လူၤ ၃း၁၁, ပှၤလၢအဆ့ အိၣ်ဝဲခံဘ့ၣ်န့ၣ် မ်အနီၤဟ့ၣ်ပှၤလၢ အတၢ်တအိၣ်ဘၣ် တက့ၢ်.
စီၤယိၤဟၣ်လၢ အမ့ၢ်ခရံာ်အတခွါ ဒီးမ့ၢ်ပှၤလၢ အကတဲာ်ကတီၤကျဲ လၢခရံာ်ကမၤဘၣ် တၢ်သးခုကစီၣ် အဂီၢ်လီၤ. ပှၤလုၢ်တၢ်ဒိၣ် လၢယရူၤရှလ့ၣ် သံကွၢ်အီၤ လၢအမ့ၢ်မ့ၤရှံအၤ ဧါန့ၣ်, အဝဲစံးဆၢ ဝဲဖဲ ယိၤဟၣ် ၁း၂၃, ယမ့ၢ်ပှၤလၢ အကိးထီၣ်လၢ ပှၢ်မုၢ်ကနၢ အကလုၢ်သီၣ်, မၤလိၤက့ၤ ကစၢ်အကျဲဧိၤကပူၤဧိၤ တက့ၢ်. ပှၤသံကွၢ်ကဒီးအီၤ, ပဘၣ်မၤဒ်လဲၣ်. စံးဆၢဝဲ လၢတၢ်အခီၣ်ထံး ကတၢၢ် တမံၤလၢ ပှၤကဘၣ်မၤဝဲန့ၣ်, မ့ၢ်ဝဲတၢ်ကလုၢ်ထူ လၢတနံၤအံၤ အဂီၢ်န့ၣ်လီၤ. ပဘၣ်နီၤလီၤ တၢ်ဆိၣ်ဂ့ၤ လၢပန့ၢ်ဘၣ်အီၤ တဖၣ်န့ၣ်လီၤ.
ပှၤဖိသၣ်တဂၤ အမံၤကၠိစဲး အဝဲမၤထွဲ စီၤယိၤဟၣ် အတၢ်မၤလိာ်လီၤ. အဝဲလိာ်ကွဲလၢ ထံလီၤသကၤ အဖီခိၣ် ဒိးဝဲခီၣ်ဖံး တကလုာ်ကိးဝဲလၢ စက့း (skates) လၢအအိၣ်ဒီး အပၣ်န့ၣ်လီၤ. အဝဲဒိးလိာ်ကွဲ စက့းအခါ ထံၣ်ဝဲပှၤဖိသၣ်အဃဲၤအဃိ တဂၤ အိၣ်ဒီး အစက့းလၢ အထီၣ်အ့ၣ် ထီၣ်ဃး ဒီးကျဲးစၢး ထီထီၣ်ဝဲ အပျံၤ လၢအခီၣ်နၢၣ်ခံ န့ၣ်လီၤ. အပျံၤတဂ့ၤလၢၤ ဘၣ်ဒီး ထီၣ်တဲာ်ခဲအံၤ ခဲအံၤလီၤ. ကၠိစဲး ကွၢ်ဒီး အသးအိၣ်အီၤဒီး စံးဝဲ, သိၣ်ဧၢ, ယဆိကမိၣ် ယပျံၤတဘိအံၤ ကဂ့ၤန့ၢ်နပျံၤလီၤ. အဝဲ ထုးထီၣ်ပျံၤလၢ အကျၢၤတဘိ ဒီးစၢထီၣ်စၢၤ ဝဲဖိသၣ် အံၤအစက့း န့ၣ်လီၤ. ဝံၤဒီးတဲအီၤ, တၢ်ဂိၢ်ထဲအံၤညါ န့ၣ်နြကၢးကၤနဆ့ ကၤအလၢၤန့ၣ်လီၤ. ဖိသၣ်န့ၣ်တဲအီၤ, ယမိၢ်မၤန့ၢ် ယၤဆ့ကၤဖီခိၣ် အလၢၤတန့ၢ်ဘၣ်. အတိၢ်အိၣ်တဆံးတက့ၢ်, ထဲအပှ့ၤတၢ်အီၣ်ဒီး တလၢဘၣ် အဃိ ပဟဲလီၤတဆီတဆီ တုၤလၢ ဖဲအံၤလီၤ. ယပၢ်ဟဲပိာ်စိၢ်ပှၤ ဒီးအဝဲ ဃုတၢ်မၤ တန့ၢ်ကီးဘၣ်.
