ယၤကိာ် ၄း၁၀, ဆီၣ်လီၤသုသးလၢ ကစၢ်အမဲာ်ညါ တက့ၢ်. ဒီးကပာ်ထီၣ်ထီ သုလီၤ.
ကၠီန်ဝဲးစလ့ၣ် (John Wesley) ပှၤလၢအဒုးအိၣ်ထီၣ် ဖှံထံကရၢ (Methodism) အိၣ်ဒီး အပျဲၢ်လၢ အမၤအတၢ် မၤလၢ အမံၤမ့ၢ်စ့ၢ်ကီး ဝဲ ကၠီန်န့ၣ်လီၤ. ပျဲၢ်တဂၤအံၤ အဲၣ်အသရၣ်ဒိၣ်မး, မ့ၢ်ဘၣ်လဲၤလၢမ့ၣ်အူကျါ ဂ့ၤထံကျါဂ့ၤ, ကလဲၤဝဲဒၣ်လီၤ. အဂ့ၢ်မ့ၢ်လၢ အဝဲထံၣ်သ့ၣ်ညါခရံာ် အတၢ်အဲၣ်လၢ သရၣ်တဂၤအံၤ အဃိလီၤ. ဘၣ်ဆၣ် ပျဲၢ်တဂၤအံၤ အခိၣ်ကိၤ, အိၣ်ဒီးသးလၢ အအဲၣ်ဒိး ထီဒါတၢ်အဃိ, တဘျီဘျီ ကဲထီၣ် တၢ်ကီလၢ သရၣ်အံၤအဂီၢ် န့ၣ်လီၤ.
ဘၣ်တဟါ သရၣ်အံၤ မၢအပျဲၢ်လဲၤစိာ် တၢ်ပရၢလၢ အတၢ်ဂ့ၢ်ဒိၣ်ဝဲတဘ့ၣ် ဆူပှၤတဂၤအအိၣ် တဘျီဃီ န့ၣ်လီၤ. အပျဲၢ်တဲဆၢအီၤလၢ အကဆှၢန့ၢ်အီၤ လၢမုၢ်ဆ့ၣ်ထီၣ်တနံၤ ဒီး တမ့ၢ်လၢ အကစဲၤခံဘၣ် န့ၣ်လီၤ. အဂ့ၢ်မ့ၢ်လၢ အဝဲအဲၣ်ဒိး ကနၣ် အသရၣ်ဝဲးစလ့ၣ် ဟီတရါ တဟါန့ၣ် အဃိလီၤ. အဝဲစံးဘၣ် အသရၣ်, ဒ်နီၢ်မၤရံ ဃုထၢတၢ်လၢ အလိၣ်ဒိၣ်တမံၤ အသိးန့ၣ်, မ့ၢ်ယတြကၢးမၤယဲ ဘၣ်ဧါ. တြကၢးလၢ အကလဲၤပူၤယၤဘၣ်. အသရၣ် အသးအ့န့ထီၣ်ဒီး တဲအီၤ, မ့ၢ်နတဖးဘၣ်လၢ ဒိကနၣ်တၢ်န့ၣ် ဂ့ၤန့ၢ်လုၢ်တၢ် တက့ၢ်ဘၣ်ဧါ. အပျဲၢ်တဲကဒီးဝဲ လံာ်ပရၢအံၤ ယကလဲၤဆှၢခဲမုၢ်ဆ့ၣ်ချ့ချ့လီၤ. မ့မ့ၢ် တဟါအံၤ ယကလဲၤ ဒိကနၣ် နတၢ်ဟီတရါလီၤ. သရၣ်ဝဲးစလ့ၣ် အသးဒိၣ်ဝဲဒီး တဲအီၤ, “ကၠီန်ဧၢ နမ့ၢ်တလဲၤဆှၢ ယတၢ်ပရၢ တဟါဃီအံၤ ဘၣ်ဒီး ပကဘၣ်လီၤဖးလီၤ.” တဲဝဲဝံၤ ဒိးထီၣ်အကသ့ၣ်ဒီး လဲၤဆူတၢ်ဘါ အလီၢ်လီၤ. ဖဲအဟီ တရါအခါ သရၣ်အံၤ ထံၣ်ဝဲလၢ အပျဲၢ်န့ၣ်ဆ့ၣ်နီၤ ဒိကနၣ်အတၢ်ကတိၤ လၢပှၤအဂၤတဖၣ် အကျါလီၤ.
မုၢ်ဆ့ၣ်ထီၣ်န့ၣ် ကၠီန်ပာ်လီၤ န့ၢ်အသရၣ်ဂီၤတၢ်အီၣ် ဒ်အညီနုၢ်အသိး, ဘၣ်ဆၣ် တဖျါလၢ အအိၣ်ဒီး တၢ်ဆဲးတၢ်လၤဘၣ်. အသရၣ်တဲအီၤကၠီန်ဧၢ, မ့ၢ်နတနၢ်ပၢၢ် တၢ်လၢ ယတဲနၤလၢ ပကဘၣ်လီၤဖး န့ၣ်ဘၣ်ဧါ. မ့ၢ်နလဲၤဆှၢ တၢ်ပရၢလၢ အရ့ဒိၣ် တဘ့ၣ်န့ၣ်လံဧါ. အပျဲၢ်တဲဆၢဝဲ, ယတလဲၤဒံးဘၣ်. ယကူၣ်ထီၣ်လၢ ယကလဲၤဆှၢ တနံၤအံၤလီၤ. သရၣ်တဲလီၤတံၢ်ဝဲ, မ့မ့ၢ်ဒ်န့ၣ်ဒီး ပဘၣ်အိၣ်လီၤဖးလီၤ. ကၠီန်တတဲဆၢ တၢ်ဘၣ်. ဘၣ်ဆၣ် အသရၣ်အတၢ်ကတိၤ ဆဲးနုာ်တၢ်လၢ အသးပူၤယိာ်မး လီၤ. အမဲာ်လီၤမှဲၤဝဲလီၤ.
သရၣ်တဲအီၤ, ကၠီန်ဧၢ, နကဃ့ကညးယၤဧါ. တဲဆၢဝဲ ယတဃ့ကညးနၤဘၣ်. နတၢ်မၢတခါအံၤ ကိၢ်ဂီၤ နးမး လၢယဂီၢ်လီၤ. မ့ၢ်ဒ်န့ၣ်ဒီး ယအဲၣ်ဒိးဃ့ကညး နၤတခီ, ယတၢ်ကတိၤတၢ် ဒီးနၤမဟါန့ၣ် ရၢၢ်စၢၢ်တစဲး ဒီး တလဲၤဝဲဒ် ခရံာ်ဖိတဂၤဘၣ်. မ့ၢ်နကဝံသးစူၤ ယၤဧါ. ဒီးအသရၣ် ယူာ်ဃီၤအစုဆူ အအိၣ်, ဒီးကၠီန် အသးဘၣ်ထံးဝဲ, ဟံးစုဆၢက့ၤ အသရၣ်ဃံးဃံး ဒီးနၢမူဝဲ အိၣ်ဒီးတၢ် ဝံသးစူၤ အမဲာ်ထံတဖၣ် လီၤ. လီၢ်ခံန့ၣ် ကၠီန် အခိၣ်တကိၤလၢၤဘၣ်. အသရၣ် အတၢ်ဆီၣ်လီၤသး ဒုးအိၣ်ထီၣ် တၢ်လဲလိာ်လၢ အသးပူၤလီၤ.
