ြဖၣ်သူဝါ ဟ့ၣ်လီၤစ့တကလီၢ် လၢကၠိအဂီၢ်လီၤ. မ့ၢ်လိၣ်သါ ကဟ့ၣ်ဒံး. စကီၤစီၤဝါ သါကဟ့ၣ်လီၤ သါဟီၣ်ခိၣ် ဖဲအလီၢ်အိၣ် ဒီး ဟ့ၣ်မၤစၢၤဃုာ် သ့ၣ်ဖဲ အလိၣ်န့ၣ်လီၤ.
သရၣ်ခ့ရ့ၣ် တဂၤ တ့ တၢ်သ့ဒီး တ့ထီၣ်ကၠိဒီး တၢ်ဘှီထီၣ်အလီၢ် အဂၤတဖၣ် အဂီၤ ဒ်သရၣ် တဖၣ်ဘၣ်အသး အသိးန့ၣ်လီၤ. သရၣ်တဖၣ် တမၤယံာ်မၤနီၢ်အသးဘၣ်. မၢြဖၣ်သူဝါ ငါထီၣ်ခီၣ်ြတဲးထၢၣ် တဂၤ လၢကမၤ တၢ်အံၤလၢာ်စ့ ခံကလး ထ့းကီၣ် န့ၣ်လီၤ. ြဖၣ်သူဝါ မၤလိာ် သးပှၢ်စ့းဟိၣ်, ယီၣ်စွါ အပၢ်လီၤ. စ့းဟိၣ် စံးဝဲကလၢာ် အါန့ၢ် ခံကလး, ဘၣ်ဆၣ် သါကတူၢ်လိာ် ခီၣ်ြတဲး အံၤထဲ တကလး ယဲၢ်ကထိလီၤ. သးပှၢ်အံၤ သးအိၣ် မၤစၢၤ တၢ်စ့ၢ်ကီး လီၤ. ဒီးစးထီၣ် မၤတၢ်လီၤ.
ကိးဂီၤ ကိးဟါဒဲး သရၣ်တဖၣ် သိၣ်လိသီလိ ပှၤစံာ်ဖးလဲၢ်ခရံာ်ဖိ တဖၣ်လၢ ကစၢ်ယွၤ အကလုၢ်ကထါ လီၤ. ခၠူ၀ၣ်, သရၣ်စီၤစ့, သရၣ်မုၣ်ဖဲထူ, ဒီး သရၣ်သးပှၢ် ဖိဂ့ၤတဖၣ် အိးထီၣ်တၢ်မၤလိ ပှၤကညီကျိာ်ဒီး ပှၤခဲလၢာ် စးထီၣ်မၤလိ ဘၣ်က့ၤ အကျိာ် ဒ်သရၣ်ဝံး ထုးထီၣ်န့ၢ် ပှၤကညီလၢ ကီၢ်ပယီၤ တခီအသိး န့ၣ်လီၤ.
တၢ်ထံၣ်စိ လၢကၠိအံၤ အဂီၢ်မ့ၢ်ဒ်အံၤ လီၤ. တၢ်သိၣ်လိ မိၢ်ပှၢ် မ့ၢ်လံာ်စီဆှံ, ဘၣ်ဆၣ် ကဒုးအိၣ်ထီၣ် တၢ်ခိၣ်တၢ်နၢ် တဖၣ်လၢ ကသ့လုၢ်အီၣ်ပှၤ ကစၢၢ်ခိၣ်ဖိ တဖၣ်လၢ ထူကလုၢ်ယွၤကထါ, ကသ့မၤစၢၤ စ့ၢ်ကီး အီၤလၢ တၢ်ဖံးအီၣ်မၤအီၣ် လၢနီၢ်ခိ တကပၤ, ကသ့သိၣ်လိ ဖိဒံဖိသၣ် တဖၣ်လၢ အကျိာ်ဒၣ်ဝဲ ဒ်သိး ဖးက့ၤ လံာ်စီဆှံ ဒီးလံာ်ဂုၤလံာ်ဂၤတဖၣ် ကသ့ဝဲ န့ၣ်လီၤ. ကၠိအံၤ ကတူၢ်လိာ် ပိာ်မုၣ်ဒီး ပိာ်ခွါ ကၠိဖိတုၤ အပှဲၤထီၣ် အဂၤယဲၢ်ဆံ လီၤ. တၢ်မုၢ်လၢ် ဝဲလၢ လွံၢ်နံၣ် တနံၣ် (တၢ်မၤလိယံာ်လွံၢ်နံၣ်) ပှၤကအိၣ် အစှၤကတၢၢ် ခံကယၤ န့ၣ်လီၤ. စီၤက့ၣ်ဟ့ၣ်ကူၣ် ဝဲလၢ သရၣ်စီၤစ့ ကကဲကၠိခိၣ်လီၤ. ဘၣ်ဆၣ် သရၣ်ဝါတဖၣ် မၢလၢ အဝဲကကဲ တခီလီၤ.
သရၣ်တဖၣ် အိၣ်လၢ ခံကတၢၢ် တနံၣ်ဖဲ စံာ်ဖးလဲၢ် န့ၣ်ထံၣ်ဘၣ် တၢ်ပာ်လီၤကၠိအံၤ အလၢၢ်ခၢၣ် သနၢၣ်, ဃ့ဘါထုကဖၣ် လၢကၠိအံၤ အဂီၢ်, ဒီးဒိး ပာ်စုန့ၢ် စီၤက့ၣ်တနံၤဃီလီၤ. အိၣ်ဖဲ စံာ်ဖးလဲၢ် ယံာ်ခံနွံဒီး မုာ်သးဘၣ်အီၤ ဒိၣ်မးလီၤ. တဟါန့ၣ် ပှၤမၤန့ၢ်အီၤ တၢ်လီၤဖး အခီစၢး လီၤ. သရၣ်တဖၣ် ဘၣ်လီၤဖးဒီး ဟီၣ်ဝဲ, ပျဲၢ်တဖၣ်စ့ၢ်ကီးလီၤ. မုၢ်ဆ့ၣ်ထီၣ် ဒီးအဝဲသ့ၣ် က့ၤလီၤဆူ ဘီကီာ်ဒီး ကက့ၤဆူ ဝ့ၢ်တကူၣ်လီၤ. သးပှၢ် စ့းဟိၣ် စံးဝဲ, တချုးတၢ်စူၤလီၤ အံၤ သါကဘှီကၠိဒီး ဟံၣ်လၢ ကၠိဖိဒီး သရၣ်တဖၣ် ကအိၣ်ဝဲ တုၤအဝံၤလီၤ. ငါန့ၢ် တရူးပှၤမၤတၢ်ဖိ အဂၤတကယၤညါလီၤ.
တဟါဃီန့ၣ် သးပှၢ် ဘူနး ဒီးဖိၣ်ဃဲဖိ ပိာ်ခွါ ယဲၢ်ဂၤ ဒီး ဃဲသဲမုၣ် လီၢ်လံၤ ယဲၢ်ဂၤ ဟဲပၢၢ်ထီၣ် ကါရၤကါရၤ လီၤ. စီၤက့ၣ်သးခု ဒီးကမၢကမၣ် မးလီၤ. သးပှၢ်ဘူနး တဂၤအံၤ အခိၣ်ဝါထီၣ်လံ. ဘၣ်ဆၣ် ယံာ်ထီၣ်ဒီး အမဲာ်သၣ်တခီ ဖျါလီၤဂာ်က့ၤ ဒီးဖိသၣ် န့ၣ်လီၤ.
စံးဘၣ်စီၤက့ၣ်, “စီၤက့ၣ်ဧၢ, ယနၢ်ဟူနဟဲက့ၤ တုၤဒီး တၢ်သူဂံၢ်သူဂဲၤယၤ လၢယဘၣ်ဟဲမၤသကိး တၢ်သးခုက စီၣ်ဒီးနၤလၢ နပှၤကလုာ်ကျါ လီၤ. ယဘါထုကဖၣ် နးမးဒီး တုၤယတၢၣ် ပီၣ်ဒီး ဒီပုၢ်ဝဲၢ် ဖဲဘီကီာ် တဖၣ် တစု, အဝဲသ့ၣ်အၢၣ်လီၤ ဝဲလၢ ပြကၢးဟဲ စဲဃဲၤဒီး ဃုထၢဖိသၣ် တဖၣ်အံၤ လၢကဟဲပိာ် ယခံလီၤ. ပဟဲလၢကျဲ လၢလ့ၣ်မ့ၣ်ပူၤ, ပဘါထုကဖၣ် လၢယွၤကသူပှၤဒီး ကဲထီၣ်တၢ်မၤစၢၤ လၢနဂီၢ်လီၤ.”
“တၢ်ဘျုးဒိၣ်မး နဲၣ်ဘူနး ဧၢ, နစ့တကလး န့ၣ်ကဲထီၣ် တၢ်မၤစၢၤလၢ အ့စ့ၣ်လံာ်စီဆှံ ကၠိအဂီၢ်အါမး ဒ်ယကွဲးတဲလံနၤ အသိးန့ၣ်လီၤ. ဒီးကထၢၣ် ဝဲးဘစထၢၣ် တထံာ်လိာ်သးဒီးနၤ ယသးအုးဒိၣ်မးလီၤ.”
တဟါညါအံၤ စီၤက့ၣ်ဒီး စံာ်ဖးလဲၢ် တၢ်အိၣ်ဖှိၣ်ဖိ တဖၣ် ဃ့တၢ်သးကညီလၢ ယွၤကနဲၣ်အီၤ လၢကဘၣ်လဲၤ တၢ်လီၢ် မတၤန့ၣ်လီၤ. ပှၤတဂၤ စံးတမၠိလီၤ. ဘၣ်ဆၣ် အိၣ်အိၣ် ကသံၣ်သရၣ် အီၣ်ဝူ ကတိၤထီၣ် တၢ်ဒီးစံး, “ဒီပုၢ်ဝဲၢ်သ့ၣ်ဧၢ, ယထံၣ်ပှၤကညီ သဝီတဖျၢၣ်လၢ အသးကိၤမး လီၤ. သရၣ်မုၣ် ကွၢ်ပှၤဆါ ဒီးယၤ ပလဲၤအိၣ် တဘျုးဘျီလံ. တတူၢ်လိာ်ပှၤဘၣ်. ဘၣ်ဆၣ်တနံၣ်ညါအံၤ တၢ်ဖျါလီၤဆီ တစဲးဖိလီၤ. အဝဲသ့ၣ် စးထီၣ်တူၢ်လိာ်ပှၤ တစဲးလံ. မ့ၢ်သဝီဖးဒိၣ် ,ဟံၣ်အိၣ် ယဲၢ်ကယၤဘျဲၣ်, ဘၣ်ဆၣ် ပှၤသဝီဖိခဲလၢာ် အီသံးဒီး ကသံၣ်သူ, ဖီသံးဆါသံး, ဟုၣ်တၢ်ဘျၣ်တၢ်နးမးလီၤ. လိၣ်တၢ်မၤစၢၤ အါနးမးလီၤ.”
