ခရံာ်အိၣ်ဖျဲၣ် အတၢ်ဃဲၤပူအံၤ ဘၣ်တၢ်သ့ၣ်ညါအီၤဂ့ၤဂ့ၤန့ၣ်လီၤ. ဘၣ်ဆၣ်သနာ်က့ တၢ်လၢပသ့ၣ်ညါတ့ၢ် အီၤတဖၣ် ဘၣ်တဘၣ် လံာ်စီဆှံ ကွဲးဝဲဒၣ် တလၢတပှဲၤဘၣ်. အဒိ, ဘၣ်သ့ၣ်သ့ၣ် ကျီၢ်အီၣ်ဆၣ်လီၢ် တဲကူတအိၣ်ဝဲသ့ၣ်သ့ၣ်ဘၣ်, မ့မ့ၢ်တခီ ကစၢ်ခရံာ်ကအိၣ်ဖျဲၣ်ထီၣ်လၢ လ့ပူၤလၢ ဟံၣ်အလီၢ်ခံန့ၣ်လီၤ. ပှၤကွၢ်သိ တဖၣ်ဒီး ပှၤမၢ်ကူး ဘၣ်သ့ၣ်သ့ၣ် တလဲၤအိၣ်သကိး ကစၢ်ခရံာ်လၢ တၢ်ဆၢကတီၢ် ဒ်သိးလိာ်အသး န့ၣ်ဘၣ်. ဒီး ပှၤမၢ်ကူးတဖၣ်စ့ၢ်ကီး တမ့ၢ် စီၤပၤသၢဂၤဘၣ်, ပတသ့ၣ်ညါလီၤတံၢ် မ့ၢ်အဝဲသ့ၣ်အိၣ်ပှဲၤဂၤပှဲၤဂၤ န့ၣ်ဘၣ်, အဝဲသ့ၣ်မ့ၢ်ဒၣ် ပှၤဒွးမုၢ်လါဆၣ် တဖၣ် လီၤ. တမ့ၢ်စီၤပၤ တဖၣ်ဘၣ်.
ပှၤလၢအတဲလဲၢ်ထီၣ်အါထီၣ် တၢ်သ့ၣ်တဖၣ် ဒုးကဲထီၣ်တၢ်သးဒ့ဒီ ဘၣ်ဃး ကစၢ်ခရံာ်အတၢ်ဟဲအိၣ်ဖျဲၣ်ထီၣ် တၢ်ဂ့ၢ်အဂၤတဖၣ် စ့ၢ်ကီးန့ၣ်လီၤ. ဒီးတၢ်ဃဲၤပူၤ အတၢ်ဂ့ၢ်အဂၤတခါ ဘၣ်ဃး ဆၣ်လၢ တၢ်ထံၣ်န့ၢ်အီၤလၢ ပှၤမၢ်ကူး တဖၣ် စ့ၢ်ကီး တၢ်သးဒ့ဒီ အိၣ်ထီၣ်ဝဲဒၣ်န့ၣ်လီၤ. မးသဲ ၂း၇ တုၤ ၉ စံးဝဲလၢ ဆၣ်တဖျၢၣ်အံၤ အိၣ်ဖျါထီၣ်တယံာ်ဒံးဘၣ်, ဒီးလဲၤတၢ်လၢ မူခိၣ် ဒီး အိၣ်ပတုာ်ဝဲလၢ ၀့ၢ်ဘ့ၤသလ့ဃ့ၣ် အဖီခိၣ်န့ၣ်လီၤ.
ပှၤအါတက့ၢ်ကထံၣ် ဆၣ်အံၤလၢ အမ့ၢ် ဆၣ်မဲၢ်ထီၣ် န့ၣ်လီၤ. ပှၤတရူးဖိတဖၣ်အတၢ်ကွဲးနီၣ် အပူၤပာ်ဖျါထီၣ်ဝဲလၢ ဆၣ်မဲၢ်ထီၣ် လၢအလီၤလိၢ်လီၤလး အိၣ်ဖျါထီၣ်ဝဲ သၢဘျီ လၢအစိၤအဆၢကတီၢ်ဖဲန့ၣ် (လၢ ချ.ခ.န ၁၂, ၅, ဒီး ၄ အပူၤ) န့ၣ်လီၤ. ဒီးဆၣ်မဲၢ်ထီၣ် သၢဘျီအကျါ လၢအမ့ၢ် တၢ်ခၢၣ်သးတဘျီန့ၣ် ဘၣ်လိာ်အသးဒီး တၢ်လၢလံာ်စီဆှံ အပူၤန့ၣ်လီၤ. ပသ့ၣ်ညါလၢ ယ့ၣ်ရှူး အသးအိၣ် အနံၣ် သၢဆံ ဖဲ ခ.န. ၂၉ နံၣ် (ကွၢ် လူၤကၣ် ၃း၂၃) အဃိ, ဆၣ်မဲၢ်ထီၣ်လၢ ချ.ခ.န ၁၂ န့ၣ် မ့ၢ်တၢ်ဆိတလၢညါ, ဒီး ဆၣ်မဲၢ်ထီၣ်လၢ ချ.ခ.န ၄ စ့ၢ်ကီး စဲၤခံတလၢလံ. ပသ့ၣ်ညါစ့ၢ်ကီးလၢ တၢ်ဒိၣ်စီၤပၤဟ့ၤရိာ် (စီၤပၤလၢအသးက့ၣ် ဖဲအနၢ်ဟူကစၢ်ခရံာ်အိၣ်ဖျဲၣ်ထီၣ်အခါ) သံလၢ တချုးလါမးရှး အလၢာ် ဖဲ ခ.န. ၄ အဆၢကတီၢ်န့ၣ်လီၤ. ပှၤတရူးတဖၣ် အတၢ်ကွဲးနီၣ်အပူၤစံးဝဲလၢ ဆၣ်မဲၢ်ထီၣ်လၢ အဖျါထီၣ်လၢ ချ.ခ.န ၅ န့ၣ်တလီၤဂာ်ဒီး ဆၣ်မဲၢ်ထီၣ် အဂၤခံဖျၢၣ်န့ၣ်ဘၣ်. မ့ၢ်ဆၣ်မဲၢ်ထီၣ်တဖျၢၣ်လၢ အမဲၢ်လီၤကစဲၤဖးထီ, ဒီး အိၣ်ဖျါထီၣ် ဝဲဒၣ်လၢ မုၢ်ထီၣ်တခီလၢ အသီ ၇၀ အတီၢ်ပူၤန့ၣ်လီၤ.
