စံး ၁၁၉း၉, ပှၤဖိၣ်သၣ်ခွါကမၤကဆှီအကျဲဒ်လဲၣ်. မ့ၢ်အဘၣ်ပလီၢ်အသးဒ် နကလုၢ်ကထါ အသိးန့ၣ်လီၤ.
စီၤယိၤသး ဘၣ်တၢ်ကလံၣ်န့ၢ်အီၤလၢ အကစၢ်စီၤပိၤတံၤဖၢ် အမါလၢ အကမံ ဃုာ်ဒီး အီၤလီၤ. ဘၣ်ဆၣ် အဝဲတအၢၣ်လီၤ ဝဲဒီး မၤတၢ်ဒဲးဘးအံၤဘၣ်. အကစၢ် မုၣ်အုၣ်အသး ကဘျံးကဘျၣ် လၢအဖီခိၣ် ဒီး တၢ်ပၢနုာ်အီၤလၢ ဃိာ်ပူၤလီၤ. စီၤယိၤသး ဆၢထၢၣ် တီတီဒီး ဂၢၢ်ဂၢၢ်လၢ တၢ် လၢအဘၣ်အတီ အဂီၢ်လီၤ. စီၤဒၤနံးယ့လး တအီၣ်စီၤပၤ အတၢ်အီၣ်ဒီး တတီၤလီၤ ကဒွံကျိာ် လၢပှၤဘါတၢ်ဂီၤ အကစၢ်အမဲာ်ညါ ဘၣ်. မ့မ့ၢ် ဘါအကစၢ်ယွၤ တနံၤသၢဘျီကိးနံၤဒဲးလီၤ. လၢအဟံး ဃာ်အတၢ်နာ်အံၤ အဃိ ဘၣ်တၢ်တ့ၢ်လီၤ အီၤလၢ ခ့ယုၢ်အကပိၤပူၤလီၤ. ဘၣ်ဆၣ် ခ့ယုၢ် တအဲးထီၣ်အထးခိၣ် ဒီးအီၣ်အီၤဘၣ်.
ကၠိဖိအသီတဂၤ လဲၤအိၣ်ဝဲလၢ ဘီဒၢၣ်တဖျၢၣ် လၢကၠိဖိအိၣ်လံ ၁၂ ဂၤန့ၣ်လီၤ. ဖဲအကမံဝဲန့ၣ်, အဝဲတီၤလီၤ လၢခီၣ်လ့ၢ်ခိၣ် ဒီးဘါထုကဖၣ် တၢ်လီၤ. ကၠိဖိတဂၤ ကွံာ်အီၤလၢ ခီၣ်ဖံးဒီး အဂၤတဖၣ် ဒုၣ်ဒွဲၣ်ဒီး နံၤဘၣ် ဖၣ်လဲအီၤလီၤ. အဝဲဘါထုကဖၣ် ဒၣ်တၢ်ကိးနံၤ ဒီး တတဲဆါပှၤဂၤဘၣ်. လၢခံကတၢၢ် ပှၤဘီဒၢၣ်ဖိ တဖၣ် အသးဘၣ်ဒိ လၢကၠိဖိအသီတဂၤအံၤ အတၢ်ပာ်သူၣ်ပာ်သးဒီး အဝဲသ့ၣ် ရ့အီၤဒီး ကဲထီၣ် တံၤသကိး အဂ့ၤတဖၣ် လၢအဂီၢ်လီၤ.
တၢ်ပျံၤပှၤဂၤတဖၣ် အတၢ်ဒုၣ်ဒွဲၣ်ဒီး အတၢ်နံၤဘၣ်ဖၣ်လဲပှၤန့ၣ် မ့ၢ်ဝဲပှၤအသုၣ် လၢအပျံၤတၢ် အလုၢ်အလၢ် လီၤ. ပှၤကလုာ်ဂၤကိး ဒုၣ်ဒွဲၣ်ပှၤလၢ ပမ့ၢ်ပှၤကညီ, ပှၤလီၤရၢၢ်လီၤစၢၢ်လီၤ. ပအၢၣ်လီၤ လၢပမ့ၢ် ပှၤကညီဖိ, ပပာ်ကဖၢလၢပသးလၢ ပအိၣ်ဒီး ပသကဲာ်ပဝး လၢအဂ့ၤဝဲလီၤ. ပှၤကိးပှၤလၢ ပှၤခရံာ်ဖိ, ပသး တဆါဘၣ်. ပဘါယွၤလၢအမူဝဲထီဘိတဂၤ လီၤ. ပဘၣ်ဆၢထၢၣ်ဂၢၢ်ဂၢၢ်လၢ တၢ်လၢအဘၣ်ဝဲတီဝဲ အဂီၢ် လီၤ.
