၂ တံၤ ၃း၁၆, ကယဲၢ်တၢ်ကွဲးခဲလၢာ်န့ၣ်, ကွဲးအသးလၢ ယွၤအသးစီဆှံ, ဂ့ၤလၢသိၣ်တၢ်သီတၢ် အဂီၢ်, လၢဃၣ်လိၤတၢ်အဂီၢ်, လၢသိၣ်လိနဲၣ်လိတၢ်လၢ တၢ်တီတၢ်လိၤအပူၤအဂီၢ်.
စီၤပီလူး အလံာ်ပရၢလၢအကွဲး န့ၢ်စီၤတံၤမသ့း အပူၤ တၢ်ကတိၤ, “တၢ်ကွဲးအသးခဲလၢာ်” န့ၣ်မ့ၢ်ဝဲ တၢ်သိၣ်တၢ်သီ လၢလံာ်စီဆှံ အပူၤန့ၣ်လီၤ. ပသ့ၣ်ညါ လၢလံာ်စီဆှံ မ့ၢ်လံာ်လၢ အလုၢ်ဒိၣ်ပှ့ၤဒိၣ် ကတၢၢ်တဘ့ၣ် ခီဖျိ လၢတၢ်ပှ့ၤအီၤ ဒီးဖးအီၤ အါကတၢၢ် လၢဟီၣ်ခိၣ်ချၢန့ၣ်လီၤ.
တမ့ၢ်ထဲ အပာ်ဖျါထီၣ် တၢ်စံၣ်စိၤတဲစိၤဘၣ်. တမ့ၢ်ထဲ အတဲပှၤ တၢ်ဃဲၤအက လုာ်ကလုာ်ဘၣ်. တမ့ၢ်ထဲ အအိၣ်ဒီး တၢ်ကတိၤအဃံအလၤ ဒီးအလုၢ်ဒိၣ်ပှ့ၤဒိၣ်တဖၣ်ဘၣ်. မ့ၢ်လံာ်လၢ အတဲပှၤတၢ် အဘၣ်ဒီး တၢ်အကမၣ်, တၢ်အဂ့ၤဒီး တၢ်အအၢ ဒီး တၢ်လၢပြကၢး မၤဒီး တၢ်လၢပတြကၢးမၤ အီၤတဖၣ်န့ၣ်လီၤ. မ့ၢ်ပဖးလံာ်စီဆှံ ကစီဒီဧါ.
ပှၤဆါလံာ်စီဆှံ တဂၤလဲၤဆူ ပိာ်မုၣ်သးပှၢ်တဂၤ အဟံၣ်ဒီး ထုးထီၣ်ပာ်ဖျါ လံာ်စီဆှံ အကလုာ်ကလုာ် လၢအကဆါဝဲ အဂီၢ်လီၤ. ပိာ်မုၣ်အံၤတဲအီၤ, နဟဲဆါ လံာ်စီဆှံ လၢယဟံၣ် ဘၣ်မနုၤလဲၣ်. နဆိကမိၣ် လၢယမ့ၢ် ပှၤသူခိၣ်ဖိဧါ. နဆိကမိၣ်လၢ ယလံာ်စီဆှံ တအိၣ်အဃိဧါ. အအံၤ ယကဒုးနဲၣ်နၤ ယလံာ်စီဆှံ ဒီးထုးထီၣ်ဝဲ လံာ်စီဆှံ ဖးဒိၣ်တဘ့ၣ် လၢအဘိၣ်ဃာ် ဝဲလၢစးခိ လၢအဂ့ၤ ကတၢၢ်ဒီး လၢအဖီခိၣ်ကဒီး တၢ်ကံးညာ် လုၢ်ဒိၣ်ပှ့ၤဒိၣ်န့ၣ်လီၤ. အိးထီၣ်ဝဲယၢ်ခီယၢ်ခီ ဒီးကိးထီၣ်ဝဲ, “အိယမဲာ်ထံကလၤ ဖးလံာ်တဘ့ၣ် အိၣ်ဒၣ်ဖဲအံၤ လီၤမးလဲၣ်. ယဃုလံအီၤ သၢနံၣ်လံ. ယထံၣ်က့ၤခဲအံၤလီၤ. ပှၤဆါလံာ်စီဆှံ တဂၤအံၤ တတဲအီၤ တၢ်နီတမံၤဘၣ်. သ့ၣ်ညါဝဲလၢ ပိာ်မုၣ်အံၤ တမ့ၢ်ပှၤဖးလံာ်စီဆှံ တဂၤဘၣ်. ဒီးအတၢ်သ့ၣ်ညါ လံာ်စီဆှံ အဂ့ၢ်ဒၣ်လဲာ် တအိၣ်ဘၣ်.
ပဝဲအါဂၤ ပတလီၤဆီဒီး ပိာ်မုၣ် တဂၤအံၤဘၣ်. ပဘိၣ်တံၢ်ဃာ် ပလံာ်စီဆှံ ဒီး ပာ်အီၤလၢ တလါပူၤ လီၤ. ပတအိးထီၣ် လံာ်စီဆှံ ဘၣ်ဒီး ပဘါယွၤ ကစုဒုလၢ သူၣ်ကံၢ်သးလဲ ကိးနံၤန့ၣ် သ့စ့ၢ်ကီးဧါ. ကမ့ၢ်ဒၣ် လၢပတဘါယွၤ ကစုဒု လၢသူၣ်ကံၢ် သးလဲ ကိးနံၤဒဲးဘၣ် တခီန့ၣ်လီၤ.
