လၢဝ့ၢ်တဖျၢၣ်အပူၤ ပှၤဘှီတၢ်လိာ်ကွဲအိၣ်တဂၤလီၤ. ဘၣ်တနံၤအဝဲထၢထီၣ် ဝဲ သ့ၣ်လၢအဝါဂ့ၤမး တကူးလာ် ဒီးစံးဝဲ, “အဟါ သ့ၣ်တခါအံၤ ဝါဒီး ဘျ့ဂ့ၤမးအဃိ, ယကဘှီန့ၢ်တၢ်လိာ်ကွဲတခါလၢ အကမၤနံၤမၤသးခု ပှၤဖိသၣ် တဂၤဂၤ အဂီၢ်န့ၣ်လီၤ.”
အဝဲဟံးထီၣ်အဒီဒီး စးထီၣ်သွဲၣ်အသ့ၣ်ကူးလာ်န့ၣ်လီၤ. ဖဲန့ၣ် အဝဲသ့ၣ်နီၣ်ထီၣ်လၢ အဖိသၣ်အခါ ထံၣ်ဘၣ် ဝဲပှၤမၤလီၤနံၤတၢ် clown လၢစၢးခၢးစ် အပူၤတဂၤ လၢအစံၣ်ကွံာ် တရံးအသးတဝီ (ကၠိထိ)သ့ဒီး မၤလီၤနံၤလီၤအ့တၢ်သ့ ဒိၣ်မးတုၤဒၣ်လဲာ် အဝဲနံၤနံၤဒီး အကပၤဆါဘၣ်မး အသးန့ၣ်လီၤ. အန့ၣ်တဘျီ အဝဲစံး, “ကကဘှီပှၤမၤလီၤနံၤတၢ် လၢအစံၣ်ကွံာ်တရံးအသးသ့ တဂၤန့ၣ်လီၤ.”
တနံၤဖဲအဝဲဘှီအတၢ်ဂီၤ လီၤနံၤတဒုအခါ ဆိကမိၣ်ထီၣ်ဝဲ လၢမ့ၢ်ကဘၣ်ဟ့ၣ်ဖိသၣ်မတၤတဂၤလဲၣ် န့ၣ်လီၤ. ဖဲန့ၣ်အခါ ပိာ်မုၣ်တဂၤ ဟဲနုာ်လီၤ ဆူအဆါတၢ်အလီၢ်ဒီး ပာ်လီၤ ဝဲအတိၢ်ဖိတဘ့ၣ် လၢအဝဲအမဲာ် ညါဒီးစံးအီၤ, “ယအဲၣ်ဒိးပှ့ၤ တၢ်လိာ်ကွဲဖိတခါ လၢယတိၢ်အံၤန့ၣ်လီၤ.”
ပှၤဘှီတၢ်လိာ်ကွဲန့ၣ်စံးအီၤ, “နသါပှ့ၤန့ၢ်မတၤဖိသၣ်လဲၣ်. နအိၣ်လၢတၢးအဝဲအံၤ အဖီခိၣ်ကတၢၢ် တဆီ တမ့ၢ်ဧါ, ဒီးယတထံၣ်မးနဖိ နီတဂၤလဲၣ်.”
“အိ ယဖိအိၣ်ကစီဒီလီၤ. အဝဲလၢအဆံးဆံး ဖိအခါ ဘၣ်န့ၢ်တၢ်ဆါဖးဒိၣ် ဒီးအခီၣ်စၢ် ဟးက့ၤတသ့ဘၣ် ဒီး ဘၣ်အိၣ်ဒၣ် လၢလီၢ်မံခိၣ်လီၤ. အဃိယသးလီ တၢ်လိာ်ကွဲလၢ ကမၤသးဖှံ အီၤဒီးမၤနံၤ မၤအ့အီၤန့ၣ်လီၤ.”
