လူၤ ၁၀း၄၀, ကစၢ်ဧၢ, ယမၤတၢ်တဂၤဃီ ဒီးယဒီပုၢ်ဝဲၢ်မုၣ် အိၣ်ဒၣ်အတၢ်န့ၣ် နတပာ်ဘၣ်လၢ တၢ်နီတမံၤဘၣ်ဧါ.
ပသးတမုာ်တမံဖဲ ပှၤတဂ့ၤ လၢပဖီခိၣ်ဘၣ်, တကနၣ်ဃုာ်ပှၤဘၣ်, တဂၤစၢၤပှၤဘၣ်, တတီလၢ ပဖီခိၣ်ဘၣ်, ဒီး ပာ်ဖျါထီၣ်လၢ တၢ်ကတိၤမ့ၢ်ဂ့ၤ, တၢ်မၤမ့ၢ်ဂ့ၤ လၢအမ့ၢ် ပှၤလၢအသးအိၣ်ပှၤ ဘၣ်န့ၣ်လီၤ. အဒိဂ့ၤ မ့ၢ်ဝဲ တနံၤအံၤ အတၢ်ကလုၢ်ထူ န့ၣ်လီၤ. နီၢ်မၤသၣ် အသးတမုာ် ဘၣ်မ့ၢ်လၢ နီၢ်မၤရံ တမၤစၢၤ အီၤလၢ တၢ်တူၢ်လိာ်ခရံာ်တဘျီအံၤ အဃိန့ၣ်လီၤ. တၢ်သးတမုာ်ဒ်အံၤ မ့ၢ်ဒၢသအၢအသးလၢ ပပူၤမ့ၢ်ယံာ်ထီၣ် ဒီးကဲထီၣ် တၢ်လၢအမၤဘၣ်ဒိ ပတၢ်ဆိကမိၣ် လၢအကဆှီတဖၣ်န့ၣ်လီၤ. ဒိၣ်ထီၣ်အါထီၣ်ဝဲဆူ တၢ်သးထီၣ်, တၢ်သးအ့န့, တၢ်ကဒူးကဒ့ၣ်, ဒီးတၢ်သးသဟီၣ်လၢ အဖုၣ်မး န့ၣ်လီၤ. စးထီၣ်အသးညီနုၢ် လၢတၢ်ဆံးကိာ်ဖိလီၤ. လဲၢ်ထီၣ် အါထီၣ်ဝဲ ကွ့ၢ်ကွ့ၢ် ဖဲပမ့ၢ် တဘှီဆိက့ၤအီၤ ဘၣ်န့ၣ်လီၤ. တၢ်ဂ့ၤလၢ ပမၤဘၣ် ပှၤဂၤ မ့ၢ်တဘၣ် တၢ်ပာ်လုၢ်ပာ်ပှ့ၤအီၤ မ့ၢ်ဂ့ၤ, မ့ၢ်တဘၣ်တၢ်ပာ်ဖျါ ထီၣ်တၢ်စံးဘျုးက့ၤပှၤ မ့ၢ်ဂ့ၤ န့ၣ် မ့ၢ်တၢ်လၢ အမၤတမုာ် ပသးန့ၣ်လီၤ.
နီၢ်မၤသၣ် မၤတၢ်အံၤမ့ၢ် တၢ်လၢ အဘၣ်လီၤ. မ့ၢ်ပာ်တၢ်လၢအသးပူၤ ဒီးတပာ်ဖျါထီၣ်န့ၢ် ခရံာ်ဘၣ်ဒီး, ကတၢၤတအၢၣ်ဃာ် အသးလၢ အပူၤဒီး ကပိၢ်ဖးဝဲတဘျီ ဒီး ကမ့ၢ်တၢ်လၢအကဲၤကပျီၤ ထီၣ်ဝဲလီၤ. ဘၣ်ဆၣ် တဲဘၣ်ခရံာ်ဒီး ခရံာ်ဒုးသ့ၣ်ညါ က့ၤအီၤဒီး သ့ၣ်ညါက့ၤဝဲလၢ အမ့ၢ် တၢ်လၢအဘၣ်ဒီး တူၢ်လိာ်ဝဲ လီၤ. မ့ၢ်တၢ်လၢ အမၤကပုာ်လီၤအသးဒီး အသးမုာ်က့ၤဝဲလၢ နီၢ်မၤရံအဖီခိၣ် လီၤ. အဂၤတမံၤကဒီးန့ၣ်, သ့ၣ်ညါ ဝဲလၢ ခရံာ်တပာ်ဒိၣ် တၢ်အီၣ်ဖဲ အဝဲဟဲအိၣ်သကိးအီၤ တဘျီလၢ်လၢ်န့ၣ်ဘၣ်. ခရံာ်ပာ်ဒိၣ် တၢ်လၢသူၣ် လၢသးဒီး အဲၣ်ဒိး ကတိၤသကိး တၢ်လၢ အဘၣ်ဃးထူ ကလုၢ်ယွၤကထါ ဒီး တၢ်အဲၣ်ပှၤလၢ ပဃၢၤ ဒီး တၢ်မၤစၢၤပှၤဂၤန့ၣ်လီၤ. ဖဲပအိၣ်ဒီး တၢ်သးတမုာ်, တၢ်ပာ်တၢ်ကမၣ်လၢ ပှၤဂၤအလိၤ န့ၣ်, ပဘၣ်ကွၢ်လိ နီၢ်မၤသၣ်, ပာ်ဖျါထီၣ်ပတၢ် ဂ့ၢ်လၢ ပှၤလၢပနာ်န့ၢ်အီၤသ့ န့ၣ်လီၤ.