ယွၤပၢဆှၢ ဒုးတရံးဃီၤက့ၤ ပှၤခဲလၢာ် အတၢ်ဆိကမိၣ် ဆူကသံၣ်သရၣ် အတၢ်ဟ့ၣ်ကူၣ် အံၤလီၤ. ဒီးတနၤန့ၣ် တၢ်စးထီၣ် ဘါထုကဖၣ် ပၢၢ်တုၤလၢ ဖးဖီမုၢ် လၢသဝီ ကိၤခိၣ်ထံ လၢၢ်ဟ့အံၤ အဂီၢ်လီၤ. မုၢ်ဆ့ၣ်ထီၣ် တနံၤန့ၣ် ပှၤတလဲၤဒံးဘၣ်. ဘၣ်ကတဲာ် ကတီၤဟုဆၣ် လီၢ်မံလီၤ. ထံလၢၢ်ဟ့ တမ့ၢ်ကတူၢ်လိာ် အီၤဘၣ်. လိၣ်အါထီၣ် စ့ၢ်ကီး တၢ်ထုကဖၣ် န့ၣ်လီၤ. လၢဟါတခီ တၤဘီနၢၤ ကရၢဖိ အဂၤတဆံ ဟဲတုၤကဒီး, ဒီးပာ်ဖှိၣ်ထီၣ်သး လၢပှၤကလဲၤ ခဲၣ်ဖ့ တဘျီအံၤ အသကိးလီၤ. စီၤက့ၣ်မၤလိာ် ဒဲဖးဒိၣ် တဆံယဲၢ်ဖျၢၣ် လၢအဖါတံၢ် အအိၣ်လၢ ကလဲၤစိာ်ဝဲ အဂီၢ်လီၤ. စကီၤစီၤဝါ ကလဲၤသကိး တၢ်ဒီး အဖိခွါ စ့ၢ်ကီးလီၤ. စီၤဝါဒီး သးပှၢ်ဘူနးခံဂၤ ရ့လိာ်သး ဘူးမး ဘါထုကဖၣ် သကိးခဲအံၤခဲအံၤလီၤ. သရၣ်စီၤစ့, သရၣ်မုၣ်ဖဲထူ, ဒီးသရၣ်သးပှၢ် ဖိဂ့ၤ ကလဲၤသကိး စ့ၢ်ကီးလီၤ. စီၤက့ၣ် အဖါတံၢ် စီၤဘျဲၣ်, ဒီးအသကိး လီၢ်လံၤ စီၤလါ ဒီးအမါ ဃုာ်ဒီး စီၤဟ့ဒီး စီၤဂီၤခဲလၢာ် ကလဲၤစ့ၢ်ကီးဝဲလီၤ. တနၤန့ၣ် တၢ်ထုကဖၣ် လၢသဝီ ထံလၢၢ်ဟ့ အံၤအဂီၢ် လဲၤထီၣ်ကဒီးဝဲ တုၤဖးဖီမုၢ် ဘျဲၣ်န့ၣ်လီၤ. တၢ်အိၣ်ဖှိၣ်တခီ စံးဘၣ် ပှၤကလဲၤတၢ်တဖၣ် လၢသါကဘါထုကဖၣ် သ့နၤနၤလီၤ. တၢ်အိၣ်ဖှိၣ် လၢဝ့နးနး, မဲၣ်ကနဲ ဒီး မဲၣ်နမီ တဖၣ် အၢၣ်လီၤအသးလၢ ကဒုးသကိး ဃုာ်တၢ်လၢ တၢ်ထုကဖၣ် အပူၤလီၤ.
ပှၤလဲၤတၢ်ဖိတဖၣ်, တမံဘၣ် အါအါဘၣ်. ပၢၢ်ထီၣ်လၢဂီၤထၢၣ်သၢ, ဘါထုကဖၣ် သကိးဝံၤ လဲၤတၢ်လီၤ. တၢ်ဒ့ၣ်စၢၤ ယံၤခံဆံယဲၢ် မံးလာ် ညါလီၤ. မုၢ်ထူၣ်ဃၣ်ဃၣ် အဝဲသ့ၣ် လဲၤတုၤထံလၢၢ်ဟ့ စိးခံလီၤ. တၢ်ဒ့ၣ်စၢၤလီၤ တ၀ာ်ဘျဲၣ်လံ. ပှၤပာ်လီၤ တၢ်ဘိၣ်တၢ်စှၢၤလၢ ကဆီလိၤ, ဒုးအိၣ်ဘှံးကဆီလီၤ. ပိာ်မုၣ် ဖိသၣ် တဖၣ် ဖီထီၣ်မ့ၤ လီၤ. စီၤဘျဲၣ်တီခိၣ်ရိာ်မဲ, ကိးထီၣ်တၤဘီနၢၤကရၢဖိ တဖၣ်ဒီး ဟးပလၢၢ်အီၣ် ညၣ်လၢ လၢၢ်ကဆူးပူၤလီၤ. စီၤက့ၣ်ကိးထီၣ် စီၤလါ, စီၤဟ့ဒီး စီၤဂီၤတဖၣ်, ဟးဒဲး တၢ်ဒိးတၢ်လၣ် ဒ်စဲးဘီးဃၢၣ်, ဟီၣ်တူၢ်ပျိာ် ဒီး ဂ့ၢ်ဂီၤဒုၣ် တဖၣ်အသိးလီၤ. ပှၤဖီအီၣ် ပဲာ်ပိာ် ညၣ်ကစၢၢ်ခိၣ် ဒီးဂ့ၢ်ဂီၤဒုၣ် ဒီးအီၣ်မ့ၤ တဂီၤန့ၣ် ဝံၣ်ဘဲ လီၤဆီလီၤ.
အိၣ်ဘှံးအိၣ်သါ တစိၢ်, ဂဲၤထၢၣ်ဘါထုကဖၣ် ကဒီးတၢ်လီၤ. တၢ်ဘါတဘျီအံၤ ယွၤအကဟုကညီၢ် လီၤဘၣ် ပှၤခဲလၢာ် နးမးလီၤ. ပှၤခဲလၢာ် အမဲာ်ထံလီၤ ဝဲလၢ ပှၤသူၣ်ကိၤသးကိၤ တသဝီအံၤ အဂီၢ်လီၤ. မ့ၢ်ယွၤအမဲာ်ထံလီၤ. မုၢ်ခုၣ်လီၤ တစဲးဒီး လဲၤတုၤဝဲလီၤ. ကဆီခီလီ တဖၣ် သီၣ်ြက့ၣ်ြကိၣ် မး, ဖိသၣ်တဖၣ် ထံၣ်ပှၤဟဲ, က့ၤဃ့ၢ်ဆူ သဝီပူၤ, အိၣ်တစိၢ်ဖိ ပှၤနီၢ်ဒိၣ် အါဂၤ ဟဲသဖှိ ထီၣ်အိၣ်ဒီးကျိ, ဒီးနးလီၤ. ဆိမိၣ်ဝဲလၢ တမျာ်ကဟဲဒုးအီၤ သၢၣ်. စီၤက့ၣ်လဲၤဃီၤဒီး စံးဘၣ်အီၤ, “ဒီပုၢ်ဝဲၢ်သ့ၣ်ဧၢ, ယတဟဲတမျာ်သုဘၣ်. ယသါဟဲဟ့ၣ်သု ခရံာ်အတၢ်သးခု ကစီၣ်တခီလီၤ.”
ပှၤအခိၣ်တဂၤ ကတိၤထီၣ်တၢ်, “ဟု, သ့မ့ၢ် ပှၤကးအ့က့ ဖိလီၤဧၢ်,” ဝံၤ, ကိးက့ၤအပျဲၢ်တဖၣ်ဒီး က့ၤက့ၤဆူ သဝီပူၤလီၤ. တတူၢ်လိာ် အီၤတကူၢ်သ့ၣ်, တကတိၤ ဃုာ်ဒၣ်လဲာ် တၢ်ဒီးအီၤဘၣ်. စီၤက့ၣ်ဒီး အသကိးတဖၣ် ထံၣ်ဘၣ် ဟံၣ်ကိးဖျၢၣ်ဒဲး ဘျးလီၤစဲၤ သ့ၣ်ဒ့ သံကစဲာ်လၢ ကျဲစၢၤဖီခိၣ်လီၤ. အခီပညီ “ပတအဲၣ်ဒိး ကးအ့က့နီတဂၤဘၣ်.” လီၤ.
စီၤက့ၣ်လဲၤဆူ စကီၤအအိၣ်, စကီၤဟဲထွးထီၣ် ကတိၤတၢ်ဒီး အီၤလၢ ဟီၣ်ခိၣ်လိၤ, ဒီးတကိးနုာ်ဘၣ်အီၤ ဆူဟံၣ်ပူၤဘၣ်. ဟ့ၣ်ဒၣ်စီၤက့ၣ် အခွဲးလၢ ကအိၣ်တမှံၤလၢ သဝီချၢလီၤ. စီၤက့ၣ် ဃုထၢတၢ်လီၢ် ဂ့ၤမး တကဝီၤဘူးဒီးထံနံၤ, ဒီးပှၤစုာ်ထီၣ်ဒဲ, ဖီထီၣ်မ့ၤ, ဒီးတဟါန့ၣ် အီၣ်မ့ၤဒီး ညၣ်အုၣ်ဂံာ် ဘၣ်ဆၣ် ဘဲမးဝဲလီၤ.
လၢဟါတၢ်ခံးလီၤတခီ, စီၤက့ၣ်ဒွဲၣ်ထီၣ် မ့ၣ်အူဒၢ စတီခ့ သၢဖျၢၣ် ကပီၤကျံာ်ကျုာ် မးဝဲလီၤ. သဝီဖိဒံဖိသၣ် တဖၣ် ဟဲစီၤကွၢ် ခူသူၣ် တၢ်လၢ သဝီ၀ၣ်ဆှုၣ် ကရၢကဆူးပူၤ, စံးဝဲ ကးအ့က့ တကရၢ ကမၤမနုၤလဲၣ်, ပသါကွၢ်စါတဘီနဲာ်. ပှၤခဲလၢာ် သးဝံၣ်တၢ် သးခုကစီၣ် တၢ်သးဝံၣ် အမုာ်ဖိတဖၣ် တယုၢ်ဘၣ်တယုၢ်, ဒီးခၠူ၀ၣ် ဒ့ဝါဧိၤလံန်, စီၤက့ၣ်အူန့ၢ်အီၤ ခီနဲး လီၤ. ကရၢၢ်သီၣ်မး “ကၠံာ်, ကၠံာ်” လီၤ. စီၤက့ၣ် သ့ၣ်ညါလၢ ပှၤကညီ သူခိၣ်ဖိ တဖၣ် အတၢ်ဂံၢ်စၢ်မ့ၢ် တၢ်သးဝံၣ် န့ၣ်လီၤ. ခၠူ၀ၣ် ထိဝါဧိၤလံန် ထဲတဂၤဧိၤတဘျုးယုၢ်, ဒီးပှၤစီၤဒိကနၣ် တၢ်တဖၣ် ကနၣ်တၢ်ဂ့ၤမး လီၤ. ဘၣ်ဆၣ် မုၣ်ကီၤလံၢ် ဂဲၤစ့ၢ်ကီး နးမးလီၤ. ဖဲခၠူ၀ၣ် ထိဝါဧိၤလံန် အခါ, လဲၢ်ဖးဒိၣ် ဟဲလီၤ သၢဖျၢၣ် ဝးတရံးအီၤလီၤ. ပှၤတပာ်ဖျါထီၣ် တၢ်ပျံၤ တၢ်ဖုးနီတဂၤဘၣ်. ပိာ်မုၣ် တဖၣ်ဒၣ်လဲာ် ယွၤဟ့ၣ်အီၤ တၢ်ဒူတၢ်ဃိၤ လီၤဆီလီၤ. လၢကရၢပူၤတခီ ပှၤကနၣ် တၢ်ဖိတဖၣ် တထူၣ်ထီၣ်ဝဲလီၤ. “ထွံၣ်မတၤတကရၢ ဟဲမၤတံာ်တာ် ပှၤဒ့ဝါဧိၤလံန် မုာ်မး တဂၤအံၤလဲၣ်.” ပှၤဒိကနၣ် တၢ်ဖိတဖၣ် လူၤဃုဝ့ၤဝီၤ ပှၤကွံာ်လၢၢ်တဖၣ် အံၤ ြတၢကလူတဘီလီၤ. ကဲထီၣ်က့ၤ ပှၤတစွဲၤတဖၣ် အပှၤကဟုကယာ် က့ၤအီၤတခီလီၤ. မုၣ်ကီၤလံၢ် မၤယွၤတနၢၤဘၣ်.