ထဲန့ၣ်တဘီ ပှၤဘှီတၢ်လိာ်ကွဲတဂၤအံၤ ပာ်လီၤအသးလၢ တၢ်လိာ်ကွဲလၢအဝဲဘှီ တခါအံၤ ကဟ့ၣ်ဖိသၣ် အဝဲအံၤ န့ၣ်လီၤ. ဒီးအဝဲစံးဘၣ်ပိာ်မုၣ်န့ၣ်, “နအိၣ်ခိးစှၤသီ မ့ၢ်သ့ယဘှီ တၢ်လိာ်ကွဲအံၤ ကဝံၤကီးလီၤ.”
ဖဲအဝဲကွၢ်လီၤအတၢ်ဂီၤဖိတဒုအံၤန့ၣ် စံးဝဲ, “ဖဲဖိသၣ် အဆါတဂၤအံၤ ထံၣ်ဘၣ်နစံၣ်, နဂဲၤကလံၣ် ဒီးဖျး လီၤနခိၣ်န့ၣ်, အဝဲကသးဖှံထီၣ်လီၤ.”
တၢ်ဂီၤဖိတဒုအံၤ ဘူးကဝံၤလံ, အမဲာ်ဖိ တဘ့ၣ်ဖဲ တၢ်ဘှီအီၤဝံၤ တဘျီဃီ ဖျါလီၤနံၤ ဒိၣ်မးဒီး လီၤဂာ် လၢအသ့ၣ်ညါ လီၤအသးလၢ အဘၣ်မၤလီၤနံၤတၢ်န့ၣ်လီၤ.
လၢစှၤသီအတီၢ်ပူၤ ခရံာ်အိၣ်ဖျဲၣ် အဆၢကတီၢ်ကတုၤဃီၤ လီၤ. ပှၤခူဖိဝ့ၢ်ဖိတဖၣ် အိၣ်ကတဲာ်ကတီၤ အဟံၣ်အဃီ, ကတဲာ်ကတီၤပာ်စၢၤ တၢ်အီၣ်တၢ်အီ နၢမူနၢဆှီတဘီလီၤ. ဖိဒံဖိသၣ် တဖၣ် တအဲၣ်ဒိး ဟးထီၣ် လၢဖၣ်ကပူၤအချၢဘၣ်န့ၣ် တလီၤကမၢကမၣ်ဘၣ်.
အဝဲဖဲအဘှီတၢ်ဂီၤတဒုအံၤအခါ ဘၣ်တၢ်မၤတံာ်တာ်အီၤ ခဲအံၤခဲအံၤ လၢပှၤဟဲပှ့ၤတၢ်ဖိတဖၣ် န့ၣ် ဒီး အဝဲဘၣ်ယိၣ်ဝဲထဲ ဘှီဝဲတဝံၤ ဘၣ်ဖုး တချုးခရံာ်အိၣ်ဖျဲၣ် န့ၣ်လီၤ. ဘၣ်ဆၣ်ကျဲးစၢးဝဲသပှၢ်ပှၢ်ဒီး လၢခံ အတၢ်ဝံၤဝဲလီၤ. အဝဲဒုးကၤထီၣ်ဝဲဆ့ကၤ ခိးအဝါ, ဒုးဒိးထီၣ်ဝဲအခီၣ် ဖံးအဂီၤ ဒီးဒုး ဖျီၣ်ဝဲ အခိၣ်သလုးလါအဲးဖိ န့ၣ်လီၤ. အမဲာ်ခီ ဝါဒီး အကိာ်ပူၤခီ ဖူဂီၤဝဲလဲၢ်န့ၢ် အပိာ်ပူၤဒ်သိး ကဖျါလၢ အနံၤအကိာ်ပူၤဖးလဲၢ် န့ၣ်လီၤ. အဝဲထီထီၣ်ဝဲ ထးကဝီၤလၢအချးထီၣ်တၢ် spring လၢအလိၤဒ်သိး ဂဲၤကလံာ်ကသ့ ဒီးကမၤ သးဒ် အသးသမူအိၣ်ဒီး ဖဲပှၤဝံာ် ထီၣ်အီၤ န့ၣ်အဝဲ ကွံာ်တရံးအသးန့ၣ်လီၤ. ဖဲအဂဲၤကလံၣ်အခါ နကွၢ်ဖျါဒ်အနံၤ အါန့ၢ်အလီၢ်ဒီး အမဲာ်ချံ ဖျါလၢ အကြတ့ၣ်ကြတိၣ် ဒိၣ်န့ၢ်အလီၢ်န့ၣ်လီၤ. ထဲနကွၢ် အမဲာ်ဧိၤ န့ၣ် တၢ်မိၣ်နံၤနသး န့ၣ်လီၤ.
