၁ ယိၤဟၣ် ၅း၄, “ … တၢ်မၤနၢၤလၢအမၤနၢၤဟီၣ်ခိၣ်မ့ၢ်အအံၤ, ပတၢ်နာ်လီၤ.”
တၢ်နာ်စံးတၢ်န့ၣ်, မ့ၢ်တၢ်နာ်ယွၤဒီး စူၢ်အီၤဒီး တၢ်နာ်န့ၢ်အတၢ်သူတၢ်ပှိၤတဖၣ် လဲလၢာ်န့ၣ်လီၤ. ဒ်သိး ဖိသၣ် ကွၢ်ထီၣ်တၢ်ဆူအပၢ်အအိၣ်, အိၣ်ဒီး တၢ်နာ်န့ၢ်အီၤခဲလၢာ်အသိး, ပှၤခရံာ်ဖိတဖၣ် ြကၢးစူၢ်ပၢ်လၢမူခိၣ် လၢာ်လၢာ်ဆ့ဆ့ခီဖျိ တၢ်နာ်န့ၣ်လီၤ.
လၢကီၢ်ကၠၢမန့ၣ် အပူၤ ဖိသၣ်အဖှီၣ်အိၣ်ဝဲတဂၤ လၢအအဲၣ်ဒိးလၢအကမၤလိ ဘၣ်လံာ်လၢခရံာ်ဖိ အကၠိ (Moravian School) ဒိၣ်ဒိၣ်ကလဲာ်န့ၣ်လီၤ. အပၢ်သံသဒၣ်အီၤဒီး အမိၢ်မုၣ်ကမဲ ဖှီၣ်မးလီၤ. ဟ့ၣ်ကၠိလဲလၢ အဂီၢ်တန့ၢ်ဘၣ်. ဖိသၣ်အံၤနာ်ဝဲ လၢယွၤကဒိကနၣ် ဒီးစံး ဆၢအတၢ်ထုကဖၣ်လီၤ. အဝဲကွဲးတၢ်ပရၢဆူ ခရံာ်လၢအအိၣ်လၢမူခိၣ်အအိၣ် ဒ်အံၤ, “ယခရံာ်သးဘိဧၢ, ယမိၢ်ဒီး ယၤပဖှီၣ်နးမး လီၤ. ယသ့ၣ်ညါလၢ နဲနထူးနတီၤလီၤ. နတဲလံပှၤလၢ ပမ့ၢ်ဃ့တၢ် တမံၤလၢ်လၢ်လၢနမံၤ န့ၣ်, ပပၢ်လၢမူခိၣ် ကဟ့ၣ်ပှၤလီၤ. ယကစၢ်ခရံာ်ဧၢ ယနာ်နတၢ်အၢၣ်လီၤအီလီၤ အံၤလီၤ. ယဃ့ဘါထုကဖၣ်လၢ နကဆှၢန့ၢ်ယမိၢ်အစ့ဒ်သိး ယကမၤလိဘၣ်တၢ်လၢ ခရံာ်ဖိအကၠိ အံၤအပူၤန့ၣ်လီၤ. ယအဲၣ်ဒိးသပှၢ်ပှၢ်လၢ ယကဘၣ်တၢ်သိၣ်လိယၤ လၢခရံာ် ဖိအသရၣ်တဖၣ် န့ၣ်လီၤ. ယအဲၣ်နၤ ဒိၣ်မးလီၤ. တၢ်ဘျုးလီၤ.”
ပှၤပၢၤတၢ်ပရၢ အဝဲၤဒၢးခိၣ် ဖးတၢ်ပရၢအံၤဒီး ဆှၢဝဲဆူ မိၣ်ရၤဘံၤယၤ ကရၢအကရၢခိၣ် အအိၣ်လီၤ. ဖဲကရၢအံၤအိၣ်ဖှိၣ်ဝဲဒီး တၢ်ဖးဖျါထီၣ်ဖိသၣ် အတၢ်ပရၢအံၤ ဒီးကတိၤဝဲလၢအဂ့ၢ်အခါန့ၣ် တူၢ်ဒိၣ်မုၣ်တဂၤလၢ အမ့ၢ်ပဒိၣ်ဟီၣ်ခိၣ်ကစၢ် အမါအိၣ်ဝဲတဂၤလီၤ. အဝဲအၢၣ်လီၤဝဲလၢ အကမၤစၢၤဖိသၣ်အံၤ လၢအကအိၣ် ဘၣ်ဝဲလၢကၠိတုၤ အတၢ်မၤလိကတၢၢ် တစုန့ၣ်လီၤ.
ကစၢ်ယွၤဒိကနၣ်ဒီး နၢ်ဟူပတၢ်ထုကဖၣ် လၢအအိၣ်ဒီး တၢ်နာ်ထီဘိန့ၣ်လီၤ. စီၤပီလူး ပာ်ဖျါဝဲလၢ ခရံာ်ဖိအ ဃိးကတီၤ ဘိးဃၣ်ကွံာ် ပျၢ်စုၣ်တဖၣ်လီၤ. ပမ့ၢ်သိးထီၣ်တၢ်နာ် အကတီၤဒီး တၢ်မၤနၢၤ ပှၤတသ့ နီတဘျီဘၣ်. တၢ်နာ်မ့ၢ်ဝဲ တၢ်မၤနၢၤလၢ အမၤနၢၤဟီၣ်ခိၣ်န့ၣ်လီၤ.
