၀ံၣ် အမံၤဟူ ကတၢၢ်တဂၤ ဒီး စးထီၣ် ဆိမိၣ် န့ၢ် တၢ်သး၀ံၣ် ဒီး စးထီၣ်ကွဲး၀ဲ ဖဲ အအိၣ်ဒံး ဒၣ် ၅ နံၣ် န့ၣ်လီၤ. အပၢ်စ့ၢ်ကီး မ့ၢ်ပှၤသး၀ံၣ် တၢ်သ့ဖးဒိၣ် တဂၤလီၤ. ဖဲအပၢ် သိၣ်လိ အ၀ဲၢ်မုၣ် လၢအအိၣ် ၈ နံၣ် အခါ, အ၀ဲ အသးအိၣ်ဒံးဒၣ် ထဲ ၃ နံၣ်ဧိၤဒီး, ဃ့ကညး အပၢ်လၢ ကသိၣ် လိစ့ၢ်ကီး အီၤလၢ တၢ်သး၀ံၣ် လီၤ. အပၢ်ဆိကမိၣ် လၢအသးစၢ်ဒံး ဒိၣ်မးဒီး တကနၣ်ဃုာ်အီၤ ဘၣ်. ဘၣ်ဆၣ် အ၀ဲက နၣ် တၢ်သး၀ံၣ် လၢအပၢ်သိၣ်လိ အ၀ဲၢ်န့ၣ်လီၤ. လီၢ်ခံဖဲ ပှၤတအိၣ် နီတဂၤ အခါ, အ၀ဲ ထီၣ်ဆ့ၣ်နီၤလၢ လီၢ်ဆ့ၣ်နီၤ ခိၣ်လၢ တနၢ် အကပၤဒီး ဒ့တနၢ်လီၤ. အမိၢ်အပၢ်တဖၣ် ကမၢကမၣ် ၀ဲဒိၣ်မး လၢဖိဆံး တဂၤအံၤ ပှၤတနဲၣ်အီၤ နီတဂၤ သနာ်က့, ဒ့တၢ်သ့ ဒိၣ်မး အဃိ န့ၣ်လီၤ. စးထီၣ်ဖဲ န့ၣ် အပၢ်သိၣ်လိ မၤယုၤအီၤ လၢတၢ်သး၀ံၣ် ဒီး တၢ်ဒ့ တနၢ်န့ၣ်လီၤ.
ဖဲအသးအိၣ် ၆ နံၣ်န့ၣ်, အပၢ်လဲၤယုၤအီၤဆူ တၢ်ဘူၣ်တၢ်ဘါ လီၢ်လံၤ တဖျၢၣ်ဖဲ တၢ်ပာ် ၀ဲ တနၢ်ယီၢ်ခီၣ်, အီကၢၣ် တဖျၢၣ်န့ၣ်လီၤ. တဲဘၣ် အပၢ်, ပၢ်ဧၢ, နဲၣ်လိယၤ လၢယကဘၣ် ယီၢ်တနၢ် အခီၣ် ယီၢ်ဒ်လဲၣ် တက့ၢ်. ယအဲၣ်ဒိး ဒ့ကွၢ်အီၤလီၤ. ဖဲန့ၣ် အဆၢကတီၢ် တနၢ်ယီၢ်ခီၣ်, အီကၢၣ်, တဖၣ် တၢ်ဘၣ် သွီနုာ်ကလံၤ ဒ်သိး ကသီၣ်၀ဲ အဂီၢ်လီၤ. အပၢ်သွီနုာ် ကလံၤဒီး အ၀ဲဒ့၀ဲလီၤ. ပှၤဖိနဲကဲၣ် တဂၤအံၤ ဒ့သီၣ်ထီၣ်၀ဲ တၢ်သး၀ံၣ် အမုာ်ကတၢၢ်လၢ တနၢ်ယီၢ်ခီၣ်, အီကၢၣ်, အံၤဖဲ သရၣ်သီခါတဖၣ် အီၣ်တၢ် အခါလီၤ. အ၀ဲသ့ၣ် တဖၣ် ပာ် တ့ၢ် အနီၣ်တၢၤ နီၣ်ဆဲး ဒီးလဲၤဃီၤ ဒိကနၣ် တၢ်လီၤ. ပှၤလၢ အဒ့ညီနုၢ် တၢ်ဒီး အဘၣ်ကတဲာ်ကတီၤ ဃုာ်တနၢ် ယီၢ်ခီၣ်, အီကၢၣ်, တဂၤအံၤ ဒၣ်လဲာ်, ဒ့၀ဲ တသ့ ထဲသိး ဖိသၣ်အံၤ ဒ့၀ဲန့ၣ်ဘၣ်. သီခါ သရၣ်တဖၣ် စံး၀ဲ လၢ မူခိၣ် ကလူးတဖၣ် ဟဲလီၤဒ့ တနၢ်လီၤ. ပာ်၀ဲလၢ အမ့ၢ် တၢ်လီၤဆီ လီၤလး လီၤ.
မိၣ်စး ကမ့ၢ်၀ဲ ပှၤယဲၢ်တၤလၣ် တဂၤ. နဲနကမ့ၢ် ပှၤတတၤလၣ် တဂၤလီၤ. ယွၤတဲ ပှၤသးစၢ်ဒီး ပှၤဖိသၣ် ကိးဂၤဒဲး, လၢကထိၣ် ဂဲၤထီၣ် အတၤလၣ် လီၤ. ခူၣ်လီၤ အီၤတဂ့ၤ. မ့မ့ၢ် မၤအါ ထီၣ်အီၤ ခံစး တက့ၢ်.