တဟါန့ၣ် အဝဲသ့ၣ် ဒ့န့ၢ်သးဝံၣ်န့ၢ်ကမျၢၢ် ဒိကနၣ်ခူသူၣ် တၢ်တဖၣ် အတၢ်တုၤခွံနၣ်ရံၣ်ဝံၤ, ဘူၣ်ထူဘါယွၤ, မၤပံာ်ကွံာ် မ့ၣ်အူဒၢ တဖၣ်ဝံၤ, က့ၤမံလီၤဝဲလီၤ. တုၤလီၤလၢ ဖးဖီမုၢ်ဘျဲၣ်တခီ, လၢတၤဘီနၢၤ ကရၢဖိ တနီၤအိၣ်ဒဲတဖျၢၣ် တၢ်သီၣ်ထီၣ်, “တၢ်ဘျၣ်, တၢ်ဘျၣ်” ဒီးပှၤဂဲၤထၢၣ် ခဲလၢာ်လီၤ. တၢ်ဘျၣ်တဂၤ ပှၤလူၤအီၤ ဃ့ၢ်အခီၣ်ဘၣ်တဲး ဒဲပျံၤလီၤဃံၢ် ပိာ်ဖျ့ အသွံၣ်ယွၤလၢ ခိၣ်တိသၣ် မးရုၢ်ရုၢ်လီၤ. ပှၤဒွဲၣ်ထီၣ် မ့ၣ်အူဒၢ, ဒီးသရၣ်မုၣ် ဖဲထူ က့ၤဟံးန့ၢ် ကသံၣ်ဖီၣ် တၢ်ကံးယာ်တဖၣ်, ကူစါယါဘျါက့ၤ အီၤလီၤ. တၤဘီနၢၤ ကရၢဖိလွံၢ်ဂၤ က့ၤကိးတၢ်ဘျၣ်အံၤ ဆူ ဒဲပူၤဒီး ဖိၣ်ဃဲဖိတဂ ၤလဲၤပိာ် အခံလီၤ. လၢဒဲပူၤန့ၣ် ပှၤသးစၢ် ယဲၢ်ဂၤအံၤ စးထီၣ် တၢ်သးခုကစီၣ် အတၢ်မၤ လၢ တၢ်ဘျၣ်တဂၤအံၤလီၤ. တဲပၠးအီၤလၢ တၤဘီနၢၤ ကရၢ အတၢ်မၤအဂ့ၢ်, တၢ်မၤလၢပျၢၤ, ဝံၤတၢ်မၤ အသီဝံၤ ဖိၣ်ဃဲဖိ တဂၤ တဲပၠး အီၤလၢ လၢညါ သါဝဲသါမ့ၢ် တၢ်ဘျၣ်, ခဲအံၤ သါကဲက့ၤ ပှၤအသီ တဂၤ သါကဲက့ၤ ခရံာ်အတၢ်ဘျၣ်တဂၤ လၢကဟုၣ်န့ၢ်က့ၤ ပှၤလၢ မုၣ်ကီၤလံၢ် အပၢးပူၤတခီ န့ၣ်လီၤ. တၢ်အံၤ မ့ၢ်တၢ်အသီလၢ တၢ်ဘျၣ်တဂၤအံၤ အဂီၢ်လီၤ. အဝဲမ့ၢ် ပှၤဟုၣ်တၢ် အဖၠဲးကတၢၢ် တဂၤဖဲ သဝီပူၤအံၤ, ပှၤဖီၣ်အီၤ တန့ၢ်နီတဘျီဒံးဘၣ်. ပှၤလၢအဖီၣ်န့ၢ်အီၤ တခီ မ့ၢ်ကးလၢ ပှၤကးအ့က့ဖိ, တဒိတတီၢ်အီၤ အမဲာ်ညါ, တဲအီၤလၢ တၢ်လီၤလး တဖၣ်တခီလီၤ. ဖိၣ်ဃဲဖိ တဂၤ ထုးထီၣ် စ့ယဲၢ်ထ့းကီၣ်ဒီး ဟ့ၣ်မၤစၢၤ လီၤတၢ်ဘျၣ်လီၤ. တၢ်ဘျၣ် အမဲာ်ထံလီၤဘၣ်သးလီၤ.
မုၢ်ဆ့ၣ်ထီၣ်တနံၤ တၢ်ဘျၣ်စီၤချ့ ဟဲစိာ်ဆီယဲၢ်ဘ့ၣ် ဒီးလဲၤဆှၢဝဲဆူ ဖိၣ်ဃဲဖိ နဲၣ်ယၣ်ခုး အအိၣ်လီၤ. “အအံၤသိၣ်ဧၢ, လၢသုကဖီအီၣ် တဂီၤအံၤ အဂီၢ်. တမ့ၢ်ယဟုၣ်အီၤဘၣ်. ယဆီယဘုၣ်အီၤလၢ ယစုလီၤ. ယပာ်လီၤက့ၤယသးလၢ ယတဟုၣ်တၢ်လၢၤဘၣ်.” နဲၣ်ယၣ်ခုး သးခုမး ဒီးလဲၤဆှၢအီၤဆူ စီၤက့ၣ်အအိၣ်လီၤ.
စီၤက့ၣ်စံးဘၣ်အီၤ, “သိၣ်စီၤချ့ဧၢ, နလဲၤဆူစကီၤ အအိၣ် အၢၣ်လီၤ နသး ဘူၣ်စ့ၢ်ကီးဧါ.”
စီၤချ့စံးဆၢ ,“ဘူၣ်သၢၣ်” ဝံၤစီၤက့ၣ်ဃ့ဘါထုကဖၣ် တၢ်လၢ အဂီၢ်ဒီး ပျၢ်အီၤလီၤ.
လၢမုၢ်ဆါခီ, ထံလၢၢ်ဟ့ စကီၤသးပှၢ် စီၤဘုဟဲဆူ စီၤက့ၣ်အအိၣ်လီၤ. စီၤက့ၣ်တဲပၠးအီၤ လၢယွၤမၤ တၢ်သးခုကစီၣ်လၢဘီကီာ်, ဖံၣ်နဲ, စ့ကၢၢ်ဖူ, လၢၢ်ဟ့, ဒီးစံာ်ဖးလဲၢ် တဖၣ်အဂ့ၢ်လီၤ. သးပှၢ်အံၤ ကနၣ်အနၢ် တဟိၣ် တဘီလီၤ. စံးဘၣ်စီၤက့ၣ်, “ထ့ၣ်ဧၢ, ယနၢ်ပၢၢ်လၢ စံာ်ဖးလဲၢ် စကီၤစီၤဝါ ဟဲဃုာ်လီၤ. ယသးအိၣ် လဲၤအိၣ်သကိးအီၤလီၤ.” ဒီးစီၤက့ၣ် လဲၤဆှၢအီၤဆူ အပၢ်အဒဲ ဖဲအဘါထုကဖၣ် သကိးတၢ်ဒီး နဲၣ်ဘူနး ဝံၤသီသီ န့ၣ်လီၤ. စီၤက့ၣ်ပာ်တီၢ်အီၤ ဖဲန့ၣ်ဒီး က့ၤကဒါဆူဒဲလီၤ.
မုၢ်ဃ့ၢ်လီၤတစဲး, စီၤချ့ဒီး အတံၤသကိး တၢ်ဘျၣ်တဖု စိာ်ဒီးပှာ်တဖၣ် ဟဲက့ၤထီၣ်လၢ ထံကျိပူၤ ဒီးပာ်တီၢ် ညၣ်ဘၣ်မး ခံကပၢၤညါလၢ ပှၤယဲၢ်ဆံ ဘျဲၣ်အံၤ အဂီၢ်လီၤ. ဟ့ၣ်တီၢ်ဝဲဝံၤ က့ၤက့ၤဆူ သဝီပူၤလီၤ.
စီၤက့ၣ်ဒီး ခၠူ၀ၣ် လဲၤပိာ်အခံ မၢအဒုးနဲၣ် အီၤလၢ ဘှးခိၣ် အဟံၣ်လီၤ. စီၤက့ၣ်သံကွၢ်, “စီၤချ့ဧၢ, နလဲၤဆူ စကီၤအအိၣ် တုၤလံဧါ.” “ယလဲၤတုၤလံ. ယသကိး ဟဲမၤညၣ်ဒီး ယၤတဖၣ် ယတဲပၠးအီၤ လၢတၢ်မၤ အသးဒီးယၤ တဖၣ် ဒီး အဝဲသ့ၣ်စ့ၢ်ကီး သါတဟုၣ်လၢၤတၢ်ဘၣ်.”
စီၤချ့လဲၤဆှၢ စီၤက့ၣ်ဆူ ဘှှးခိၣ် အဟံၣ်, အသကိး ပိာ်အခံ ခဲလၢာ်ဒီးဖဲ န့ၣ် ဘှးခိၣ် တူၢ်လိာ်အီၤလၢ ဟံၣ်ချၢလီၤ. ဘှးခိၣ်အမံၤ မ့ၢ်သးပှၢ် စီၤဘီလီၤ. စီၤချ့ဒီး အသကိးတဖၣ်အုၣ်အသး လၢပှၤဟဲတဖု အံၤ ကဲထီၣ် တၢ်မၤစၢၤ လၢသါဂီၢ်အဂ့ၢ်, ဒီးအသကိး တဖၣ် တဲပၠးစီၤဘီလၢ သါတဟုၣ် လၢၤတၢ်ဘၣ် လီၤ. စီၤဘီ မဲာ်တကျိၣ် နါတကျိၣ် ဘၣ်မးသးလီၤ. ဘၣ်နးဘၣ်ဖှီၣ် လၢ စီၤချ့ဒီး အသိၣ်တဖၣ် ဟဲဟုၣ်အတၢ်အါမး လီၤ. မၤဝဲတနၢၤဘၣ်. တၢ်တခါအံၤ တၢ်ဒ်လဲၣ်, စီၤဘီသံကွၢ်လ ၢအသးပူၤလီၤ.