တချုးခရံာ်အိၣ်ဖျဲၣ် အမုၢ်နံၤဘၣ်ဒံးတနံၤန့ၣ်, အဝဲပာ်ထီၣ် အတၢ်ဂီၤ clown ဖိတဒုအံၤ လၢတၢ်ပတီၢ် ဖးထီ တခါအလိၤ ဝံၤစံၣ်လီၤလဲၤ တၢ်ဒ်သိး ကလဲၤဟ့ၣ်လီၤ က့ၤတၢ်လိာ်ကွဲလၢ ပှၤမၢအဘှီဝဲတဖၣ် န့ၣ်လီၤ. အဝဲတဲဘၣ် ပိာ်မုၣ် လၢအကွၢ်န့ၣ် အဟံၣ်တဂၤလၢ အဝဲဟးကယံာ် တနၣ်ရံၣ်န့ၣ်လီၤ.
အဝဲဟးထီၣ်ဝံၤ တယံာ်ဘၣ်, လ့ၣ်ကဟၣ် တဆိဟဲအိၣ် ကတီၢ်လၢအဟံၣ်မဲာ်ညါ ဒီး ပှၤပိာ်ခွါဖးဒိၣ် တဂၤ စံၣ်လီၤလၢလ့ၣ် ကဟၣ်ပူၤဃုာ်ဒီး ပိာ်ခွါဖိသၣ် တဂၤန့ၣ်လီၤ. အဝဲသ့ၣ် လဲၤနုာ်လီၤဆူ ပှၤဆါတၢ်လိာ်ကွဲ အလီၢ်ဒီးစံးဘၣ်ပိာ်မုၣ် တဂၤန့ၣ်, “ပအဲၣ်ဒိးပှ့ၤတၢ်လိာ်ကွဲလီၤ.”
“ပှၤဘှီတၢ်လိာ်ကွဲ အကစၢ်စံၣ်လီၤဟး မုကၢာ်လီၤ. ဘၣ်ဆၣ် အတၢ်လိာ်ကွဲတရၢ မၤနီၣ်ဝဲအပှ့ၤ လၢအလိၤ အဃိယဆါန့ၢ်သုသ့ကစီဒီလီၤ.” ပိာ်မုၣ် စံးအဝဲသ့ၣ် ပှ့ၤမးတၢ်လိာ်ကွဲ တရၢတခါဘၣ် တခါ တုၤလၢ တၢ်ပတီၢ်လိၤ တၢ်လိာ်ကွဲတရၢလၢာ်ခဲလၢာ်န့ၣ်လီၤ. ပိာ်မုၣ် အံၤဆိကမိၣ်ထီၣ် စ့ကန့ၢ်အါမး လၢအဆါ တၢ်လိာ်ကွဲတဖၣ် အဃိဒီး အသးခုဒိၣ်မးလီၤ.
ပိာ်ခွါသးပှၢ်န့ၣ်စံး, “ယဆိမိၣ် ယကပှ့ၤ တၢ်ထဲအံၤကီး လီၤ.” ဘၣ်ဆၣ် ပိာ်ခွါဖိတခီ ဟီၣ်ဒီးယူာ်ထီၣ်အစု ဆူတၢ်ပတီၢ်အထီကတၢၢ်လၢ crown ဖိတဒု အိၣ်အလီၢ်ဒီး စံးဝဲ, “ယကဘၣ်မၤန့ၢ် တၢ်လိာ်ကွဲအဝဲန့ၣ် သပှၢ်ကတၢၢ်လီၤ.”
ပိာ်မုၣ်တဂၤအံၤ ပှၤဘှီတၢ်လိာ်ကွဲတတဲဘၣ်အီၤ လၢချီဖိ တဒုအဂ့ၢ်နီတမံၤဘၣ်အဃိ အဝဲတသ့ၣ်ညါ တၢ်နီတမံၤဘၣ်. လၢတၢ်န့ၣ်အဃိ ဖဲဖိသၣ် တဂၤစံးလၢ သါအဲၣ်ဒိးန့ၣ်, အဝဲလဲၤထီၣ် ဝဲလၢလီၢ်ဆ့ၣ်နီၤ ဖးထီ တဖျၢၣ်အခိၣ် အလိၤဒီးဟံးလီၤ ဝဲတၢ်ဂီၤဖိန့ၣ်လီၤ. အဝဲတထံၣ်ပှၤကွဲး လီၤအပှ့ၤ လၢအလိၤ နီတမံၤ ဘၣ်ဒီး ဃၣ်ဝဲဆူ အံၤဆူနုၤ ဘၣ်ဆၣ် တထံၣ်တၢ်နီတမံၤဘၣ် န့ၣ်လီၤ. လၢခံအဝဲဆိကမိၣ်ဝဲလၢ တၢ်လိာ် ကွဲတဒုအံၤ မ့ၢ်တၢ်လိာ်ကွဲ အဂ့ၤကတၢၢ် လၢပှၤဘှီ တၢ်တဂၤဘှီအဃိ, ကၢကီၣ်မး ထူကဘျၣ်တဘ့ၣ် ကစီဒီလီၤ. အဝဲဟ့ၣ် ဃီၤဖိသၣ်ဒီး ဃ့ဝဲ အပှ့ၤလၢ ထူကဘျၣ် တဘ့ၣ်န့ၣ်လီၤ.
သပှၢ်ကတၢၢ် တၢ်လိာ်ကွဲချီဖိ တဒုအံၤ အတၢ်နံၤကမှံ စၢ်လီၤဝဲန့ၣ်လီၤ. တၢ်အံၤမီၣ်, ပှၤဘှီတၢ်လိာ်ကွဲ မ့ၢ်ဟဲက့ၤ ကၣ်နၤခဲအံၤမီၣ်.
ဘၣ်ဆၣ် အဝဲဟဲက့ၤ တတုၤဘၣ် ဒီး ချီဖိ ဘၣ်တၢ်ဘိၣ်ထီၣ် အီၤဃုာ်ဒီး တၢ်လိာ်ကွဲ အဂၤတဖၣ် န့ၣ်လီၤ. ပှၤပိာ်ခွါသးပှၢ် အံၤဟ့ၣ်တၢ်ယူးယီၣ် ဆူပိာ်မုၣ် တဂၤအံၤဝံၤ ဟးထီၣ်ကွံာ်လၢ ဒၢးပူၤ ဒီး က့ၤဒိး ထီၣ်အလ့ၣ် ကဟၣ်န့ၣ်လီၤ. တၢ်ကမၢကမၣ်လီၤဘၣ် ပိာ်မုၣ်တဂၤအံၤ လၢ တထံၣ်ဘူပှၤထူးပှၤတီၤ ဒ်အံၤသိး နီတဘျီ ဘၣ်အဃိန့ၣ်လီၤ.
