ယိၤ ၁၅း၁၃, ပှၤမ့ၢ်ပာ်လီၤကွံာ် အသးသမူလၢ အတံၤအသကိး အဂီၢ်ဒီး, ပှၤတအိၣ်ဘၣ် ဒီး တၢ်အဲၣ်တၢ်ကွံ ဒိၣ်န့ၢ်အဝဲန့ၣ် နီတဂၤဘၣ်.
ခရံာ်ပာ်ဖျါန့ၢ်ပှၤလၢ ပှၤလၢအလီၤဘၣ် လၢတမျိၤတမျာ် အကျါတဂၤန့ၣ် မ့ၢ်ပှၤလၢ ပဃၢၤ လၢပှၤရှၤမရံ ဖိလၢအဂ့ၤတဂၤ အဂီၢ်လီၤ. လၢတၢ်ကတိၤအဂၤန့ၣ် ကယဲၢ်ပှၤလၢ အမၤစၢၤ လီၤက့ၤအသး တသ့ဘၣ်ဒီး လိၣ်ပတၢ်မၤစၢၤလၢ ပမၤအီၤ သ့န့ၣ်, မ့ၢ်ပှၤလၢပဃၢၤ လီၤ.
လၢကီၢ်ခဲနဒၣ် လၢဝ့ၢ်ဖိတဖျၢၣ်အပူၤ, ပှၤဖိၣ်သၣ်ခွါပှၢ် လီၤဃီ အိၣ်ဝဲ တဂၤ လၢအမ့ၢ်ပှၤလၢ အကလုၢ်အါဒီး ကတိၤဒိၣ် ကတိၤသွါတၢ် တဂၤဘၣ်. အမံၤမ့ၢ်ဝဲ ဒဲနယၢၣ်လီၤ. ပှၤကိးဂၤသ့ၣ်ညါအီၤ ဒီးပာ်ကဲ အီၤလၢ အမ့ၢ် ပှၤကစုဒု တဂၤ လီၤ. တဟါတခီၣ် လၢလါအီးကထိဘၢၣ်န့ၣ်, ကလံၤမုၢ်ဖးဒိၣ်လီၤ ဝဲဒီး မ့ၣ်အူ ထူၣ်လၢ အကပီၤထီၣ် ဝဲကိးဟါဒီး ဟ့ၣ်တၢ်ပနီၣ်လၢ ပှၤလဲၤတၢ်လၢ ထံကျါကသ့ၣ်ညါ ဝဲလၢ တၢ်လီၢ်န့ၣ် မ့ၢ်တၢ်လီၤပျံၤ အလီၢ်လီၤန့ၣ်, တကပီၤထီၣ်ဝဲ လၢၤဘၣ်. ပှၤခိး မ့ၣ်အူထူၣ် ဟ့ၣ်ထီၣ်တၢ်ပနီၣ်လၢ အဝဲလိၣ်ဘၣ်တၢ်မၤစၢၤလီၤ. ပှၤဝ့ၢ်ဖိကိးဂၤ သ့ၣ်ညါဝဲလၢ ပှၤြကၢးလဲၤဝဲ တဂၤဂၤ လၢကမၤစၢၤ ပှၤခိး မ့ၣ်အူ ထူၣ်န့ၣ်လီၤ. ပှၤလဲၤတအိၣ် နီတဂၤဘၣ်. ပှၤအိၣ်ဝဲထဲ တဂၤဧိၤ လၢအဒိးထီၣ် အချံဒီး လဲၤခီဖျိ ဝဲ ကလံၤမုၢ် လပီဒိၣ် ဆူ မ့ၣ်အူထူၣ်န့ၣ်လီၤ. ဖဲန့ၣ် အဝဲမၤစၢၤ တၢ်ဒီး ပှၤခိးမ့ၣ်အူထူၣ် မၤကပီၤထီၣ်က့ၤ မ့ၣ်အူသ့ဝဲဒီး ဟ့ၣ်တၢ်ပနီၣ် လၢပှၤကဘီဖိ တဖၣ်လၢ တၢ်လီၢ်န့ၣ် အိၣ်ဒ ီှလၢၢ်မုၢ်လ့တီ, ထံလီၤသဃိၣ် လပီဒိၣ် ဝဲအလီၢ် လၢတၢ်ကဘၣ် ဟးဆှဲးအီၤ န့ၣ်လီၤ. ပှၤလဲၤဘၣ်တၢ် ပူၤဖျဲးဒီး တၢ်ကီၢ်တၢ်ခဲ ဒီး တၢ်ဘၣ်ဒိ ဘၣ်ထံးန့ၣ်လီၤ. ထဲန့ၣ်ဒီး ပှၤဝ့ၢ်ဖိတဖၣ် ကတိၤဒိၣ် မၤလၤကပီၤ ဒဲနယၢၣ် လၢအမ့ၢ်ပှၤ လၢအလဲၤမၤစၢၤ တၢ်ဖဲ မ့ၣ်အူထူၣ်န့ၣ်လီၤ. မ့ၢ်ပှၤလၢအဒူတဂၤ, ပှၤလၢ အကၢၢ်ခီဖျိ အချံ လၢလပီဒိၣ်အကျါ, ပှၤလၢ အသ့ၣ်ညါ ဝဲတၢ်လဲၤကီအလီၢ်, တၢ်လဲၤညီအလီၢ် ဒီး တမ့ၢ် ပှၤလၢအကွၢ် တၢ်လၢ အတၢ်ဘၣ်ဘျုး ဒၣ်ဝဲတဂၤဧိၤ အဂီၢ်ဘၣ်. အဝဲမ့ၢ်မး ပှၤသ့ၣ်ညါ ပှၤလၢ ပဃၢၤ မ့ၢ်မတၤ လဲၣ်ဒီး တဘျီဃီ မ့ၢ်ဝဲ ပှၤလၢ ပဃၢၤ လၢအဂ့ၤ တဂၤလီၤ. ပှၤလၢပဃၢၤ လၢအဂ့ၤတဂၤ မ့ၢ်ပှၤလၢ အဟ့ၣ်လီၤအသးလၢ ပှၤဂၤလၢ အလိၣ်အတၢ် မၤစၢၤ, ဒီးမ့ၢ်ဝဲ ပှၤလၢ အအဲၣ်တၢ်ဆၢကတီၢ် ကိးကတီၢ်ဒဲး န့ၣ်လီၤ. (ကတိၤဒိ ၁၇း၁၇)