စီၤချ့စံး, “ဖါတံၢ်ဘှးခိၣ်ဧၢ, နမ့ၢ်ကိးနုာ် သရၣ်ခံဂၤအံၤလၢ ဟံၣ်ပူၤတဂ့ၤဧဲၢ်.” သးပှၢ်စီၤဘီ အမဲာ်ထီၣ်ဂီၤ မးလၢ အမဲာ်ဆှး အဃိလီၤ. တဘျီအဝဲ အိၣ်လၢ ကီၢ်ရွှ့ၣ်ကၠ့ၢ်, သဝီမီကဲသၣ် ပၢၤခိၣ်, မ့ၢ်ခရံာ်ဖိတဂၤ, ဖီးပၠၣ်ဒီး ဟဲက့ၤအိၣ်က့ၤလၢ ထံလၢၢ်ဟ့ အိၣ်ဒံးထဲ တဆံယဲၢ်နံၣ်လီၤ. သ့ၣ်ညါခရံာ်ဖိ အတၢ်ယ့ၣ်တၢ်ကၠ့, ဒီးမဲာ်ဆှး လီၤက့ၤသးလီၤ. က့ၤကိးနုာ် စီၤက့ၣ်ဒီး ခၠူ၀ၣ် ဆူဟံၣ်ပူၤ ဒီးပာ်လီၤ ဒုးအီၣ်အီၤလၢ တကွံဒီး တၢ်နုၢ်ထံ ဆံၣ်ဒီး နီၣ်ဝ့လီၤ. စီၤချ့တခီ က့ၤဆူဟံၣ်လီၤ.
စီၤက့ၣ်တဲယုၤဘှးခိၣ် လၢသးပှၢ်ဘူနးအဂ့ၢ်လီၤ. သးပှၢ်အံၤ ကနၣ်ခိၣ်ဂၢၢ်မးလီၤ. ဝံၤခၠူ၀ၣ် တဲအီၤလၢ အဂ့ၢ်တဆီဘၣ်တဆီလီၤ. သးစီဆှံ ဒုးတၢ်လၢ ဘှးခိၣ် တဂၤအံၤ အပူၤဆူၣ်ဆူၣ်ကလဲာ်လီၤ. အဝဲအမဲာ်ထံလီၤမး ြပူးြပူးလီၤ.
“တၢ်ဖိဒိၣ်သ့ၣ်ဧၢ, ယသးအိၣ်တဲသု ယဂ့ၢ်တစဲးလီၤ. ယပၢ်မ့ၢ် ပှၤခရံာ်ဖိ သရၣ်ကွၢ်တၢ်အိၣ်ဖှိၣ် လၢမီကဲသၣ် ပၢၤခိၣ် လၢရွှ့ၣ်ကၠ့ၢ် ကီၢ်လီၤ. ယပၢ်သံဝံၤ ယဝံၢ် စီၤမနၤရှ့ၣ်ထီၣ်က့ၤ အလီၢ်လီၤ. ယဲတဂၤ ယမဲာ်ဘၣ်ဒီး ဟံးန့ၢ် သူခိၣ်မုၣ် တဂၤဒီး ယဘၣ် တၢ်ဟီထီၣ်ကွံာ်ယၤလီၤ. ယဘျုးလီၤ ယသးလၢ ယမါအအိၣ်ဒီး အပၢ်သံဝံၤ ယထီၣ်က့ၤ ဘှးခိၣ်လီၤ. ယဟဲက့ၤဆူ အံၤအိၣ်ဒၣ် တဆံယဲၢ်နံၣ် ဧိၤဒံးလီၤ. ယသးပူၤ တၢ်အမုာ်အပၢၤ တအိၣ်လၢၤ နီတစု စးထီၣ်လၢ ယဟးဖျိး ဒ်အံၤန့ၣ်ဘၣ်.”
စီၤက့ၣ်ကမၢကမၣ်ဒိၣ်မး လီၤ. ကစၢ်ယွၤ မၤတၢ်သ့သ့ဘၣ်ဘၣ် မးလဲၣ်. စီၤက့ၣ်လဲၤတုၤ မီကဲသၣ် ပၢၤခိၣ်, သ့ၣ်ညါ သရၣ်မနၤရှ့ၣ်ဂ့ၤဂ့ၤလီၤ. သရၣ်စီၤစ့ လၢအဟဲပိာ်အခံ ခဲအံၤ မ့ၢ်ဒၣ် သရၣ်မနၤရှ့ၣ် အဖိခွါ, ဒီးမ့ၢ် ဘှးခိၣ် အံၤအဖိဒိၣ်လီၤ. စီၤက့ၣ်တဲပၠး ဘှးခိၣ်လၢ တၢ်အံၤလီၤ. ဘှးခိၣ်မၤချ့ချ့ဒ်သိး ကလဲၤထံၣ်ဘၣ် အဖိဒိၣ်လီၤ.
သရၣ်သးပှၢ်ဖိဂ့ၤ တဂၤ တအိၣ်ကလီဘၣ်. ကိးထီၣ်ဖိၣ်ဃဲဖိ လွံၢ်ဂၤ ဒီးလဲၤခူၣ်ဟီၣ်ခိၣ်တကဝီၤလၢ စကီၤသးပှၢ် ဟ့ၣ်အီၤအခွဲးလၢ ကခူၣ်ဝဲ န့ၣ်လီၤ. ခူၣ်ဝဲဝံၤ ကရၢဝဲ ဂ့ၤဂ့ၤ ဒ်သိး ဆီသုတလဲၤမၤတံာ်တာ် တဂ့ၤဝံၤ သူၣ်လီၤပထိး အီၣ်သ့လၢ အသီလွံၢ်ဆံ အတီၢ်ပူၤလီၤ. ပှၤသဝီဖိတဖၣ် ဟဲစီၤကွၢ် ကီအီၤ, ဒီးလၢခံ အိၣ်တကဲဘၣ်, ဖီၣ်လီၤမၤစၢၤ အီၤလီၤ. ဝံၤလဲၤသူၣ်လီၤန့ၢ် စကီၤသးပှၢ်လၢ ကၣ်ဖံၣ်ချံ တနီၤစ့ၢ်ကီးလီၤ. အဝဲဟးကွၢ်ထိၣ်ဖိဆီဖိ, ဒီးတဲပၠး သဝီဖိ တဖၣ်လၢ အတၢ်မၤအဂ့ၢ်, တၢ်မၤဂ့ၤထီၣ်အါထီၣ်ဆီဒံၣ်, တၢ်မၤဒိၣ်ထီၣ်ထိး, တၢ်သူၣ်တၢ်ဖျးလၢ အဟဲဒုးနုာ်လီၤစ့လၢ တၢ်ဖးဖီ တဖၣ်န့ၣ်လီၤ. ပှၤသဝီဖိ ဝီၤအီၤတဂီၢ်လီၤ.
တၤဘီနၢၤကရၢဖိတဖၣ် တအိၣ်ကလီဘၣ်. လဲၤဆူ ပှၤကွၢ်ကျီၢ်ပနၢ် တဖၣ်အအိၣ်, လံာ်လူာ်စၢၤအီၤ လၢတၢ်ခး နီၣ်ဘျုးအချံ, တဲယုၤအီၤ ပူဖိဘၣ်ဃး ကစၢ်ခရံာ်အဂ့ၢ်, သးဝံၣ်ယုၤအတၢ်, ဒီးအုၣ်အသး လၢကစၢ်ခရံာ် အဂ့ၢ်လီၤ. ဖိသၣ်ပိာ်ခွါ တဖၣ် ကနၣ် တၢ်ဂ့ၤမး, ဒီးသးဝံၣ် တၢ်ဘၣ်ထီၣ် ခံယုၢ်သၢယုၢ် တခီလံ.
သရၣ်မုၣ် ဖဲထူ ကိးထီၣ် ပိာ်မုၣ် ဟးဂီၤလီၢ်လံၤ ဖိယဲၢ်ဂၤ, လဲၤလၢသဝီပူၤ ဟးကွၢ်ပှၤဖိသၣ် အိၣ်ဒီးပူၤလီၢ် ပူၤကျဲတဖၣ်, က့ၤကိးဝဲ, သ့န့ၢ်ဝဲ အပူၤလီၢ် ဒီးကူစါအီၤလီၤ. ပိာ်မုၣ်တဖၣ် ဟဲစိာ်အါထီၣ် ဖိသၣ်လၢ အဆူးအဆါတဖၣ် ဒီး မၢအကူစါအီၤလီၤ.
တဟါန့ၣ် ဟ့ၣ်တဘျုးဖျၢၣ် ထုးကွံာ် သ့ၣ်ဒ့တဖၣ် လၢဟံၣ်ကျဲစၢၤ န့ၣ်လီၤ. သ့ၣ်ဒ့ြတီဃာ် ယွၤအတၢ်အဲၣ် အကျဲတန့ၢ်ဘၣ်. ဖိသၣ်တဖၣ် ဟဲဝီၤပှၤခရံာ်ဖိ တဖၣ်, အတၢ်လိာ်ကွဲ ယုၤအီၤ နံၤကဝဲၢ်ပျီၢ်ကဒီ မးလီၤ. ပှၤအဒိၣ်တနီၤ ဝီၣ်လီၤထူဘီလၢ ပျီပူၤလၢ ပှၤခရံာ်ဖိ တဖၣ်အသကိးလီၤ. ဘှးခိၣ်စီၤဘီ ပိာ်လိာ်အခံဒီး အဖိဒိၣ်သရၣ်စီၤစ့, လဲၤဟးလၢပျီပူၤ လၢတၢ်လီၢ်ယံၤတစဲး, လဲၤဘူၣ်ထူဘါယွၤ ဖဲန့ၣ်လီၤ. စကီၤစီၤဘု ပိာ်လိာ်ခံဒီး စကီၤစီၤဝါဒီး နဲၣ်ဘူနး ဟးကွၢ်ဒူပူၤသဝီ ပူၤလီၤ. ပှၤတဘျုးဂၤ ကိးအိၣ်သကိးအီၤလီၤ. ပြတီစးထီၣ် အိးထီၣ်ဝဲလံ.
အီၣ်မ့ၤဝံၤ ဟါခီ တုၤတၢ်ခံးလီၤ ဒီး ပှၤခဲၣ်ဖ့ဖိတဖုအံၤ ဒွဲၣ်ထီၣ် ကဒီးမ့ၣ်အူ ဒၢကပီၤကၠီၢ်ကနာ်လီၤ. တဟါအံၤ ဒုပှၤသဝီဖိအါဂၤ ဟဲဟးထီၣ်ဆူ ကရၢချၢ ဒီးဒိကနၣ် တၢ်သးဝံၣ်, တၢ်ဒ့တၢ်အူ တဖၣ်လီၤ. ဘှးခိၣ် သးပှၢ် စီၤဘီဒီး စကီၤစီၤဘုတဖၣ် အိၣ်လၢ ပှၤခဲၣ်ဖ့ဖိ တဖၣ်အကျါ ဒီးတၢ်အံၤ မၤဆူၣ်ထီၣ် ပှၤသဝီဖိ တဖၣ်အသးလၢ ကဟဲရ့လိာ်မုာ်လိာ် သးဒီး ပှၤခရံာ်ဖိ တဖၣ်အံၤလီၤ.