ဖဲပှၤဘှီတၢ်လိာ်ကွဲဟဲက့ၤ တုၤန့ၣ်, ပှၤပိာ်မုၣ် တဂၤအံၤ ဒုးနဲၣ်အီၤ လၢထူကဘျၣ်တဘ့ၣ် ဒီးစံးအီၤလၢ အဆါကွံာ် ချီဖိ တဒုန့ၣ်လီၤ.
အဝဲနၢ်ဟူတၢ်ဆါကွံာ် ချီဖိ တဘီ မၤမးအသးဒ် အဘၣ် တၢ်ဒုးကဲထီၣ် အီၤလၢ လၢၢ်အသိး ဒီး ကိးထီၣ် ဝဲ, “နစံးနဆါကွံာ် ချီဖိမ့ၢ်ဧါ.”
အဝဲကွၢ်ထီၣ်ဆူ တၢ်ပတီၢ်ဖးထီလိၤတထံၣ် ဘၣ်စဲဃဲၤ ချီဖိ တဒုန့ၣ်ဘၣ်. အသးဟးဂီၤ ဒိၣ်မး မ့ၢ်လၢ တၢ်ဆၢကတီၢ်လၢကဘှီကဒီး ဝဲအသီတဒု တအိၣ်လၢၤဘၣ်အဃိန့ၣ်လီၤ. ဘၣ်ဆၣ် အဝဲအသူၣ်ဂ့ၤသးဝါ ဒီး တပာ်တၢ်ကမၣ် လၢပိာ်မုၣ် တဂၤ အလိၤဘၣ်. မ့ၢ်လၢပိာ်မုၣ် တသ့ၣ်ညါ အတၢ်ခူသူၣ် အံၤဘၣ်အဃိ ဆါဘၣ်ဝဲလီၤ. ဖိသၣ်အဆါတဂၤ အံၤတန့ၢ် ဘၣ်လၢၤ ချီဖိ တဒုအံၤဘၣ်. မ့မ့ၢ်ဖိသၣ် အထူးတီၤ လၢအတၢ် လိာ်ကွဲ အိၣ်အါအါဂီၢ်ဂီၢ်တဂၤ ကန့ၢ်ဘၣ်ဝဲဒီး ကလိာ်ကွဲဝဲ တစိၢ်တလီၢ် ဒီးကစူးကွံာ်ဝဲန့ၣ်လီၤ. ဖဲအဝဲဆိ ကမိၣ် တၢ်အံၤန့ၣ် အသးဘၣ်ဒိဆါဒိၣ်မး န့ၣ်လီၤ.
ဒၢလွဲဖိသီၣ်ဒီး ပိာ်မုၣ် လၢတၢးဖီခိၣ် တဂၤဟဲနုာ်လီၤဝဲန့ၣ်လီၤ. ပှၤဘှီတၢ်လိာ်ကွဲကွၢ်ဃီၤပိာ်မုၣ် ပှဲၤဒီး တၢ်သးအုး ဒီးစံးဘၣ်အီၤ, “ယသးအုးဒိၣ်မးလီၤ. ဖဲယတအိၣ်လၢဟံၣ်အခါ ပှၤဆါကမၣ်ဘၣ် တၢ်လိာ်ကွဲ ချီဖိ လၢယသါဟ့ၣ်နဖိခွါ န့ၣ်လီၤ.” ကတိၤတၢ်အခါ သ့ၣ်နီၣ်အသးလၢ အဘှီထွံၣ်ဖိ အဂီၤအိၣ်တခါလၢ တသးလီဝဲဘၣ်န့ၣ်လီၤ. အဝဲဆိကမိၣ်ဝဲ မ့ၢ်ဟ့ၣ်လီၤဖိသၣ် တဂၤလၢ ထွံၣ်ဖိတဒုအံၤ ကဂ့ၤန့ၢ် အတဟ့ၣ်တၢ် နီတမံၤတက့ၢ်န့ၣ်လီၤ. အဝဲဟ့ၣ်ဃီၤပိာ်မုၣ်အံၤလၢ ထွံၣ်ဖိအဂီၤတဒု အံၤဒီးစံး, “အအံၤ က့ၤစိာ်ထွံာ်ဖိ အံၤ, မ့ၢ်တၢ်ဟ့ၣ်လၢ အတဂ့ၤထဲသိး ချီဖိ လၢယသါဟ့ၣ်နဖိခွါန့ၣ်ဘၣ်, ဒိးအိၣ်ခိး, အဝဲဟံးလီၤအတိၢ် တဘူဒီး ထုးလီၤထူကဘျၣ် ဒီးဟ့ၣ်လီၤပိာ်မုၣ် ဒီးစံး, “က့ၤစိာ်တၢ်အံၤ, မ့ၢ်တၢ်ဟ့ၣ် အဂ့ၤကတၢၢ်လၢ ယဟ့ၣ်သ့ န့ၣ်လီၤ.”