အဃိ, ဆၣ်မဲၢ်ထီၣ်လၢ ချ.ခ.န ၅ ကဘၣ်မ့ၢ်ဆၣ်လီၤလး တဖျၢၣ်လၢ လံာ်မးသဲ တဲဝဲန့ၣ်လီၤ. ဆၣ်လီၤလး တဖျၢၣ်အံၤ ဘၣ်တၢ်ထံၣ်န့ၢ်အီၤလၢ ပှၤမၢ်ကူးတဖၣ် လၢမုၢ်ထီၣ်တခီ, ဒီး လၢခံ ခံလါပူၤကွံာ်ဖဲအဝဲသ့ၣ် ဟဲတုၤဝ့ၢ်ယရူၤရှလ့ၣ်အခါ ဆၣ်တဖျၢၣ်အံၤ သုးက့ၤအသးဆူ ကလံၤထံး တခီန့ၣ်လီၤ. ဝ့ၢ်ဘ့ၤသလ့ဃ့ၣ်န့ၣ် အိၣ်လၢ ဝ့ၢ်ယရူၤရှလ့ၣ် အကလံၤထံး တကပၤအဃိ ဖဲပှၤမၢ်ကူးတဖၣ် ဟဲဘူးဒီး ဝ့ၢ်ဘ့ၤသလ့ဃ့ၣ် အခါ ဆၣ်လီၤလးတဖျၢၣ်အံၤ ကအိၣ်ဖျါထီၣ်ဝဲလၢ ဝ့ၢ်ဘ့ၤသလ့ဃ့ၣ် အဖီခိၣ်တီတီန့ၣ်လီၤ.
ဆၣ်လီၤလး တဖျၢၣ်အံၤ မ့ၢ်အိၣ်ဖျါထီၣ်လၢ ချ.ခ.န ၅ အပူၤန့ၣ် ပတဲဖျါထီၣ် ကစၢ်ခရံာ် အတၢ်အိၣ်ဖျဲၣ်ထီၣ် အဆၢကတီၢ်လီၤတံၢ်လီၤဆဲး သ့လံန့ၣ်လီၤ. ဆၣ်မဲၢ်ထီၣ်တဖျၢၣ်အံၤ အိၣ်ဖျါထီၣ်လၢ လါမးရှး ၉ သီဒီး လါအ့ြဖ့ၣ် ၆ သီအဘၢၣ်စၢၤလၢ ချ.ခ.န ၅ အပူၤအဃိ, ပှၤမၢ်ကူးတဖၣ် အတၢ်ဟဲတုၤဆူ ဝ့ၢ်ယရူၤရှလ့ၣ် န့ၣ် ကမ့ၢ်ဝဲဖဲ လါမ့ၤအလၢာ် လါယူၤအထီၣ်န့ၣ်လီၤ. ကစၢ်ခရံာ်မ့ၢ်အိၣ်ဖျဲၣ်ထီၣ်ဆိန့ၢ်ဒံး တၢ်ဆၢကတီၢ်အံၤ, ဘၣ်ဆၣ် တၢ်ဆိမိၣ်တယာ်လၢ လံာ်မးသဲ အတၢ်ကွဲးဘၣ်ဃး ကစၢ်ခရံာ်အတၢ်အိၣ်ဖျဲၣ်ထီၣ်ဒီး ဆၣ်လီၤလး အတၢ်အိၣ်ဖျါထီၣ် မ့ၢ်တၢ်လၢအဘၣ်ထွဲ လိာ်အသး (မးသဲ ၂း၇) န့ၣ်လီၤ. မ့မ့ၢ်ဒ်န့ၣ်ဒီး, ကစၢ်ခရံာ် ကအိၣ်ဖျဲၣ်ထီၣ်ဝဲဒၣ်ဖဲ ဘူၣ်လဲၤကပာ်အဆၢကတီၢ် လၢ ချ.ခ.န ၅ အပူၤ (ဘူၣ်လဲၤကပာ် လၢနံၣ်တနံၣ်န့ၣ် လီၤဘၣ်လၢ အ့ြဖ့ၣ် ၂၀ သီ) န့ၣ်လီၤ. အဃိ ကစၢ်ခရံာ်အတၢ်အိၣ်ဖျဲၣ်ဆၢက့ၤ ပှဲၤထီၣ် အနံၣ် ၂၀၀၀ န့ၣ် ကဘၣ်မ့ၢ်ဝဲဖဲ ၁၉၉၅ နံၣ် လါအ့ြဖ့ၣ်အပူၤ န့ၣ်လီၤ.