သရၣ်စီၤစ့ သိၣ်လိန့ၢ်ပှၤဖိသၣ် ပိာ်ခွါတဖၣ်လၢ ခရံာ်ဖိတၢ်သးဝံၣ်, သရၣ်မုၣ်ဖဲထူ တခီ သိၣ်လိဝဲ ပိာ်မုၣ် ဖိသၣ်တဖၣ်ဒီး ဒုးြပၢလိာ် ဝဲပှၤခံဖုအံၤလီၤ. တၢ်နံၤတၢ်အ့ ပၢၢ်ထီၣ်အါမး လၢတၢ်အံၤအပူၤလီၤ. သးအကိၤတဖၣ် လီၤကဆှၣ်လီၤက့ၤ မးဖးဒိၣ်လံ. လၢခံကတၢၢ် အဝဲသ့ၣ်ဒုးနဲၣ်ဖိသဒါ အပူ လီၤ. ပှၤနံၤမးလီၤ. သနာ်က့ ယွၤသူပူအံၤ ဒိၣ်မးဒီး လၢတၢ်နံၤတၢ်အ့ အပူၤ န့ၣ်တၢ်သးဘၣ်ဒိဘၣ်ထံး, တၢ်သးဘၣ်သိၣ်ဃီၣ် အိၣ်ထီၣ်အါမး စ့ၢ်ကီးလီၤ. ပှၤခဲလၢာ် ကနၣ်တၢ်ဂ့ၤမး လီၤ. တၢ်တံာ်တာ် ဘီကျီၣ် တအိၣ်နီတမံၤဘၣ်. လၢၢ်တလီၤတဲာ် လၢၤဘၣ်.
တၢ်လဲလိာ်သးဖးဒိၣ်လံ. ကိးဂီၤဒဲး ဒူဖိသဝီဖိ တဖၣ် ဟဲဆှၢနွါနုၢ်ထံ, ဆီ, ထိၣ်ဒ့ၣ်, ဆီဒံၣ် ထိၣ်ဒ့ၣ်ဒံၣ်, ညၣ်, တၢ်ဒိးတၢ်လၣ်တဖၣ် လီၤ. ပှၤခဲၣ်ဖ့ဖိ တဖၣ် ဟးဝ့ၤဝီၤလၢ သဝီပူၤလီၤ. ထံၣ်အကျဲ စၢၤတဖၣ် သ့ၣ်ဒ့ သံကစဲာ် တဘၣ်တၢ်ဘျး လီၤစဲၤအီၤလၢၤဘၣ်. ပှၤခရံာ်ဖိ တဖၣ် အတၢ်အဲၣ် သိၣ်လိအီၤလၢ ကဘၣ်ဃုမၤစၢၤ တၢ်ဂၤမံၤဂၤမၠိလီၤ. ပိာ်ခွါသးစၢ်တဖၣ် ခွဲသိၣ်ခွဲပျီ ဒူသဝီ, ဒွဲၣ်ကွံာ် တၢ်ဘၣ်အၢဘၣ်သီ လီၤ. သရၣ်မုၣ် ဖဲထူဒီး ပိာ်မုၣ်ဖိသၣ်တဖၣ် ကိးလီၤပှၤဖိသၣ် တဖၣ်ဆူ ထံလၢၢ်ဟ့ ကျိပူၤ, ဒုးလုၣ်အထံ, ထူးဝဲအဃံၣ်စီစီ လၢဆးပၠၣ်, တံာ်န့ၢ် ဝဲစုမ့ၣ်ခီၣ်မ့ၣ်, ဖိသၣ်လၢ အခိၣ်သူထီကဲၣ်ဆိးတဖၣ် ခၠူ၀ၣ် တံာ်န့ၢ် အခိၣ်သူ လီၤ. လၢမုၢ်ဆါ ခီပှၤသဝီဖိတဘျုးဂၤ ဒိးသိၣ်လိ သးလၢ တၢ်ဖးတၢ်ကွဲး ပှၤကညီကျိာ်လီၤ. စီၤက့ၣ်နီၤလီၤ လံာ်စီဆှံ လံာ်တၢ်သုးခုကစီၣ် တဘ့ၣ်ဧိၤတဖၣ်လီၤ. ပှၤဟးလၢ သဝီပူၤဒီး လၢဟံၣ်ကိးဖျၢၣ်ဒဲး ပှၤနၢ်ဟူ သီၣ်က့ၤ ကးအါကါ, ကးအါက့ၣ်ဖိကၤ လီၤ. စးထီၣ်သိလိက့ၤ သရၣ်ဝံး အပှၤကညီကျိာ် လၢသရၣ်မ့ၤစံၣ် အလံာ်စီဆှံ ပူၤလံ.
စကီၤဒီး သရၣ်ဖိဂ့ၤခံဂၤ ဟးသူၣ်လီၤဖျးလီၤ တၢ်မုၢ်တၢ်ဘိ သကုၤသဝီ ပူၤလီၤ. ပှၤဒူဖိသဝီဖိ တဖၣ် ဟဲမၤစၢၤသကိး တၢ်ဂ့ၤမးလီၤ.
လၢဟါတခီ ပှၤဒ့ပှၤအူတၢ်ဝံၤ, ပှၤအုၣ်သးလၢ ကစၢ်ခရံာ် အဂ့ၢ်တနီၤ, ဝံၤသရၣ်စီၤစ့, မ့တမ့ၢ် စီၤက့ၣ် ဟံးန့ၢ်တၢ်ဆၢကတီၢ်လၢ ကသိၣ်လိ လံာ်စီဆှံလီၤ.
မၤဝဲဒ်အံၤ ပှဲၤထီၣ် တနွံဒီး တၢ်ချံတဖၣ် မဲထီၣ်သၣ်ထီၣ် ဝဲဒီး ခဲၣ်ဖ့ဖိတဖၣ် ကူးဘၣ်က့ၤတၢ်လီၤ. တဟါတခီၣ် ဖဲပှၤသိၣ်လိ လံာ်စီဆှံန့ၣ်, ဘှးခိၣ် စီၤဘီ ဂဲၤထၢၣ် ဒီး ပီၢ်ယၢ်လီၤက့ၤသးလီၤ. အဝဲစံးဘၣ် ပှၤသဝီဖိတဖၣ် လၢ သါဟးထီၣ်ကွံာ်လံ ဘှးခိၣ် အလီၢ်လံ. သဝီဖိ မ့ၢ်သးလီ ဘှးခိၣ်ဒံးဒီး ဘၣ်ဃုန့ၢ်အသီလီၤ. ပှၤခဲလၢာ် အိၣ်ဘှ့ၣ်မး ြပံးကလာ်လီၤ. အိၣ်တစိၢ်ဖိ ဒီးတၢ်ဘျၣ်ခိၣ် စီၤချ့ ဂဲၤထၢၣ်ဒီး ဃ့ဒိးဘျၢက့ၤသးလၢထံလီၤ. စီၤချ့အတံၤသကိး ပိာ်ထီၣ်အခံ တဆံဃုဂၤဒံးလီၤ.
လၢခံသၢသီ စကီၤစီၤဘု ဒီး အဟံၣ်ဖိဃီဖိ တဖၣ် ဟဲဃ့ဒိးဘျၢထံလီၤ. တၢ်အံၤမၤအသးဒ် တမၢၣ်တဘိ ကၢ်လီၤအသိးလီၤ. ထံဘျိၣ်လီၤတဘျီဃီ လီၤ. ဒူဖိသဝီဖိတဖၣ် ဟဲလၢအဖုအဂီၢ်ဒီး ဃ့ဒိးဘျၢထံလီၤ.
ဒီပုၢ်ဝဲၢ်တဖၣ် ဃ့ဘါထုကဖၣ် လၢတၢ်ဂ့ၢ်အံၤဒီး တၢၣ်ပီၣ်ဝဲ ယံာ်မး ဒီး လၢခံကတၢၢ် တၢ်စံၣ်ညီၣ်ဝဲလၢ ပှၤသးအိၣ် ဒိးဘျၢထံတဖၣ် မ့ၢ်အိၣ်ဒီး မါဖိသၣ်၀ၤဖိသၣ်, ကဘၣ်စူးကွံာ်ဝဲ, ကဘၣ်တၢၤကွံာ် တၢ်သီသံး ဖီသံး, ကဘၣ်တၢၤကွံာ် တၢ်ဆါတၢ်ပှ့ၤ ဒီး တၢ်အီကသံၣ်သူ, ကဘၣ်တၢၤကွံာ် တၢ်ဟိၣ်တၢ်လိၣ်, တၢ်အီၣ်ဘှး, ဒီးတၢ်လၢ အတလီၤလိာ် သးဒီး ပှၤခရံာ်ဖိ အလုၢ်အလၢ်ခဲ လၢာ်လီၤ. ပှၤသဝီဖိတဖၣ် အသးဆူၣ်, နာ်က့ၤစဲဃဲၤ ကစၢ်ခရံာ် လၢသးစီဆှံ ကစၢ်အတၢ်မၤစၢၤအဃိ, တၢၤကွံာ် တၢ်ခဲလၢာ် ဒ်ဒီပုၢ်ဝဲၢ် တဖၣ် ဟ့ၣ်လီၤ ကလုၢ်အသိးလီၤ. တၢ်ကီတမံၤမ့ၢ် ပှၤအီကသံၣ်သူတဖၣ်လီၤ. ပှၤတဖၣ်အံၤ စူာ်အူလဲာ်သး, တၢ်ပာ်တီၢ် ကသံၣ်သူ အံၤမၤဆါအီၤ ဒိၣ်မး လီၤ. လၢတၢ်နာ်အပူၤ, စီၤက့ၣ်ဟဲဃ့ န့ၢ်ပာ်စၢၤ တၢ်ပာ်တီၢ် ကသံၣ်သူ ကသံၣ်ဖီၣ်, ဒီးဒုးအီလီၤက့ၤ ပှၤတဖၣ် အံၤဒီး အဝဲသ့ၣ် ရှါထီၣ်က့ၤ ပှီၢ်ပှီၢ်လီၤ.
စီၤက့ၣ်ကွဲးန့ၢ် သရၣ်ခ့ရ့ၣ်အလံာ်ဆူ လၢၢ်ဟ့, တဲပၠးအီၤလၢ တၢ်ဂ့ၢ်အံၤ ဒီးဃ့ကညး အီၤလၢ မ့ၢ်သ့ ကဟဲဆူ ထံလၢၢ်ဟ့ အံၤလီၤ. စီၤလါဒီး စီၤဟ့ က့ၤဆှၢလံာ်ပရၢအံၤလီၤ.