ပိာ်မုၣ် စိာ်ထီၣ်ထွံၣ်ဖိ အဂီၤ ဒီးထူကဘျၣ် ပှဲၤဒီး တၢ်သးခု ဘူးကဟီၣ်ဘၣ်အသး တခီန့ၣ်လီၤ. ဝံၤဒီး စံးဘၣ် ပှၤဘှီ တၢ်လိာ်ကွဲန့ၣ် “ယဆၢလၢ ခရံာ်အိၣ်ဖျဲၣ် တၢ်သးခု ကတုၤအိၣ်နၤ အါအါလီၤ. နမၤမ့ၢ်ချုး ခဲမဆ့ၣ် ဟဲဆူယဒၢး, ယကဒုးအီၣ်နၤ ခရံာ်အိၣ်ဖျဲၣ် အကိၣ်ဖူဒ့ၣ် လီၤ.”
ဘၣ်ဆၣ် ပှၤဘှီ တၢ်လိာ်ကွဲတဂၤအံၤ တလဲၤဆူ ပိာ်မုၣ်အဒၢးနီတဘျီဘၣ်. ဘၣ်မနုၤလဲၣ်န့ၣ် အဝဲမ့ၢ်ထံၣ် ဖိသၣ်န့ၣ် ကသ့ၣ်နီၣ်ထီၣ်က့ၤ ချီဖိ လၢအဝဲဘှီ န့ၢ်အီၤလၢ အတုၤဆူ ပှၤဂၤအစု ပူၤဒီး တၢ်အံၤ အဝဲတူၢ် တပှဲၤဘၣ်န့ၣ်လီၤ. လၢတၢ်န့ၣ်အဃိ, မုၢ်နံၤမုၢ်သီ ဒီးလါတဖၣ် လဲၤပူၤကွံာ် ဒၣ်ဒ်န့ၣ်လီၤ.
တနံၤတခီၣ် ဖဲပှၤဘှီ တၢ်လိာ်ကွဲတဂၤအံၤ ခွဲသိၣ်ခွဲပျီ အဟံၣ်မဲာ်ညါ အခါ နၢ်ဟူပှၤကိးသီၣ်လၢ တၢ်ဖီခိၣ် ဝံၤ တၢ်လီၤတဲာ် သီၣ်ချဲးချဲးချီးချီး ဒီးထံၣ်ဘၣ် ဝဲလၢ တၢ်ဂီၤဖိတဒု လီၤတဲာ် လၢအခီၣ်ထံးန့ၣ်လီၤ. အဝဲကွၢ် လီၤတံၢ် ဝဲဒီး ကမၢကမၣ် ဒိၣ်ဒိၣ် ကလဲာ်ဒီးစံးဝဲ, “အါ, တၢ်အံၤမ့ၢ် ဒၣ်ချီဖိ တဒုလၢ ယဘှီန့ၣ်လီၤ.” အဝဲထၢထီၣ် ဝဲဒီး ဖီၣ်ဝဲကယီကယီ ဒ်အမ့ၢ်ဖိသၣ်လၢ အအဲၣ်ဝဲဒိၣ် မးတဂၤန့ၣ်လီၤ. ဖဲန့ၣ် အဝဲနၢ်ဟူ ပှၤကိး လၢတၢ်ဖီခိၣ်, “ဟ့, ဟ့, တၢ်ဂီၤဖိန့ၣ် ယတၢ်လီၤ. ယတၢ်လီၤတဲာ်လၢပဲြတီပူၤ လီၤ. ဝံသးစူၤ ဟဲစိာ်ထီၣ် န့ၢ်ယၤတဘီမီၣ်.”
