စံး ၁၁၉း၆၇, ယတချုးဘၣ်ဒံး တၢ်နးတၢ်ဖှီၣ်ဒီး ယဟးဖျိးကျဲလီၤ. မ့မ့ၢ်ခဲကနံၣ်အံၤ ယတိၢ်န့ၢ်ဖံးဃာ် နကလုၢ်ကထါလီၤ.
အမဲရကၤအကီၢ်ခိၣ် ၁၆ ဂၤတဂၤ လၢအမ့ၢ် အၤြဘၤဟၣ် လ့ခၢၣ်, လၢအဘၣ်တၢ်ပာ်ကဲ အီၤဒ် ကီၢ်ခိၣ် အဒိၣ်ကတၢၢ်အကျါတဂၤ န့ၣ် အုၣ်အသးလၢ ယွၤအကလုၢ်ကထါ လံာ်စီဆှံ မ့ၢ်ဝဲယွၤ အတၢ်ဟ့ၣ် ဘျုးပှၤကညီ အဂ့ၤကတၢၢ်လီၤ. တၢ်အဂ့ၤခဲလၢာ် လၢအဟဲလၢ ခရံာ်အအိၣ်လၢ ပှၤဟီၣ်ခိၣ်ဖိ အဂီၢ် ဘၣ်တၢ်ဒုးနဲၣ် အီၤလၢ လံာ်စီဆှံ အပူၤလီၤ. မ့တမ့ၢ် လၢလံာ်အံၤ ဘၣ်န့ၣ် ပသ့ၣ်ညါ နီၤဖးတၢ် ဂ့ၤဒီး တၢ်အၢ တသ့ဘၣ်. အဝဲပာ်ဖျါထီၣ်ဒ်အံၤ မ့ၢ်လၢ အအဲၣ်လံာ်စီဆှံ အဃိလီၤ.
ဖိသၣ်ခၠါလ့ၣ် အမိၢ်ကိး ဃီၤအီၤဆူ အလီၢ်မံခိၣ်ဒီး ကတိၤတၢ်ဒီးအီၤဒ်အံၤ, ဖိခွါဧၢ, ကသံၣ်သရၣ်တဲယၤ လၢယမူယံာ်ယံာ် တသ့လၢၤဘၣ်. ယဟ့ၣ်န့ၢ်သါနၤ နၢ်န့ၢ်ဝဲထဲ လံာ်စီဆှံ တဘ့ၣ်အံၤ လီၤ. နဘၣ်အၢၣ်လီၤ ယၤလၢ နကဖးလံာ်စီဆှံအံၤ ကိးနံၤဒီးနာ်ခရံာ် လၢနသးဒီဖျၢၣ် န့ၣ်တက့ၢ်. ခၠါလ့ၣ် အၢၣ်လီၤအမိၢ်လီၤ. အမိၢ်မၤလိာ်အီၤ, တုၤယသံလံဒီး ပှၤလၢအကကွၢ်နၤတအိၣ်ဘၣ်. ဟံးလံာ်စီဆှံ အံၤဒီး လဲၤဆူ နဖါတံၢ်ဝ့ယလဲမ် အအိၣ်ဒီး သံကွၢ်အီၤ လၢမ့ၢ်အဒုးအိၣ်နၤ လၢအသကိး သ့စ့ၢ်ကီးဧါန့ၣ်တက့ၢ်.
တၢ်ခူၣ်လီၤ အမိၢ်ဝံၤစှၤသီဒီး, ခၠါလ့ၣ် လဲၤဝဲဆူ အဖါတံၢ်အအိၣ်လီၤ. ဖဲအအိၣ်ဘှံးဝဲလၢ ကျဲတီၤအခါ ထုးထီၣ်ဖးအလံာ် စီဆှံလီၤ. ပှၤထူးပှၤတီၤတဂၤ ထံၣ်အဖးလံာ်အံၤ ဒီး ပာ်တ့ၢ်အသိလ့ၣ်ဒီး ဟဲကတိၤတၢ်ဒီး အီၤလီၤ. သံကွၢ်အီၤ နဖးလံာ်မနုၤတဘ့ၣ်လဲၣ်. စံးဆၢဝဲ လံာ်စီဆှံ လီၤ. ပှၤထူးပှၤတီၤတဂၤစံးဝဲ, မ့ၢ်ဒၣ် ယလံာ်လီၤ ဆါန့ၢ်ယၤလၢ စ့တဒီလၣ်မီၣ်. ခၠါလ့ၣ်စံးဆၢဝဲ, ဟၢၣ်အၢ, တယအဲၣ်ဒိး ဆါအီၤဘၣ်. ပှၤသးပှၢ်အံၤ ဟ့ၣ်အါထီၣ်လံာ်အံၤအပှ့ၤ တစဲးဘၣ်တစဲး တုၤလၢ ၅ ဒီလၣ်လီၤ. ဖိသၣ်သ့ၣ်နီၣ် အမိၢ်အတၢ်မၤလိာ် အီၤဒီး လၢတၢ်မဲာ်ထံမဲာ်နိအပူၤ တဲဘၣ်အီၤ, နန့ၢ်ဘၣ်ယလံာ်စီဆှံ အံၤတသ့ဘၣ်. တချုးယမိၢ် သံဒံးဘၣ် မဟါ တနွံန့ၣ်, ယအၢၣ်လီၤအီၤလၢ ယတပာ်ဖး ယလံာ်စီဆှံဒီးယၤဘၣ်. ယတပာ်ကွံာ် အီၤဘၣ်. အပှ့ၤ မ့ၢ် န့ၢ် ၅၀၀ ဒီလၣ် သနာ်က့, ယတဆါဘၣ်.
ပှၤအံၤ အသးဘၣ်ထံးလၢ ဖိသၣ်အံၤ အတၢ်စံးဆၢ ဒီးတီၣ်ထီၣ်အီၤလၢ အသိလ့ၣ် အပူၤဒီး လဲၤနီၣ်ဆှၢ အီၤဆူ အဖါတံၢ်အအိၣ်လၢ ကစၢၢ်ကျါလီၤ. ဖဲအံၤ ပှၤထူးပှၤတီၤအံၤ သ့ၣ်ညါ ဘၣ်ဝဲ လၢအဖါတံၢ် ဝ့လယဲမ် တူၢ်လိာ် အီၤလၢအဟံၣ် တညီဘၣ် မ့ၢ်လၢ အကဘၣ်လုၢ်အီၣ် အဖိ ၆ ဂၤ, ဒီး တမ့ၢ် ပှၤတၢ်အိၣ်တၢ ယၢၤ တဂၤဘၣ်အဃိ အဝဲက့ၤကိးခၠါလ့ၣ် ဒီး ဒုးအိၣ်အီၤလၢ အဟံၣ်ဖးဒိၣ်အပူၤ, ဒီး လုၢ်ဖိက့ၤအီၤလီၤ. ဟ့ၣ်အီၤလၢ တၢ်မၤလိ လၢခရံာ်ဖိ တဖၣ် တၢ်သိၣ်လိအီၤဒီး ကဲထီၣ်ပှၤလုၢ်ဒိၣ်ပှ့ၤဒိၣ် တဂၤလၢ အတၢ်အိၣ်ဖှိၣ် အပူၤလီၤ. ခၠါလ့ၣ် တသးပ့ၤနီၣ် အတၢ်အၢၣ်လီၤ အမိၢ်လၢ အကဖး လံာ်စီဆှံ ကိးနံၤဒဲး န့ၣ်ဘၣ်.