ထဲန့ၣ် ဒီးဖိသၣ် ဒိးလိာ်ကွဲ ကွၢ်အစက့းလၢ ကၠိစဲး ထီထီၣ်န့ၢ်အီၤ အပျံၤဒီး ကၠိစဲးကွၢ်ဝဲ ဒီးဆိကမိၣ်ဝဲ လၢအသး, ပှၤဖိအံၤ ဒိးစက့း သ့န့ၢ်ယၤ တကဘုးဘၣ်. သံကွၢ်ဝဲ, သိၣ်ဧၢ, နလဲၤမၤလိ နသး တၢ်ဒိးစက့းဖဲလဲၣ်. ယကမၤလိလၢ နအိၣ်တခီ. ဖိသၣ်တဲအီၤ, ပဝဲပအိၣ်လၢ ကလံၤစိး ခဲနဒၣ်, တၢ်ဂိၢ်ဒိၣ်မးလီၤ. နိၣ်ဖးဒိၣ် လၢပအိၣ်ဘူး အီၤန့ၣ် လီၤတကၤဝဲ ယံာ်မးအဃိ, ပလဲၤဒိးလိပသး စက့းဖဲ န့ၣ်လီၤ. တၢ်ဂိၢ်ဒိၣ်မးဒီး ပမ့ၢ်ဒိးစက့းန့ၣ် ပလၢၤထီၣ်က့ၤတစဲးလီၤ. ကဲယကဒုးနဲၣ်နၤလၢ ပဒိးစက့းလၢ ထးခီန့ၣ်ဒ်လဲၣ် န့ၣ်လီၤ. ကၠိစဲး မၤလိန့ၢ်တၢ်ဒိး စက့းလၢ ဖိသၣ်အံၤအအိၣ်ဒီး အသးခုဝဲလၢ အသ့ထီၣ်ဝဲအဃိ ဒီးတဲအီၤ, သိၣ်ဧၢ, ဟဲပိာ်ယခံလၢ ယဟံၣ် မ့ၢ်တၢ်အီၣ်ကအိၣ်ကီး တမံၤမံၤ လၢပကအီၣ်အဂီၢ်ဧါ. ကၠိစဲး အမိၢ်ဒုးအီၣ်အဝဲသ့ၣ် တၢ်အီၣ်လၢအအိၣ်, ဒီးဖိသၣ်အံၤ အီၣ်ဝဲလၢအီၣ်လၢအီလီၤ. ၀ံၤဒီး ကၠိစဲး က့ၤကွၢ်ဝဲလၢ အတၢ်ကူတၢ်သိး အကျါဒီး ဟဲဟ့ၣ်ဖိသၣ်အံၤ ဒီးစံးအီၤ, ကၤကွၢ်ဆ့ကၤလၢၤဖိ အံၤကမၤလၢၤနၤ တစဲးလီၤ. အဝဲတဲအီၤ, မ့ၢ်နတဲ လိာ်ကွဲတၢ်ဧါ, မ့တမ့ၢ်နတဲ နီၢ်ကီၢ်တၢ်တခီလဲၣ်. ကၠိစဲးတဲအီၤ ယဟ့ၣ်နၤလီၤ. ယကၤတဘၣ်ယၤ လၢၤဘၣ်. ဒီးလီၢ်ခံ အဝဲသ့ၣ်မ့ၢ် တံၤသကိးလၢအဂ့ၤ, ပှၤလၢပဃၢၤ လၢတဂၤဒီးတဂၤ အဂီၢ်န့ၣ်လီၤ. ကၠိစဲးနီၤဟ့ၣ်လီၤ စက့းအပျံၤ ဒီးဆ့ကၤလၢၤဒီး ဖိသၣ်အံၤ နီၤဟ့ၣ်လီၤကၠိစဲး လၢတၢ်သ့တၢ်ဘၣ် လၢအအိၣ်ဒီး အီၤလၢအမ့ၢ်ဝဲ တၢ်ဒိးစက့း န့ၣ်လီၤ.
ခရံာ်ဖိကဘၣ် ဟ့ၣ်နီၤလီၤ တၢ်ဒ်အံၤလီၤ. ပမ့ၢ်နီၤလီၤ တၢ်ဘျုးလၢ ပန့ၢ်ဘၣ်အီၤ ဆူပှၤဂၤဒီး ပှၤလၢအဘၣ်ဘျုး လၢပှၤတဖၣ် ကမၤဘျုးဆၢက့ၤ ပှၤလၢ ကျဲတဘိဘိလီၤ.
