၂ ရှမူၤ ၂၁း၁၇, ဒီးနီၢ်စရူၤယၤအဖိခွါ စီၤအဘံရှဲၤမၤစၢၤအီၤ...
စီၤဒၤဝံး မၤနၢၤကွံာ် စီၤကၤလယးလၢ အနီၣ်ဘျုးဒီး အတၢ်နာ်လီၤ. မ့ၢ်ဝဲ ယွၤအတၢ်မၤစၢၤ, အတၢ်ဆိၣ်ဂ့ၤလီၤ. ဘၣ်ဆၣ် လၢလီၢ်ခံ ကဒီးန့ၣ် ဘၣ်ဒုးတၢ်ဒီး စီၤယံရှဘနိး, လၢအမ့ၢ် ပှၤဖးဒိၣ်ဖးထီတဂၤလီၤ. လံာ်စီဆှံ စံးဝဲလၢ အဘီလီၤသယၢၢ် တိၢ်သၢကယၤ, ဒိၣ်ဒ် စီၤကၤလယး အသိး ဒီး ဘျီအဝဲအံၤ စီၤဒၤဝံးး လီၤဘှါဝဲ, ဒီး စီၤယံးရှဘနိး ကမၤသံအီၤလီၤ. ဘၣ်ဆၣ်ဒ် အဖျါလၢ အဖီခိၣ်အသိး နီၢ်စရူၤယၤအဖိခွါ စီၤအဘံရှဲၤ မၤစၢၤအီၤ ဒီး စီၤဒၤဝံး ပူၤဖျဲးဝဲလီၤ. မ့ၢ်ပကစံးလၢ စီၤဒၤဝံး အတၢ်နာ် တအိၣ်လၢၤဘၣ်ဧါ. ယွၤတမၤစၢၤ အီၤလၢၤဘၣ် န့ၣ်ဧါ. တမ့ၢ်ဒ်န့ၣ်ဘၣ်. ယွၤမၤစၢၤအီၤခီဖျိ အဘံရှဲၤ ဒီးဖျါဝဲလၢ ပှၤကညီ သကိး သကိး မၤစၢၤလိာ် အသးသ့ဝဲ လီၤ. ယွၤကဘၣ်အိးထီၣ်ကျဲ လၢပှၤကညီ ကမၤစၢၤလိာ်အသး ကသ့ ဝဲ အဂီၢ်လီၤ. ယွၤမၤစၢၤ စီၤဒၤဝံး လၢကမၤနၢၤ စီၤကၤလယး ခီဖျိ စီၤဒၤဝံး ဘၣ်သူ အတၢ်သ့တၢ်ဘၣ် လၢအမ့ၢ် ပှၤဘျုးနီၣ်ဘျုး အသ့ကတၢၢ် န့ၣ်လီၤ. ယွၤသူစီၤအဘံရှဲၤ လၢကမၤစၢၤ စီၤဒၤဝံး န့ၣ် မ့ၢ်ကျ ဲအဂၤတဘိလၢ ယွၤသူ ဝဲဒီး ဟ့ၣ်တၢ်ဂံၢ်တၢ်ဘါဒီး တၢ်သ့တၢ်ဘၣ်လၢ တၢ်ဒုးအကျဲလၢ အကမၤနၢၤ စီၤယံရှဘနိး လီၤ.
ခရံာ်ဖိသကိး ခရံာ်ဖိ ဘၣ်ကွၢ်ထွဲ လိာ်အသးဒီး မၤစၢၤလိာ်အသး ကဒဲကဒဲ လီၤ. ခရံာ်ဖိ ဘၣ်ကွၢ်ထီၣ် တၢ်မၤစၢၤလၢ တၢ်အိၣ်ဖှိၣ်သရၣ်, သရၣ်ပာ်စု, သရၣ်စိာ် တၢ်သးခုကစီၣ်, ဒီးတၢ်အိၣ်ဖှိၣ် သးပှၢ် တဖၣ်လီၤ. တၢ်အိၣ်ဖှိၣ်သရၣ် ဒိးပာ်စု တဖၣ်စ့ၢ်ကီး ကဘၣ်ကွၢ်ထီၣ်တၢ်မၤစၢၤ လၢတၢ်အိၣ်ဖှိၣ်သရၣ် ဒိးပာ်စု အဂၤတဖၣ် အအိၣ်လီၤ. တၢ်အိၣ်ဖှိၣ်သရၣ်လၢ တၢ်မၤစၢၤ တၢ်အိၣ်ဖှိၣ် အတၢ်ဒိၣ်ထီၣ်အဂီၢ် လဲၤဆူတဟံၣ်စဲ တဟံၣ်, ဘါထုကဖၣ် ဒီး သဆၣ်ထီၣ် တၢ်အိၣ်ဖှိၣ် ဖိဟံၣ်ဖိဃီဖိ တဖၣ်အခံလီၤ. လၢအမၤ တၢ်ဂ့ၤဒ်အံၤ ပစံးလၢ အဝဲသ့ၣ် မ့ၢ်ယွၤ အခ့တီ အပှၤလိၤ, အိၣ်ဒီး တၢ်စူၢ်တၢ်နာ် လၢအဂၢၢ်ဝဲ ကျၢၤဝဲ အဃိ တလိၣ်တၢ်မၤစၢၤဘၣ်. ပစံးဒ်န့ၣ်တသ့ဘၣ်. အဝဲသ့ၣ် ဘၣ်ဃးဒီး ဟီၣ်ခိၣ်, ဒီး အိၣ်ဒီး အတၢ်လီၤတူာ်လီၤကာ်လီၤ. ဘါထုကဖၣ် စ့ၢ်ကီးလၢ အဝဲသ့ၣ် အဂီၢ်တက့ၢ်.