ယံာ်သၢသီဧိၤဒီး သရၣ်ဒီး မးမး ခ့ရ့ၣ် ခံဂၤလိာ် ဟဲတုၤဝဲလီၤ. စီၤက့ၣ်တဲပၠးအါထီၣ် သရၣ်ဒီးမးမး လၢတၢ်ဂ့ၢ်အံၤဒီး သရၣ်သမံ သမိး ပှၤဃ့ဒိးဘျၢသးတဖၣ်ဒီး လၢခံစံးဘၣ် စီၤက့ၣ်လၢ သါနာ်စဲဃဲၤလၢ မ့ၢ်သးစီဆှံ ကစၢ် အတၢ်မၤလီၤ. သရၣ်ဒီးမးမး ဟ့ၣ်ကူၣ်ဝဲလၢ ကဘၣ်တၢ်ဒိးစူၢ်ဒိးဘျၢ အီၤန့ၣ်လီၤ. သရၣ်ဒီး မးမး ဟ့ၣ်ကူၣ်အါထီၣ် တစဲးလၢ ပှၤတဖၣ်အံၤ ဂ့ၤဘၣ် တၢ်သိၣ်လိ အီၤလၢ ကဘၣ်ဟးအုၣ်အသး လၢကစၢ်ခရံာ် အဂီၢ်ဒ်သိး အတၢ်စူၢ်တၢ်နာ် ကဒိၣ်ထီၣ် အါထီၣ်၀ဲအဂီၢ်လီၤ.
ဒီပုၢ်ဝဲၢ်တဖၣ် ဃ့ဘါထုကဖၣ် တၢ်အါမး လၢပှၤတဖၣ်အံၤ အဂီၢ်ဒီး လၢ ခံကတၢၢ် ထုးထီၣ်ပာ်လီၤ တၢ်အၢၣ်လီၤ သၢထံၣ်လၢ အဝဲသ့ၣ် ကဘၣ်အၢၣ်လီၤ ဝဲန့ၣ်လီၤ.
၁. ဘၣ်ဖးလံာ်စီဆှံ ကိးနံၤဒဲး လၢတၢ်ထုကဖၣ် အါအပူၤ.
၂. ဘၣ်ဃ့ဘါထုကဖၣ် တနံၤလၢ ပှၤသူခိၣ်ဖိ အစှၤကတၢၢ် တဂၤအဂီၢ်. (အါတသ့ဖဲအသ့)
၃. ဘၣ်အုၣ်သးလၢ ခရံာ်အဂ့ၢ် လၢပှၤသူခိၣ်ဖိ အစှၤကတၢၢ် တဂၤအမဲာ်ညါ. (အါတသ့ဖဲအသ့)
ပှၤသီဖိ တဖၣ်အၢၣ်လီၤ တၢ်သၢထံၣ်အံၤလၢ တၢ်သးဆူၣ် အပူၤလီၤ. ဒီးပှၤခဲလၢာ် အဂၤ တကထိခံကယၤ ဘျဲၣ်ဘၣ် တၢ်ဒိးဘျၢက့ၤအီၤလၢ ထံကျိ ထံလၢၢ်ဟ့ အပူၤလီၤ. တၢ်ဃုထၢ ဒီးပာ်လီၤက့ၤ တၢ်အိၣ်ဖှိၣ် အခိၣ်အနၢ်တဖၣ်လီၤ. ဘှးခိၣ်လီၢ်လံၤ တဂၤမ့ၢ် လၢအတၢ်နၢ်ပၢၢ် အါတစဲးအဃိ တၢ်မၢအကဲထီၣ် သရၣ်သိၣ်သီတၢ်တဂၤ လၢတၢ်အိၣ်ဖှိၣ်အပူၤလီၤ. စီၤက့ၣ်စူၢ် သရၣ်ခ့ရ့ၣ် အတၢ်ဟ့ၣ်ကူၣ်, နီၤလီၤ ပှၤခရံာ်ဖိ အသီတဖၣ် တဖုဘၣ်တဖု, ဃါဃုာ်အီၤဒီး ပှၤခဲၣ်ဖ့ဖိ စှၤဂၤ လၢကမၤစၢၤအီၤ, ဝံၤပျၢ်လီၤအီၤဆူ သဝီအဘူး တဖျၢၣ်စုာ်စုာ် လၢကလဲၤမၤ တၢ်သးခု ကစီၣ်လီၤ. စီၤက့ၣ်ဒီး သရၣ်စီၤစ့ တခီ အိၣ်တ့ၢ်ဖဲ ထံလၢၢ်ဟ့ ဒီးသိၣ်လိအါထီၣ် သူၣ်က့သးပှၢ်, မုလံၤမုပှၢ်, လၢဟးတသ့တဘၣ်တဖၣ် လၢပှၤခရံာ်ဖိ အတၢ်စူၢ်တၢ်နာ် မိၢ်ပှၢ်တဖၣ်အဂ့ၢ်, လၢပှၤကညီကျိာ်ဒီး တၢ်သူၣ်ဝံၣ်သးဆၢ န့ၣ်လီၤ. သဝီဖိတဖၣ် ထဲးဂံၢ်ထဲးဘါ ဒီးဘှီထီၣ် တၢ်ဘါလီၢ် ၀ၣ်တဖျၢၣ်, ဒူၣ်ဝဲလၢြတဲၤ, ဒုးဝဲအခိၣ်လၢ ၀ၣ်ခီ ဒ်ကစၢၢ်ခိၣ် အလုၢ်အလၢ်အသိး လီၤ. သရိာ်ကဝံၤ အဆၢ ပှၤထံလၢၢ်ဟ့ ခဲၣ်ဖိဖိတဖၣ် ဟဲက့ၤပၢၢ်ထီၣ် တဖုဘၣ်တဖု, ဟဲက့ၤကိး ပှၤတဘျုးဂၤဒံး လၢအနာ်က့ၤ တၢ်ဒီး သးဖှံမးဝဲလၢ ယွၤသူအီၤ အဃိန့ၣ်လီၤ. ပှၤအသီတဖၣ်အံၤ စ့ၢ်ကီး ဒိးစူၢ်ဒိးဘျၢ က့ၤသးဒီး ဘၣ်တၢ်ပာ်ဖှိၣ်ဃုာ်အီၤလၢ ထံလၢၢ်ဟ့ ခရံာ်အတၢ်အိၣ်ဖှိၣ် ပူၤလီၤ.
တချုးစီၤက့ၣ် ပာ်တီၢ်ပှၤထံလၢၢ်ဟ့ဖိတဖၣ်အံၤန့ၣ်, အဝဲသိၣ်လိတ့ၢ် ပှၤခရံာ်ဖိ ခဲလၢာ်လၢ ပှၤကိးဂၤဒဲး ကဘၣ်ကဲထီၣ် ပှၤမၤကစၢ်အတၢ်သးခုကစီၣ် ဒီးကဘၣ်ကျဲးစၢး သပှၢ်ပှၢ်လၢ တနံၣ်အတီၢ်ပူၤ ပှၤတဂၤ ကမၤန့ၢ် သးသမူ တဖျၢၣ်, ဝံၤသိၣ်လိပှၤအသီ တဂၤအံၤ လၢကသ့မၤန့ၢ်ပှၤအသီတဂၤ, တဆီဘၣ်တဆီ န့ၣ်လီၤ. ပှၤခရံာ်ဖိ ကဘၣ်ထီၣ်ဖိ, ထီၣ်လံၤ, ထီၣ်လိၤ, ထီၣ်လၤ, (ကွ့ၢ်ကွ့ၢ်) ပှၤခရံာ်ဖိ အသီတဖၣ် ထီဘိလီၤ.
စံာ်ဖးလဲၢ်လံာ်စီဆှံကၠိစီၤက့ၣ်ဒီး တံၤသကိးတဖၣ် က့ၤတုၤစံာ်ဖးလဲၢ်, ဒီးတဟါန့ၣ် ပာ်ဖျါထီၣ်က့ၤ ယွၤအတၢ်မၤ လီၤလးလၢ သဝီထံလၢၢ်ဟ့ အပူၤဒီး ဒီပုၢ်ဝဲၢ်ဖဲ စံာ်ဖးလဲၢ်တဖၣ် အသးဆူၣ်ထီၣ်ဒိၣ်မးလီၤ. ပှၤလဲၤတၢ်ဖိတဖၣ် ပာ်ဖျါထီၣ် အထံၣ်န့ၢ် တၢ်မၤလိ ဂၤမံၤဂၤမၠိဒီး ပှၤခဲလၢာ် အၢၣ်လီၤပာ်၈ၢၢ်ပာ်ကျၢၤ တၢ်လၢ အဖီလာ် တဖၣ်အံၤလီၤ.
၁. ယွၤမ့ၢ်တၢ်သးခုကစီၣ်အကစၢ်
၂. အပှၤမၤတၢ်ဖိ ဘၣ်ဒိးပၢဆှၢသးလၢအီၤလၢာ်လၢာ်ဆ့ဆ့
၃. အစိကမီၤ လၢအမ့ၢ်ယွၤ အတၢ်အဲၣ် မၤလီၤပှီၢ်ကွံာ် တၢ်ြတီခဲလၢာ်န့ၢ်ဝဲ
၄. ပှၤခရံာ်ဖိ ခဲလၢာ်ဘၣ်မၤသကိး တၢ်လၢ တၢ်သးတဖျၢၣ်ဃီ
၅. ပှၤခရံာ်ဖိ ခဲလၢာ်ဘၣ်မ့ၢ် ပှၤစိာ်တၢ်သးခုကစီၣ် န့ၣ်လီၤ.
ကၠိဘူးကဝံၤလံ. စီၤက့ၣ်န့ၢ်ဘၣ် တၢ်ကွဲလၢ ကလဲၤဖျီ ဒီးကထၢၣ်ခၠါလ့ၣ် လၢဘီကီာ်လီၤ. အိၣ်ဘှံးအိၣ်သါ ခံသီဝံၤ, လဲၤဃုာ်ဒီး ဒီပုၢ်ဝဲၢ်ဟဲလၢ ဘီကီာ်တဖၣ်ဆူ လၢၢ်ဟ့, ရ့လိာ်မုာ်လိာ် ဒီးလၢၢ်ဟ့ တၢ်အိၣ်ဖှိၣ်တသီ, တဲပၠးအီၤ တၢ်မၤအသးလၢ ထံလၢၢ်ဟ့တခီ ဒီး မၤဆူၣ်ထီၣ် အသးအါမး လီၤ. မုၢ်ဆ့ၣ်ထီၣ်ဒီး လဲၤကဒီးဆူ ဘီကီာ်လီၤ.
စီၤက့ၣ်လဲၤအိၣ်သကိး ဒီးကထၢၣ်ဝ့လယၢၣ်ဝံၤ, လဲၤပှ့ၤန့ၢ်ဖီကွီၤ တကွီၤ ဒီး လဲၤဆူယီၣ်စွါ အသွၣ်ခိၣ် ဒီးဟ့ၣ်ထီၣ်တၢ်သ့ၣ်နီၣ်ဒီး တၢ်အဲၣ်အပနီၣ် လၢသကိးတဂၤအံၤ အသွၣ်ခိၣ်လီၤ. လဲၤအိၣ်သကိး သးပှၢ်တီဝူ ဒီးအမါ ဒီးကဲထီၣ် တၢ်မၤမုာ်ထီၣ်က့ၤ သးပှၢ်ခံဂၤအံၤ အသးအါမး လီၤ. စီၤက့ၣ် အတၢ်တဲပၠး အီၤတကူၣ်သ့ၣ် ဘၣ်ဃး တၢ်ဘျၣ်စီၤချ့အဂ့ၢ် မၤသးခုမၤနံၤ တီဝူ တုၤဒၣ်လဲာ် မဲာ်ထီၣ်ဂီၤနါထီၣ်ဂီၤ, နါအ့ၣ်ထံယွၤ ဘၣ်မး သးလီၤ. စီၤက့ၣ်တဘျီအံၤ သ့မၤနံၤ ပှၤဒီး ဒုးထံၣ်ပှၤဂၤလၢ တၢ်ကိးမံၤဒဲး ဃၣ်ဃၣ်လၢ အလီၤနံၤ တကပၤန့ၣ်လီၤ. အနီၢ်ကစၢ် ဒၣ်ဝဲ လဲၤခီဖျိတ့ၢ်လံ တၢ်သူၣ်ကိၢ်သးဂီၤ အါမးဒီး ကစၢ်ခရံာ် အတၢ်အုၣ်က့ၤခီၣ်က့ၤ အစိကမီၤန့ၣ် လဲလိာ်က့ၤ တၢ်သးခၣ်တဖၣ်ဆူ တၢ်သးဖှံ န့ၣ်လီၤ.