အဝဲအံၤ မ့ၢ်တၢ်လၢအဘၣ် လိာ်အသးဒီး ပှၤကွၢ်သိတဖၣ် ကွၢ်အသိလၢမုၢ်နၤလၢ လၢစံာ်ပျီပူၤ, မ့ၢ်တၢ်ဂိၢ်အဆၢကတီၢ် (လါဒံၤစဲဘၢၣ် တုၤ လါဖ့ၤြဘူၤအါရံး) ဒီး မ့ၢ်တၢ်ဆၢကတီၢ်လၢ သိဖိတဖၣ် ဖှံလီၤဝဲ အဆၢကတီၢ်န့ၣ်လီၤ. မ့ၢ်လၢတၢ်ဂိၢ်ဒိၣ်မး အဃိ ဘၣ်လိာ်အသးဒီး ပှၤမုၢ်နုာ်တၢ်အိၣ်ဖှိၣ်အလံာ်နံၣ်လံာ်လါ လၢအမ့ၢ်လါ ဒံၤစဲဘၢၣ် ၂၅ သီ လၢယၤဖှိၣ်နံၣ် အခီၣ်ထံးလွံၢ်ဝီ အပူၤန့ၣ်လီၤ. မုၢ်နံၤမုၢ်သီအံၤ ဘၣ်တၢ်ဃုထၢအီၤ လၢပှၤခရံာ်ဖိတဖၣ် လၢအကဟံးန့ၢ် ပှၤတခီဘီမုၢ်ဖိတဖၣ် အဘူၣ်ဖးဒိၣ်လၢအမ့ၢ် “တၢ်ဒိၣ်, မုၢ်” အလီၢ် န့ၣ်လီၤ (ပှၤခရံာ်ဖိအခါဖဲန့ၣ်တဖၣ် အါတက့ၢ်မ့ၢ်ပှၤဟဲလီၤစၢၤလၢ ပှၤတခီဘီမုၢ်ဖိတဖၣ်န့ၣ်လီၤ).
ဘၣ်ဆၣ်သနာ်က့ ကစၢ်ခရံာ်အတၢ်အိၣ်ဖျဲၣ်ထီၣ်န့ၣ် ကဘၣ်မ့ၢ်ဝဲဒၣ်လၢ လါအ့ြဖ့ၣ်အပူၤ, ဖဲ ဘူၣ်လဲၤကပာ် အဆၢကတီၢ်န့ၣ်လီၤ. နီၢ်မၤရံဒီး စီၤယိၤသး ကဘၣ်လဲၤဆူ ဝ့ၢ်ယရူၤရှလ့ၣ် အတၢ်လုၢ်ဟံၣ်ဖဲ ဖိသၣ်ယ့ၣ်ရှူး ကအိၣ်ဒၣ်ထဲ ၆ နွံအဆၢကတီၢ် လၢတၢ်ကူးတရံးအဂီၢ်, ဝံၤ ကဟဲက့ၤကဒါက့ၤဆူ ဝ့ၢ်ဘ့ၤသလ့ဃ့ၣ် န့ၣ်လီၤ. ဒီးစှၤသီဝံၤအလီၢ်ခံ ပှၤမၢ်ကူးတဖၣ် ကဟဲအိၣ်သကိးအီၤ, ဘၣ်ဆၣ်မ့ၢ်လၢ စီၤပၤဟ့ၤရိာ် ကူၣ်ထီၣ်လၢ ကမၤသံဖိသၣ်အဃိ အဝဲသ့ၣ်ဃ့ၢ်ပူၤဖျဲးအသးဆူ ကီၢ်အဲၤကူပတူး န့ၣ်လီၤ.
ချ.ခ.န မ့ၢ်ဝဲ တချုးခရံာ်နံၣ်
ခ.န. မ့ၢ်ဝဲ ခရံာ်နံၣ်
၁ ယၤဖှိၣ်နံၣ် န့ၣ် အနံၣ် တကယၤ
(ဟံးန့ၢ်ကွဲးကျိာ်ထံအီၤလၢ Peter Walker, In the Steps of Jesus အလံာ်ပူၤန့ၣ်လီၤ)
