ဖံလံးပံၤ ၄း၁၃, ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ်ယဂံၢ်ယဘါ တဂၤအပူၤလီၤ.
ကၠ့မ်စ် အိၣ်အနံၣ် ၁၀, အနီၢ်ခိသွါန့ၢ် ပိာ်ခွါဖိ အဂၤလၢ အမၤလိခံတီၤဒီးအီၤ လီၤ. မ့ၢ်ဂဲၤထၢၣ် ဖးလံာ်လၢ အတီၤဖိတဖၣ် အမဲာ်ညါဒီး ဖးဝဲထုးထး ဒီးပှၤနံၤ ဘၣ်အီၤ ဒီးအမဲာ်ထီၣ်ဂီၤဝဲ ဒီးစံးဝဲ, ယဖးတသ့ဘၣ်. အပှၤ တီၤဖိတဖၣ် ကွၢ်တလီၤအီၤလီၤ. တနံၤတခီၣ် တီၤအသရၣ်မုၣ် လဲၤဟးယုၤ ကၠိဖိတဖၣ်လၢ ပှၢ်ပူၤလီၤ. စိာ်ဒီး ကိၣ်အက့အခီတဖၣ် လၢကဒုးအီၣ် ဝဲ ထိၣ်ဖိတဖၣ် အဂီၢ်လီၤ. တစိၢ်ဖိ ဒီး တၢ်အၢၣ်တၢ်ခံးလီၤဝဲ ဒီး မူခိၣ်ဖီလီၤလၢ ကလံၤမုၢ်အခုၣ် အူတၢ်ဖးဒိၣ်အကျါ လီၤ. သရၣ်မုၣ်ပျံၤတၢ်, မ့ၢ်လၢ တသ့ၣ်ညါဘၣ်ဝဲ လၢ ကဘၣ်ဆှၢက့ၤဖိသၣ် ဆူဟံၣ်ဒ်လဲၣ် အဃိလီၤ. အဝဲသံကွၢ် ကၠ့မ်စ် လၢအဆှၢက့ၤ အဝဲသ့ၣ် ခဲလၢာ် သ့ဧါန့ၣ်လီၤ. မ့မ့ၢ်လၢ အပူၤကွံာ်န့ၣ်, ကစံးဝဲလၢ ယဆှၢတသ့ဘၣ်. ဘၣ်ဆၣ် တဘျီအံၤ ထံၣ်ဝဲလၢ အသရၣ်မုၣ် ပျံၤတၢ်အဃိ တဲဆၢဝဲ ယဆှၢသ့လီၤ. ကိၢ်အလီၢ် တအိၣ်ဘၣ်.
ကၠ့မ်စ် ကဲပှၤဆှၢတၢ်ဖိလီၤ. အဝဲဖီၣ်ထီၣ် ပိာ်မုၣ်ဖိ စဲလ့ၣ် အစုဒီး လဲၤဝဲလၢညါ ဒီး သရၣ်မုၣ်ဒီးကၠိဖိ အဂၤတဖၣ် ပိၣ်ထီၣ် အခံလီၤ. ဆူညါ တစဲးဒီး ကလံၤမုၢ် အူတၢ်ဆူၣ်ဒိၣ်ထီၣ်လီၤ. ကၠ့မ်စ် တဲအသရၣ်မုၣ်လၢ ကျဲအဆၢလာ်န့ၣ် ဟံၣ်အိၣ်ကလီ ဝဲတဖျၢၣ် အဃိ, ပကလဲၤအိၣ်တဒၢဖဲန့ၣ်လီၤ. တုၤအတုၤလၢ ဒၢးန့ၣ် လဲၤနုာ်ဆူ ဒၢးပူၤတသ့ဘၣ်. အဂ့ၢ်ဒ်အံၤ, ဒၢးအြတဲၤ ကးတံာ်အသးအဃိလီၤ. ကၠ့မ်စ် ပျၢ်ကွံာ်စဲလ့ၣ် အစုဒီး ဃုကျဲလၢ ကလဲၤနုာ်ဝဲ အဂီၢ်လီၤ. ဘၣ်ဆၣ် ြတဲၤကိးဘ့ၣ်ဒဲး အပဒ့ ဖှိးတံၢ်အသးလၢ တၢ်အိပူၤ တခီလီၤ. ကၠ့မ်စ် မၤကွၢ်ဝဲ ပဲြတီဖိတဖၣ်, ဒီးအကျါတဘ့ၣ် ကျီဝဲဒီး အဝဲလဲၤနုာ် အိးထီၣ်ြတဲၤတဖၣ် ဒီးကၠိဖိ တဖၣ် လဲၤနုာ်ခဲလၢာ် ဆူဟံၣ်ပူၤလီၤ. ဘၣ်ဆၣ် စဲလ့ၣ်တဂၤ တအိၣ်လၢ ပှၤသကိးဘၣ်. ကၠ့မ်စ် လဲၤဃုအီၤ လၢတၢ်ချၢဒီး ထံၣ်လၢ အအိၣ်လၢ သ့ၣ်တထူၣ်အခီၣ်ထံး လၢမူခိၣ်ဖီအကျါလီၤ. အဝဲပုထီၣ်ပိာ်မုၣ်ဖိ န့ၣ်ဒီး ဆှၢနုာ်အီၤဆူ ဟံၣ်ပူၤလီၤ. တၢ်ဂိၢ်ဒိၣ်မး ဒီး တၢ်ကခံးလီၤလီၤ. ကၠ့မ်စ် ထၢဖှိၣ်သ့ၣ်ကူာ်လာ် ဖိတဖၣ်, ဂံာ်ဂူာ်ဝဲဒီး မ့ၣ်အူကဲၤထီၣ် ဝဲဒီး သရၣ်မုၣ် မၤကဲၤထီၣ် မ့ၣ်အူဖးဒိၣ်ဒီး ကၠိဖိတဖၣ် ဆူးလၢၤအသး လီၤ. ကၠ့မ်စ် ဟးဃုတၢ် ထံၣ်န့ၢ် မ့ၣ်အူဒၢဒီး သိဒီး ဒွဲၣ်ကပီၤထီၣ် မ့ၣ်အူဒၢဒီး တၢ်ကပီၤဝဲလၢ ဒၢးပူၤလီၤ. မိၢ်ပၢ် တဖၣ် ဟဲဃုက့ၤအဖိ, ထံၣ်ဘၣ်ဝဲလၢ အအိၣ်ဘၣ်လၢၤပုးြတုး လၢဒၢးပူၤဒီး အသးခုလီၤ. လီၢ်ခံ ကၠ့မ်စ် တမ့ၢ် ပှၤအသုၣ်လၢၤဘၣ်. မၤတၢ်မၤ အဝဲအံၤ သ့ဝဲဒီး အသကိးတီၤဖိ တဖၣ် ပာ်ကဲဒီး အဲၣ်က့ၤအီၤ သ့လၢ ခရံာ်အတၢ်မၤစၢၤအီၤ အဃိလီၤ. အမိၢ်အပၢ် သိၣ်လိအီၤလၢ အကဘါထုကဖၣ်တၢ် ဒီး ခရံာ်ဟ့ၣ်ဂံၢ် ဟ့ၣ်ဘါ အီၤလီၤ.
တနံၤအံၤ တၢ်ဂ့ၢ်မိၢ်ပှၢ် မ့ၢ်ဝဲ စီၤပီလူး ကွဲးသဆၣ်ထီၣ် တၢ်အိၣ်ဖှိၣ် ဖိလၢဝ့ၢ်ဖံလံးပံၤ အခံန့ၣ်လီၤ. စီၤပီလူး အုၣ်အသးလၢ တၢ်လၢ အကဲထီၣ်လိၣ်ထီၣ် အသးလၢ အမၤဝဲန့ၣ် မၤဝဲသ့လၢ ပှၤလၢအဟ့ၣ်ဂံၢ် ဟ့ၣ်ဘါအီၤ တဂၤ, လၢအမ့ၢ်ဝဲ ယ့ၣ်ရှူးခရံာ် အပူၤန့ၣ်လီၤ. လၢဒၤမ့ၤစ့း အကျဲခိၣ်န့ၣ်, စီၤပီလူး လီၤဃံၤ ဝဲဒီး မၤစၢၤလီၤ က့ၤအသး တသ့နီတမံၤဘၣ်. ခရံာ် တဲအီၤလၢ ကဘၣ်မၤဝဲဒ်လဲၣ် ဒ်လဲၣ်, ဒီး အမဲာ်လၢ အတထံၣ်လၢၤ တၢ်ဘၣ်န့ၣ် ထံၣ်ထီၣ်က့ၤတၢ်, ဒိးစူာ်ဒိးဘျၢအသးဒီး မၤခရံာ် အတၢ်မၤ ဒီးကဲထီၣ် မံးရှၢၣ် နရံၣ်အဒိၣ်ကတၢၢ်, ဒီးပှၤကဲထီၣ် ခရံာ်အပျဲၢ် အါကတၢၢ်လၢ အဝဲအတၢ်စံၣ်တဲၤတဲလီၤ ဒီး အတၢ်ကွဲး တဖၣ် အဃိလီၤ. ဘၣ်သဃိာ်ဒီး တၢ်သၣ်ဝံၤသၣ်စ့ၤ, တၢ်တ့ၢ်လီၤအီၤလၢ ဃိာ်ပူၤ, တၢ်ကွံာ်အီၤလၢ လၢၢ်, တၢ်တီၢ် အီၤဆါဆါ ကလဲာ်, ဘၣ်န့ၢ် ကလံၤမုၢ်အတၢ်မၤဒၢၣ်ဖဲ အဒိးကဘီဖဲ သုးဆှၢအီၤဆူ ဝ့ၢ်ရိမ့ၤ အကျဲန့ၣ်လီၤ. ပှၤဖၤရံၤရှဲ ဒီး ပှၤလုၢ်တၢ်ဒိၣ်တဖၣ် ဃုမၤသံအီၤ, မၤဟးဂီၤအီၤ လၢကျဲအါဘိ နာ်သက့ အဝဲခီဖျိ ဝဲသ့ ဒီးမၤနၢၤတၢ် မ့ၢ်လၢ ခရံာ်ဟ့ၣ်ဂံၢ်ဟ့ၣ်ဘါအီၤ လၢအသးသမူ အတၢ်မၤထီဘိ အဃိန့ၣ်လီၤ.