အဝဲလဲၤဃ့ၢ်ထီၣ်ဃီချ့ချ့ န့ၣ်လီၤ. ဖဲအထီၣ်ဃီအခါ စံးဝဲလၢအသးပူၤ, “မ့ၢ်ချီဖိ တဒုဟဲတုၤလၢ ဖိသၣ် တဂၤအအိၣ်ဒ်လဲၣ်ခီလဲၣ်. ဒီးဖဲ အဝဲလဲၤထီၣ်တုၤ ဒီးအိးထီၣ်ြတဲၤန့ၣ်, ထံၣ်ဝဲ ဖိသၣ်ဆၢထၢၣ်ဒီး အမဲာ်ထံ ပှဲၤအမဲာ်ပူၤ ဒီးအဝဲဟ့ၣ်ဃီၤ အတၢ်လိာ်ကွဲ ဒီးဖိသၣ်ဟံးက့ၤ အတၢ်လိာ်ကွဲလီၤ. အဝဲထံၣ်ဝဲလၢ ဖိသၣ် အကပၤ လၢသ့ၣ်ဘၣ်ခိၣ်န့ၣ် တံာ်လာ်နီၣ်ထိးဘိ လၢပှၤဟးတသ့အဂီၢ်တခါ တၢ်သးပ့ၤနီၣ်ကွံာ်အီၤ န့ၣ်လီၤ. အန့ၣ်ဒီး အဝဲသ့ၣ်ညါလၢ အဝဲမ့ၢ် ဖိသၣ်လၢ အဝဲဘှီန့ၢ် အတၢ်လိာ်ကွဲ န့ၣ်လီၤ.
တၢ်လိာ်ကွဲ တခါအံၤလီၤတဲာ် ဘၣ်ဆၣ်တဟးဂီၤဘၣ်. ပှၤတဂၤအံၤ စံၢ်ဝဲ အထးချး ပတ့ၤအသး ဒီး တၢ်လိာ်ကွဲဖိတဒုအံၤ ဂဲၤကလံၣ် ဒီးကၠိထိဒီး မၤဝးတယဲးတယီး ထီၣ်အခိၣ် ဒီးမၤလီၤနံၤသး အမၠိမၠိ န့ၣ်လီၤ. ဖိသၣ်တဂၤအံၤ တုၤမ့ၢ်အထံၣ်ဝဲဒီး နံၤထီၣ်မး ဝဲလၢတၢ်ဟီၣ်တၢ်ယၢၤ အပူၤန့ၣ်လီၤ. လၢခံသံကွၢ်ဝဲ, “နသ့ၣ်ညါ လၢအအိၣ်ဒီး အစြပ့ဒ်လဲၣ်. မ့မ့ၢ်ယဲယမၤန့ၢ် တၢ်ဂီၤအံၤ တဘျုးနံၤမး ယထံၣ်အထး ချးပတ့ၤ တၢ်လီၤ.”
ပှၤတဂၤအံၤစံးဆၢအီၤ, “တၢ်ခီ ပှၤလၢအဘှီ တၢ်မ့ၢ်ဒၣ်ယၤန့ၣ်မီၣ်, ယဘှီဒၣ်လၢနဂီၢ် ဘၣ်ဆၣ် ပှၤအဂၤ တဂၤ မၤန့ၢ်လၢ တၢ်လဲၤကမၣ်အသးအဃိလီၤ. ခဲအံၤ ခီဟဲက့ၤ တုၤလၢနအိၣ်ဒ်လဲၣ်.”