သးပှၢ်တီဝူ စ့ၢ်ကီး တအိၣ်ကလီဘၣ်. တဲပၠးက့ၤစီၤက့ၣ် လၢယွၤစးထီၣ် မၤမူထီၣ်လံ တၢ်လၢ အဘုစဲးပူၤ တဖၣ်လီၤ. ဘုစဲးမံန့ကၠၢၣ် တဖၣ် ကဲထီၣ်က့ၤ ခရံာ်ဖိခဲလၢာ်လံ. စရ့တဖၣ် ဒီး ပှၤမၤတၢ်ဖိတဖၣ် စ့ၢ်ကီး တဘျုးဂၤ ကဲထီၣ်က့ၤ ပှၤခရံာ်ဖိ လံ. သးပှၢ်တီဝူ စံးဝဲ တဂီၤဒီး တဂီၤ သါဘၣ်ဟးဝ့ၤဝီၤ လၢဘုစဲးတဖၣ်ဒီး ဘါယုၤအယွၤ တကူၣ်သ့ၣ် လီၤ. သါမၤတၢ်မၤအဂၤ အလီၢ်တအိၣ်ဘၣ်. မဲန့ကၠၢၣ် ဒီးပှၤမၤတၢ်ဖိ တဖၣ် နၢ်ပၢၢ်လိာ်သး, မၤသကိး တၢ်ဂ့ၤမးလီၤ. ပှၤအါဂၤ ဟဲဆူ သါအိၣ် တဲလီၤကျဲၤလီၤက့ၤ အတၢ်တတီတလိၤ အါမံၤလံ. သးပှၢ်တီဝူ မၤအါထီၣ် တၢ်ဘူးတၢ်လဲ အမျး ၂၅, ဝံၤဒုးအိၣ်ထီၣ်စ့ၢ်ကီး စ့ပာ်ကီၤလၢ ပှၤမၤတၢ်ဖိ ခဲလၢာ် အဂီၢ်လီၤ. ပှၤမၤတၢ်ဖိတဂၤ မ့ၢ်ပာ်ကီၤစ့ တထ့းကီၣ်ဒီး သးပှၢ်တီဝူ ပာ်ကီၤ အါထီၣ်န့ၢ်အီၤ တထ့းကီၣ်လီၤ. သးပှၢ်အံၤ အိးထီၣ် န့ၢ်ပှၤမၤတၢ်ဖိ အဖိအလံၤတဖၣ် အကၠိတဖျၢၣ် ဒီး ကၠိခိၣ်အံၤ မ့ၢ်သရၣ်မုၣ် အဲၣ်ရံတီ လၢအဟဲက့ၤလၢ ကီၢ်အမဲရကၤ တဂၤလီၤ. သရၣ်မုၣ်အံၤ မ့ၢ်ဘီကီာ် စီၤပၤဖိ ခီလ့ၣ် အပှၤပၢၤလီၢ်ဆ့ၣ်နီၤ ဒီးကထၢၣ် စူၣ်ယၣ်ခဲၣ် အဖိမုၣ် ထဲတဂၤဧိၤန့ၣ်လီၤ. ခဲတဆ့ၣ် ကဖျီအသးဒီး ခၠါလ့ၣ် လီၤ. အပၢ်ဒီး အမိၢ်ဒီးအီၤ ကဲထီၣ်ပှၤခရံာ်ဖိလံ. သးပှၢ်တီဝူ ဘှီထီၣ်န့ၢ်စ့ၢ်ကီး တၢ်ဆါဟံၣ် အိၣ်ကတဲၣ်သၢကယၤ တဖျၢၣ် လၢအပှၤမၤတၢ်ဖိတဖၣ် အဂီၢ်လီၤ.
သးပှၢ်တီဝူ သံကွၢ်စီၤက့ၣ်, “စီၤက့ၣ်ဧၢ, နနၢ်ဟူဘၣ် နသရၣ်ကျီနး နဲၣ်လူဘၢ် အဂ့ၢ်လံဧါ. အဝဲကဲထီၣ်က့ၤ လံပှၤခရံာ်ဖိတဂၤ ဒီး ခဲအံၤမၤစၢၤယၤလၢ ပပှၤမၤတၢ်ဖိ အတၢ်ဆါဟံၣ်ဒီး ကဲထီၣ် ပှၤကွၢ်ထွဲ ပှၤမၤတၢ်ဖိ မၤတၢ်ဖဲ တၢ်ဆါဟံၣ်ပူၤန့ၣ်လီၤ. အစ့အိၣ်ကစီဒီ သနာ်က့, တအဲၣ်ဒိး အိၣ်ကလီဝဲ ဘၣ်. ပှၤပာ်ကဲအီၤ ဒီး အဲၣ်အီၤခဲလၢာ်လီၤ.”
စီၤက့ၣ်မၢသးပှၢ် တီဝူ လဲၤဆှၢအီၤဆူ သုးစကီၤ လီၢ်လံၤ (စါကၠဲး) နဲၣ်လူဘၢ် အအိၣ်တဘျီဃီလီၤ. နဲၣ်လူဘၢ် ထံၣ်အီၤဒီး ဖိဟုမးစီၤက့ၣ်လီၤ. အဲၣ်စီၤက့ၣ်ဒီး သံကွၢ်ထီအဂ့ၢ်လီၤ. နဲၣ်လူဘၢ် ဟ့ၣ်ဒုးအီအီၤ လာ်ဖးထံ ဝံၤစီၤက့ၣ် စံးဘၣ်သးပှၢ်တီဝူ, “ဖါတံၢ်ဧၢ, ယသးအိၣ် က့ၤကိးနဲၣ်လူဘၢ် ဆူစံာ်ဖးလဲၢ်, ဒီးမၢအကဲထိၣ်ကၠိသရၣ်တဂၤလၢ ကကွၢ်ထွဲ တၢ်လိာ်ကွဲ တကပၤလီၤ.” တီဝူစံးဆၢအီၤ, “အဝဲမ့ၢ်လဲၤဒီး ယပျၢ်အီၤ မုာ်မး သၢၣ်.” နဲၣ်လူဘၢ်တခီ, “ယသးအိၣ်လဲၤလီၤ.” ဒီး တၢ်သုးတၢ်ကျဲၤလီၤတံၢ် က့ၤလၢ စီၤက့ၣ် မ့ၢ်က့ၤကဒါက့ၤ ဆူစံာ်ဖးလဲၢ် ဒီးကလဲၤပာ်ဝဲ အခံန့ၣ်လီၤ. စီၤက့ၣ်ကွဲသးပှၢ် တီဝူလၢ ကဟဲအိၣ်ဖှိၣ်ဖဲ စံာ်ဖးလဲၢ် တၢ်ပာ်စီဆှံ လံာ်စီဆှံကၠိ န့ၣ်လီၤ. ဒီး သးပှၢ် အၢၣ်လီၤအီၤလီၤ.
ဝံၤစီၤက့ၣ် က့ၤဆူ အဖိၣ်ဃဲကၠိလီၤ. မ့ရ့ၣ်ထံၣ်ဘၣ်အီၤဒီး အသးခုဖဲန့ၣ်, အသးအုးဖဲန့ၣ် ဒီး ဟီၣ်ဘၣ်မး သးလီၤ. စီၤက့ၣ်ကတိၤမုာ်ထီၣ်က့ၤအသး ဝံၤလိာ်ကွဲဒီး မ့ရ့ၣ်အဖိခံဂၤ, နီၢ်ထူအိၣ်နွံနံၣ် ဒီး စီၤက့ၣ် (ခံ) အိၣ်လွံၢ်နံၣ်န့ၣ်လီၤ. ဖိသၣ်တဖၣ် တၢ်သးဖှံ လီၤဘၣ်အီၤ ဒိၣ်မးလၢ အဒိးဘၣ်စီၤက့ၣ် အပျိၢ်လိၤဒ် ပနၢ်ဖိ အသိးန့ၣ်လီၤ.
ခၠါလ့ၣ်တဂၤ ဟဲက့ၤတုၤတဘီ ဖီၣ်ကနိ လိာ်ကွဲမး စီၤက့ၣ်လီၤ. သါကျဲၤလံလၢ စီၤက့ၣ်ကဆှၢသါလီၤ. သကိးခံဂၤအံၤ ပိာ်လိာ်ခံဒီး ဟးနူးဆဲး ဖိၣ်ဃဲဖိတဖၣ်လီၤ. ဖိၣ်ဃဲဖိ အါထီၣ်လွံၢ်ကယၤဘျဲၣ်လံ. ပှၤလၢ ခူဂၤဝ့ၢ်ဂၤတဖၣ် ဟဲပၢၢ်ထီၣ်ဖဲ ကၠိအံၤန့ၣ်လီၤ. ဖိသၣ် တကယၤဘျဲၣ် မၤန့ၢ် တၢ်ဖံးတၢ်မၤ, သ့ကွၢ်လီၤက့ၤသး, ဒီးဆှၢလီၤ တၢ်မၤဘူၣ်မၤစၢၤ က့ၤကၠိအါမးလီၤ. လၢစီၤပၤ အကလုၢ်အဃိ ယူၣ်တရၣ်ပဒိၣ် ဟ့ၣ်မၤစၢၤ စ့တနံၣ်ယဲၢ်ကလးလီၤ. သရၣ်ဝ့လယၢၣ် မ့ၢ်အိးထီၣ် ယူၣ်တရၣ်ကျိာ် လံာ်စီဆှံကၠိဒီး ဖိသၣ်အိၣ်အဂၤ ယဲၢ်ဆံဘျဲၣ် လၢသးအိၣ် နုာ်လီၤမၤလိ တၢ်လီၤ.
တဟါန့ၣ် စီၤက့ၣ်မံသကိး, အီၣ်သကိး, ဘါသကိးတၢ်ဖဲကၠိအံၤလီၤ. သရၣ်ဝ့လယၢၣ် အသရိာ်တဆိး ပှၤခဲလၢာ်ဘၣ်. စီၤက့ၣ်ဒီး ဖိၣ်ဃဲဖိ, ဒီးသးပှၢ် ဘူနး လၢအဟဲက့ၤက့ၤ လၢထံလၢၢ်ဟ့ တခီ အုၣ်အသး လၢတၢ်မၤ လၢယွၤမၤဝဲ အဂ့ၢ်ဒီး တၢ်အံၤမၤဟူးမၤဂဲၤ ကၠိဖိတဖၣ်, ခၠါလ့ၣ်ဒီး မ့ရ့ၣ် အသးအဒိၣ်အအါလီၤ.
