လူၤ ၉း၂၃, ပှၤမ့ၢ်မိၣ်ပိာ်အသး လၢယခံတဂၤဂၤန့ၣ်, မ်အညိကွံာ်အသး ဒၣ်ဝဲ ဒီးယိးထီၣ်အထုၣ်စုညါ ကိးမုၢ်နံၤမုၢ်နၤ ဒီးပိာ်ယခံတက့ၢ်.
ပှၤဒီပုၢ်ဝဲၢ်ဖိခံဂၤ ဘုၣ်ထိၣ်လွံၢ် တဂၤတဘ့ၣ်ဒီး ပၢနုာ်ဝဲလၢ ြတၤပူၤလီၤ. အဲၣ်ဝဲဂ့ၤမး, ဒုးအီၣ်ဝဲ အဆၣ်, ဖှူးလဲးဖှူးသူဝဲ ဒီး ဂဲၤလိာ်ကွဲဒီးအီၤ ကိးနံၤလီၤ. ပှၤဒီဟံၣ် အဲၣ်ထိၣ်ခံဘ့ၣ်အံၤလီၤ. ဘၣ်ဆၣ် အဆၢကတီၢ် တုၤဝဲလၢ ထိၣ်လွံၢ်အကျါတဘ့ၣ် ကိးဝဲ အမံၤလၢ ဖီး (pop) ဆါထီၣ်ဝဲဒီး သံဝဲ ဒီးအသကိးတဘ့ၣ် ကိးဝဲ အမံၤလၢ အီၤလံး (Olive) အိၣ်တ့ၢ်ဝဲ သယုၢ်သညိလီၤ. တမၤသီၣ် ကလုၢ်လၢၤဘၣ်. တသးဝံၣ် တၢ်လၢၤဘၣ်. တဂဲၤလၢၤဘၣ်. အိၣ်ဝဲ ဘှ့ၣ်ကလာ်လီၤ. ပှၤဟံၣ်ဖိခဲလၢာ် သါကညီၤ အီၤလံး, ဒီးစံးဝဲ လၢ အကပျၢ်ကွံာ် ထိၣ်တဘ့ၣ်အံၤလီၤ. အဝဲသ့ၣ်စိာ်ထီၣ် အြတၤဆူ တၢ်ချၢဒီး အိးထီၣ်ြတၤ အြတဲၤ လၢအကယူၤထီၣ် ဝဲ အဂီၢ်လီၤ. တၢ်ထုးထီၣ်အီၤလၢ တၢ်ချၢ ဘၣ်ဆၣ် အိၣ်ဖဲအလီၢ်လီၤ. တယူၤလၢၤဘၣ်. အဂ့ၢ်မ့ၢ်ဝဲလၢ အယူၤတသ့ဘၣ် န့ၣ်လီၤ. အိၣ်ဆူၣ်အိၣ်ချ့ ကစီဒီ လီၤ. ဘၣ်ဆၣ် အိၣ်လၢ ြတၤပူၤ တဘျုးလါဒီး တယူၤလိအသး နီတဘျီဘၣ် အဃိ, ယူၤဝဲ တသ့လၢၤဘၣ်.
အဝဲအံၤ လီၣ်ဖျါထီၣ်ဝဲလၢ တၢ်သ့တၢ်ဘၣ်လၢ ယွၤဟ့ၣ်လီၤပှၤတဖၣ် ပဘၣ်သူအီၤ, ပဘၣ်ဒုး ဟူးဒုးဂဲၤအီၤ ဒီးမၤဂ့ၤထီၣ် အီၤတခီလီၤ. ပမ့ၢ်တမၤ ဘၣ်ဒီး တၢ်သ့တၢ်ဘၣ်အံၤ ကလီၤဝီၢ်ရၢဝဲ ဒီး ဟးဂီၤကွံာ် လီၤ. ထိၣ်ကဘၣ်ယူၤဝဲ, ညၣ်ကဘၣ် တိၤလၢထံကျါ, ပှၤဖိသၣ်ဖျဲၣ်ထီၣ်သီ ကဘၣ်ဟးလိအသး, ကတိၤလိတၢ်လီၤ. မ့ၢ်တမၤဝဲဒီး သ့ထီၣ်ဒၣ်အတၢ် တသ့ဘၣ်.
ခရံာ်စံးဝဲ လၢ ပှၤခရံာ်ဖိကဘၣ်ယိး အထူၣ်စုညါ ကိးမုၢ်နံၤ မုၢ်နၤလီၤ. မ့ၢ်တယိး ဝဲကိးနံၤဘၣ်ဒီး ယိးတၢ်ဃၢတူၢ်တၢ်ကီတၢ်ခဲ လၢခရံာ်ဖိ ကဘၣ်ယိးဝဲ တူၢ်ဝဲ တန့ၢ်တသ့ဘၣ်. တၢ်မၤလိသး, တၢ်ထိၣ်ဟူးထိၣ်ဂဲၤ တၢ်ကဘၣ် အိၣ်ဝဲထီဘိလီၤ. ပှၤတဂၤ ဘၣ်ယိၣ်ဝဲလၢ အသးမ့ၢ်ပှၢ်ထီၣ် ခဲကိာ် န့ၣ် အမဲာ်တထံၣ်လၢၤ တၢ်ဘၣ်အဃိ, စံးဝဲလၢ သါကသူသါမဲာ်ချံ ထဲတခီဒီး အဝဲတခီ သါကပာ်ကီၤအီၤလီၤ. သါကသူထဲ တခီဧိၤ တုၤသါမ့ၢ်တထံၣ် လၢၤတၢ်ဘၣ်ဒီး သါကသူက့ၤ လၢအအိၣ်တ့ၢ် တခီန့ၣ်လီၤ. အဃိမၤဘၢဃာ် အမဲာ်ချံ တခီ, ဒီးတသူဝဲ လၢခံနံၣ်အတီၢ် ပူၤလီၤ. တုၤအအိးထီၣ် အတၢ်ကျၢၢ်ဘၢမဲာ်န့ၣ်, သ့ၣ်ညါဘၣ်ဝဲလၢ အတထံၣ် တၢ်လၢၤဘၣ်န့ၣ်လီၤ. ပဘၣ်သူ တၢ်လၢယွၤဟ့ၣ်ပှၤလၢ ပမၤအီၤသ့တဖၣ် ကိးနံၤဒဲးလီၤ.
