မးသဲ ၁၁း၂၈, ပှၤလၢတၢ်ဘှံးအသးဒီး ဝံတၢ်ယိးတၢ်ဃၢခဲလၢာ် သ့ၣ်သုဧၢ, ဟဲဆူယအိၣ်တက့ၢ်ဒီး ယကဒုးအိၣ်ဘှံးသုလီၤ.
လၢနိၣ်ဖးဒိၣ်တနိၣ်အပူၤ ကီးအိၣ်ဝဲတဖျၢၣ် ဒီးလၢကီးအံၤ အခိၣ်ပှၤအိၣ်ဝဲတဂၤလီၤ. ပှၤအံၤ အဲၣ်ဒိးလဲၤဟးလၢ ပှၤသဝီဖိ တဖၣ်အကျါ ဒီးလဲၤဝဲ တသ့ဘၣ်. ပှၤသဝီဖိ အကျါတဂၤ ဟဲဆူအအိၣ်လၢ အကဘီဖိ အပူၤဒီး တုၤအသ့ၣ်ညါဝဲလၢ ပှၤအံၤ အဲၣ်ဒိးလဲၤဟးလၢ ခိဒီး တဲအီၤလၢ အကဆှၢအီၤဆူ ခိလီၤ. ပှၤကီးဖိ အံၤတဲအီၤ လၢအကဘီဖိ အံၤ ဂ့ၤဒီး ကျၢၤဝဲဒီး မ့ၢ်ဒိးကဘီအံၤ ကတုၤလၢခိလီၤ. ဘၣ်ဆၣ် ပှၤတဂၤအံၤ တထီၣ်ဒိး ကဘီဘၣ်အဃိ တတုၤလၢခိဘၣ်. ပှၤကဘီဖိ သါကက့ၤမး အဝဲဂဲၤဂီၤထီၣ်အသးဒီး ထီၣ်ဒိးကဘီလီၤ. မ့ၢ်လၢ အမၤထွဲ ကဘီဖိအတၢ်တဲ အီၤအဃိ အဝဲလဲၤတုၤဝဲလီၤ.
ဖဲတၢ်မၢဖိတဖု မၤခဲၣ်ဖ့လၢ တၢ်ဘှီဂ့ၤထီၣ်က့ၤ ခရံာ်ဖိ တဖၣ်အတၢ်နာ်အဂီၢ်န့ၣ်, ပှၤမၤတၢ်ဖိအခိၣ် တဂၤအသးဘၣ်ထံးဝဲလၢ အတၢ်ဒဲးဘး အိၣ်ဝဲအဃိလီၤ. ဘၣ်ဆၣ် တၢ်သးမံ တအိၣ်ဒီး အီၤဘၣ်. တၢ်မၤအကစၢ်လၢ ပှၤမၤတၢ်ဖိအခိၣ် တဂၤအံၤ မၤတၢ်လၢ အဖီလာ်န့ၣ် မ့ၢ်ဝဲ ခရံာ်ဖိနီၢ်နီၢ်တဂၤ, ဒီးမ့ၢ်ပှၤလၢ အသးအိၣ်အပှၤခိၣ်တဂၤအံၤ လီၤ. အဲၣ်ဒိးဝဲလၢ ပှၤတဂၤအံၤ ကပာ်ဖျါထီၣ်တၢ်မၤ တမံၤမံၤ ဒ်သိး အသးကမံဝဲလၢ အတၢ်မၤအပူၤ, ဒီးတဘၣ်ကိၢ်ဘၣ်ဂီၤလၢ အသးသမူ အတၢ်အုၣ်က့ၤခီၣ်က့ၤ အဂီၢ်ဘၣ်န့ၣ်လီၤ. တၢ်မၤအကစၢ်အံၤ ကွဲးန့ၢ်အပှၤမၤတၢ်ဖိ အခိၣ် တဂၤအံၤအလံာ်, မၤလိာ်ဝဲလၢ အဟဲဆူ အဝဲၤဒၢးလၢ မုၢ်ဆ့ၣ်ထီၣ်ဂီၤခီ ၆ နၣ်ရံၣ်လီၤ. ၆ နၣ်ရံၣ်ဘၣ်ဒီး ပှၤအံၤလဲၤတုၤ ဝဲလၢတၢ်မၤအကစၢ် အဝဲၤဒၢး ဒ်တၢ်မၤလိာ်အီၤ အသိးလီၤ. တၢ်မၤအကစၢ်တဲအီၤ, ယထံၣ်လၢ နနာ် ယတၢ်ကတိၤ လၢယကွဲး န့ၣ်နၤလီၤ. တဲဆၢဝဲ ယနာ်အဃိ ယဟဲလီၤ. တၢ်မၤအကစၢ်တဲအီၤ, တၢ်ကွဲးအိၣ်ဒံးအအံၤတခါ လၢအဟဲလၢ ပှၤလၢ အတဲတၢ်မ့ၢ်တၢ်တီ တဂၤအအိၣ်လီၤ. ဒီးဟ့ၣ်အီၤ ခရံာ်အတၢ်မၤလိာ်လၢ မးသဲ ၁၁း၂၈ လၢအစံးဝဲ, “ပှၤလၢ တၢ်ဘှံးအသးဒီး ဝံတၢ်ယိးတၢ်ဃၢခဲလၢာ် သ့ၣ်သုဧၢ, ဟဲဆူယအိၣ်တက့ၢ် ဒီးယကဒုးအိၣ်ဘှံးသုလီၤ.” ယထံၣ်လၢ တၢ်ဂဲၤလိာ် အိၣ်လၢနသးပူၤလီၤ. ဘၣ်ဆၣ် တၢ်သးမံ တအိၣ်ဒီးနၤဘၣ်. မ့ၢ်လၢ နတမၤထွဲ တၢ်မၤလိာ်အံၤ အခံဘၣ်အဃိလီၤ. တၢ်မၢဖိအခိၣ်အံၤ အိၣ်ဘှ့ၣ်ဖးယံာ် ဒီးအမဲာ်ထံလီၤဝဲဒီးစံး, ယသ့ၣ်ညါလံ. ယဘၣ်နာ်ဒီး မၤထွဲခရံာ်အတၢ်မၤလိာ် အံၤ ဒ်ယနာ်ဒီး မၤထွဲ နတၢ်ကွဲး န့ၢ်ယလံာ် အသိးန့ၣ်လီၤ. နာ်ဝဲ, မၤထွဲဝဲ ဒီးအသးပူၤ ပှဲၤဒီး တၢ်သးမံလီၤ.