“အိ” ပိာ်ခွါဖိစံး, “လၢခရံာ်အိၣ်ဖျဲၣ်အနံၤ ပအိၣ်ဒၣ်ဒီဖိမိၢ်ခံဂၤလီၤ. ယနၢ်ဟူပှၤခီၣ်သီၣ် ဒီးဟဲဒိတကျိာ် ပဲြတီ ဒီးဖဲ ယမိမိၢ် လဲၤအိးထီၣ်ြတဲၤဖိဒီး ထံၣ်ဘၣ်ဖိသၣ် တဂၤဒီး သးပှၢ် တဂၤ လၢအကူအသိး ဂ့ၤဂ့ၤ ခံဂၤ ဟဲနုာ်လီၤ စိာ်ဒီး တီၣ်တဖျၢၣ် လၢအပူၤပှဲၤဒီး တဃ့ၣ်သၣ်, တၢ်ဆၢ, အဲးပၢၣ်သၣ် ဒီးလၢ တၢ်တဖၣ်အံၤ အခၢၣ်သး အိၣ်ဒီး ချီဖိတဒု အံၤန့ၣ်လီၤ. ယမိၢ်တဲဝဲလၢ ပှၤသးပှၢ်ဒီး ပှၤဖိသၣ်ခံဂၤအံၤ လၢခရံာ်အိၣ်ဖျဲၣ် အနံၤ ဟဲဒိးအလ့ၣ်ကဟၣ် အဃံအလၤတဆိအံၤဒီး ဟးဟ့ၣ် ဖိသၣ် အဖှီၣ်အယာ်တဖၣ် လၢတၢ်လိာ်ကွဲ တဖၣ်န့ၣ်လီၤ. စးထီၣ်လၢ ယန့ၢ်ဘၣ် တၢ်ဂီၤဖိတဒုအံၤန့ၣ် ယအိၣ်ဆူၣ်ထီၣ်က့ၤ ကွ့ၢ်ကွ့ၢ် လီၤ. မိၢ်တဲလၢ ထူကဘျၣ်တဘ့ၣ်အံၤအဃိ, မ့မ့ၢ်ယဲ ယစံးလၢ တၢ်ဂီၤဖိ ချီ clown တဂၤအံၤအဃိန့ၣ်လီၤ. တဘျီလၢ်လၢ်ဖဲ အစံၣ်တရံးအသးဒီး ဂဲၤကလံၣ်န့ၣ် ယဲတၢ်မိၣ်မၤဒိး ယသးအီၤလီၤ. ခဲမဆ့ၣ် ယကစးထီၣ် ဟးလၢ ယခီၣ် ဒၣ်ယဲ အခီၣ်ထံးကတၢၢ် တဘျီန့ၣ်လီၤ.”
သးပှၢ်တဂၤအံၤ ဖဲအနၢ်ဟူ ဖိသၣ်စံးတၢ်အံၤန့ၣ် အမဲာ်ထံယွၤလီၤမးလၢ အဘိးပၤလိၤန့ၣ်လီၤ. တၢ်မၤအသးဒီးအီၤ ဒ်အဝဲတသးခုဒိၣ်ထဲအံၤ သိးနီတဘျီ ဘၣ်န့ၣ်လီၤ. ဒီးဖဲအဝဲ သကူးလီၤအသးဒီး နၢမူ ဖိသၣ် အဘိးပၤအခါန့ၣ်, ချီဖိ တဒုန့ၣ် စံၣ်ထီၣ်ဒီး တရံးအသးလၢ တၢ်ဖးဖီ သတူၢ်ကလာ် ဒီးအဝဲသ့ၣ် ခံဂၤလိာ် နံၤထီၣ်သကိးဝဲန့ၣ်လီၤ.