မုၢ်ဆ့ၣ်ထီၣ်တနံၤ, စီၤက့ၣ်လဲၤဆူ ဘီကီာ်ကိးနံၤဒဲး တၢ်ပရၢအတၢး လီၤ. ဘၣ်ဖဲဂီၤ တၢ်ဘါထုကဖၣ် ကစးထီၣ်အဆၢလီၤ. အဲးဒံးထၢၣ် နဲၣ်စူဧၢ် ထံၣ်စီၤက့ၣ်ဒီး မၢအဆှၢတၢ်ဘါလီၤ. စီၤက့ၣ် တဲဘၣ် ပှၤအိၣ်ဖှိၣ် တဖၣ်လၢ အတၢ်လဲၤမၤလိတၢ်လၢ ကီၢ်ပယီၤ အဂ့ၢ်, အတၢ်ဟဲက့ၤဒီး အိးထီၣ် လံာ်စီဆှံ ကၠိဖဲ စံာ်ဖးလဲၢ်, တၢ်မူထီၣ်လၢ သဝီထံလၢၢ်ဟ့ တဖၣ်လီၤ. ဝံၤစီၤက့ၣ်မၢ ဒီပုၢ်ဝဲၢ်တဖၣ် ဘါထုကဖၣ်လၢ ခရံာ်အတၢ်သးခု ကစီၣ် ကလုၢ်ဘၢကွံာ် ကီၢ်ယူၣ်တရၣ် အံၤလီၤ.
တၢ်ဘါဝံၤ နဲၣ်စူဧၢ် ကတိၤသကိး လိာ်သးဒီး စီၤက့ၣ် ယံာ်မး ဒီနၣ်ရံၣ် ညါလီၤ. လၢယွၤ အတၢ်မၤစၢၤအဃိ တၢ်ပရၢအံၤ ပှၤဆါဘၣ် အါန့ၢ်ဒံး အလီၢ်ခံစး, တနံၤ အဘ့ၣ်သၢကလးဘျဲၣ်လီၤ. မံးရှၢၣ်နရ့ၣ်အသီ သရၣ်လ့ခၢၣ်တဂၤ ဖီၣ်ထီၣ်က့ၤ တၢ်ကွဲးလၢ ကဘျံးပၤ တၢအဂီၢ်လီၤ. အဝဲတချုးကဲထီၣ် မံးရှၢၣ်နရ့ၣ် တဂၤ မၤအဲးဒံးထၢၣ် တၢ်မၤလၢ ကီၢ်အမဲရကၤ ဝ့ၢ်တဖျၢၣ်ဒီး ကွဲးတၢ်ဂ့ၤမးလီၤ. တၢ်ပရၢအံၤ အိၣ်ဒီး အဒုၣ်အဒါ စ့ၢ်ကီးလီၤ. ပှၤဟဲဟုၣ် ဒွဲၣ်ထီၣ် တၢ်မၤတၢးခံဘျီဘၣ်ဆၣ် ပှၤထံၣ်န့ၢ်ဆိဒီး မၤသံကွံာ် မ့ၣ်အူလီၤ. ကရၢပၢၢ်ထီၣ် အသီတဖု, ကရၢခူသူၣ် အမံၤလၢ “ပယိၤဂီၤကရၢ” လီၤ. ဟးမၤပျံၤမၤဖုး ပှၤထံဖိကီၢ်ဖိတဖၣ် ဒ်သိး သုတကဲထီၣ် ပှၤခရံာ်ဖိတဂ့ၤလီၤ. ဒိတီၢ်ပှၤကဲထီၣ်သီ ပှၤခရံာ်ဖိ တဘျုးဂၤလံ. သနာ်က့ ြတီဝဲ တန့ၢ်ဘၣ်. နဲၣ်စူဧၢ် အနီၢ်ကစၢ် န့ၢ်ဘၣ်လံာ်ပရၢ အါဘ့ၣ်လၢ ကရၢအံၤ အအိၣ်, သါကမၤသံကွံာ်အီၤလီၤ. တနၤဖဲ နဲၣ်စူဧၢ် က့ၤဆူဟံၣ် အခါ ပှၤခံဂၤဟဲလူၤ ပိာ်အခံလီၤ. အဝဲထုးထီၣ်ပၢၤကီၢ် အတၢ်အူကလံၤဒၢဖိ ဒီးအူပိၢ်သံးအီၤ ဒီးပၢၤကီၢ်အဘူးအတံၢ်ခံဂၤ ဟဲဃ့ၢ်ဒီး ပှၤအၢဖိခံဂၤ ထွးထီၣ်ဃ့ၢ်ကွံာ်လီၤ. စီၤပၤဖီၣ်ထီၣ် တၢ်ဂ့ၢ်အံၤ ဒီး ဖါလ့မဲ ဒုးအိၣ်ထီၣ် သဲစးလၢ အြတီကရၢအံၤလီၤ. ကရၢဖိ တဖၣ် တၢ်ဖီၣ်အီၤမ့ၢ်န့ၢ် ဒီး တၢ်ကစံၣ်ညီၣ် အီၤလၢ တၢ်မၤသံန့ၣ်လီၤ.
နဲၣ်စူဧၢ် ဟံးစုကွၢ်မဲာ် စီၤက့ၣ်ဒီးစံး, “စီၤက့ၣ်ဧၢ, ပလီၢ်နသး တက့ၢ်. နမ့ၢ်နီၣ်ဂံၢ် တၢလၢ ကရၢအံၤ အစရီပူၤလီၤ. သးအိၣ်မၤသံနၤလီၤ.”
“တၢ်ဘျုးလီၤနဲၣ်စူဧၢ်ဧၢ, ယစံးဒ် ဒီးကထၢၣ်လ့ဘ့းစတိ အသိးလီၤ. တၢ်မၤလၢ ယွၤပာ်လီၤ လၢယစုပူၤအံၤ, ယမၤအီၤ တချုးဝံၤမနုၤမး မၤဟးဂီၤ ယၤတသ့ဘၣ်.”
သရၣ်ဝ့လယၢၣ် တဘှီ ထီၣ်ကၠိဘၣ်. ဒ်တၢ်ခိၣ်တၢ်နၢ်လၢ အမဲရကၤ တခီဟ့ၣ်ကူၣ် အီၤအသိး, ငါန့ၢ်တၢးဖးဒိၣ် အိၣ်ခံကထၢတဖျၢၣ်, အဖီခိၣ် တခီပှၤကၠိဖိအိၣ်, အဖီလာ်တခီန့ၣ် ကၠိလီၤ. ဘူးဒီး သရိာ် ဒီးနဲၣ်ဘူနး အဟံၣ်လီၤ. သရၣ်ဒီးမးမး ဝ့လယၢၣ်, သရၣ်ဒီး မးမးလ့ခၢၣ်, နဲၣ်ဘူနးဒီး ဒီးကထၢၣ်ခၠါလ့ၣ် တဖၣ် ကမၤသကိး တၢ်လီၤ. ကၠိဖိ ဟ့ၣ်လီၤ မံၤတကယၤ ဘျဲၣ်လံ. ကၠိအံၤမ့ၢ် လွံၢ်နံၣ် ကၠိစ့ၢ်ကီးလီၤ.
တၢ်တ့တၢ်ဖျီ ခၠါလ့ၣ် ဒီးအဲၣ်ရံဝံၤ လၢခံတနံၤ, သရၣ်ဒီးမးမး ဝ့လယၢၣ်, သရၣ်ဒီး မးမးလ့ခၢၣ်, သးပှၢ်တီဝူ, အမါ, မ့ရ့ၣ် ဒီးဖိသၣ် စီၤက့ၣ်ဒီး နီၢ်ထူ, နဲၣ်လူဘၢ် ဒီးအဲးဒံးထၢၣ် နဲၣ်စူဧၢ် တဖၣ် လဲၤဆူလၢၢ်ဟ့ ဒီးစံာ်ဖးလဲၢ် လီၤ. လၢလၢၢ်ဟ့ တခီ ြဖၣ်သူဝါ, သးပှၢ်စ့ဟိၣ် ဒီးဒီပုၢ်ဝဲၢ် တဘျုးဂၤ ပိာ်ထွဲထီၣ်အခံလီၤ. ဒီပုၢ်ဝဲၢ် ပှၤကညီ ယဲၢ်ကထိ ဘျဲၣ် အိၣ်ခိးလီၤအခိၣ် ဖဲသိလ့ၣ် သန့ဒီး တၢ်သူၣ်ဝံၣ်သးဆၢလီၤ. ကၠိဘျီၣ်ဒိၣ် တြတီၢ်ဘၣ်အဃိ, ပှၤဘှီဃာ်တၢ်ဒုး ခိၣ်ဖးဒိၣ်, ဒါလီၤဘုလီၢ်လီၤ. ပှၤသူစဲးမၤဒိၣ် ထီၣ်တၢ်ကလုၢ်လီၤ. သရၣ်ဝ့လယၢၣ် စံၣ်တဲၤတဲလီၤ တၢ်ဂ့ၢ်, “ကစၢ်ခရံာ်နာ်န့ၢ် ပှၤလၢ အဘီအမုၢ်အဂီၢ်” မုာ်မး, ပှဲၤမးဒီး သးစီဆှံ အစိကမီၤလီၤ. သရၣ်ခ့ရ့ၣ် ဘါထုကဖၣ် အးလီၤကၠိအံၤဆူ ယွၤအစုပူၤလီၤ. သရၣ်လ့ခၢၣ် ဘါထုကဖၣ် လၢကၠိသရၣ်, ကၠိဖိဒီး ပှၤကညီ ခရံာ်ဖိတဖၣ် အဂီၢ်လီၤ. တၢ်ဒိးပာ်စုဃုာ် ခၠူ၀ၣ် တဘျီဃီ လၢစီၤက့ၣ် အတၢ်ဆှၢနုာ်အဃိ, ဒီးသရၣ် မးမးတဖၣ် သးမံစဲဃဲၤ လၢအဖီခိၣ် အဃိန့ၣ်လီၤ. မးမးခံဂၤ သးဝံၣ်ဒူအဲးမုာ်မး, ခွါယၢၣ် စ့ၢ်ကီး မုာ်မးလီၤ. သရၣ်စီၤစ့ ဆိၣ်ဂ့ၤပျၢ်တၢ်လီၤ.
ပှၤအိၣ်လၢ တၢ်အယံၤတဖၣ် ကၢၣ်ကီၣ်တၢ်လီၤဆီ တမံၤလီၤ. တၢ်အၢၣ်တလိၣ် ဟဲအိၣ်ဂၢၢ်ဖဲ ကၠိဖီခိၣ် အံၤ ဒီးအခၢၣ်သး တခီ တၢ်ဆဲးကြပုၢ်လီၤဆူ ကၠိဖီခိၣ်လိၤလိၤလီၤ.
ဖးအကူာ် ၁၆ ဖဲအံၤ
