စကၤ ၄း၁၀, မ့ၢ်မတၤတပာ်ကဲဘၣ် တၢ်အဆံးတဖၣ် အမုၢ်နံၤန့ၣ် တဂၤလဲၣ်.
ပတပာ်ကဲအီၤဘၣ်. ပတဆိကမိၣ်လၢ အဂ့ၢ်ဘၣ်. တၢ်ဆံးကိာ်ဖိဒၣ်လဲာ် မၤအၢတၢ်သ့ မၤဂ့ၤ တၢ်သ့ဝဲလီၤ. အဒိအိၣ် အါမးလီၤ. ကွၢ်ဆိကမိၣ် တၢ်မၤအၢတၢ် တဖၣ်တနီၤ တက့ၢ်.
ပှၤဖိသၣ်ခွါလါတဂၤ, ဖဲအမိၢ် ဆှုၣ်တၢ်အခါ ဂဲၤလိာ်ကွဲဒီး ပပီၣ်ဘီလ်ဖိ, ဒီးဘီလ်ဖိ နုာ်လီၤဆူ အကိာ်ယူၢ် ပူၤလီၤ. အမိၢ်ဟဲက့ၤထံၣ်အီၤ ဒီးကိးကသံၣ်သရၣ် တဘျီဃီနာ်သက့ ဖိသၣ်အံၤ သံဝဲလီၤ.
ဖဲတၢ်လိာ်ကွဲ ဘီလ် လၢဝ့ၢ်တကူၣ် ဘံၣ်အ့ၣ်အ့ၣ် တၢ်လိာ်ကွဲအလီၢ် တဘျီန့ၣ်, လၢပှၤကွၢ်ကီတၢ်လၢ အကလး အကျါပှၤတဂၤ အနၢ်ပူၤသးဒီး ထုးထီၣ် မ့ၣ်ကွံးတဘိ ဒီးခွဲးခွး အနၢ်ပူၤလၢ ဘျါအ့ၣ် အိၣ်ဝဲတကပၤ န့ၣ်လီၤ. ပှၤအိၣ်ဘူး ဒီးအီၤတဖၣ် ထံၣ်လၢအလီၤတီၢ်ဒီး ပှၤဆှၢအီၤဆူ တၢ်ဆါဟံၣ် ဒီးကသံၣ်သရၣ် စံးဝဲလၢ မ့ၣ်ကွံးဘိ ကဲၤထီၣ်လၢ အနၢ်ပူၤဒီး သံဝဲလီၤ.
ပှၤဖိသၣ် ၉ နံၣ်တဂၤ မၢအကွၢ်ထွဲ ပှၤဖိသၣ် လွံၢ်ဂၤလၢ အသးအိၣ် လွံၢ်နံၣ် ဆူအဖီလာ် လီၤ. ဖိသၣ်တဖၣ် ဂဲၤမ့ၣ်ကွံး, ဒီးမ့ၣ်အူကဲၤထီၣ်, အီၣ်လီၢ်ဖူဒီး ဖိသၣ် ၃ နံၣ်တဂၤ သံဝဲလီၤ.
ကွဲအ့ၣ်ပှၤဒီး ပှၤသံဝဲန့ၣ် ပနၢ်ဟူတဘျီတဘျီ စ့ၢ်ကီးဧါ.
သုးခိၣ်ဖိတဂၤ တခွဲဘျးအစုလီၤ. အတၢ်ပူၤလီၢ်ဆါဒိၣ်ထီၣ် ဒီး ပှၤဆဲးန့ၢ်အီၤလၢ ကသံၣ်ဆဲး, ပှၤယါဘျါ န့ၢ်အီၤအါမံၤ သနာ်က့ တဘျါဘၣ်. လၢခံကတၢၢ် သံဝဲ ဒၣ်လၢ အတၢ်ပူၤလီၢ် န့ၣ်အဃိလီၤ.
ခ့မ့ၣ် အဆူၣ်န့ၣ် မ့ၢ်တၢ်ဆံးကိာ်ဖိလီၤ. ပှၤလၢအသးက့ၣ်လိာ်အသး မ့ၢ်ပၢနုာ်လိာ် ခ့မ့ၣ်အဆူၣ်လၢ တၢ်အီၣ်အကျါဒီး ကဲထီၣ်ဝဲ စုၣ်အအၢကတၢၢ် လၢကသံၣ်သရၣ် မတၤမး ကူစါဝဲ တဘျါဘၣ်.
တၢ်ဆံးကိာ်ဖိ လၢအမၤဂ့ၤတၢ်ဒိၣ်မး ဒီးအဘျုးအိၣ်အါမး န့ၣ်အိၣ်စ့ၢ်ကီး လီၤ. ကဘီယူၤဖးဒိၣ် တဘ့ၣ်လၢ တၢ်သူအီၤလၢ တၢ်ကတ့ၢ်လီၤမ့ၣ်ပိၢ် အဂီၢ်န့ၣ်, အသိဘူးကလၢာ်, ဒီးကဘၣ် စီၣ်လီၤဝဲလၢ အသန့လီၤ. ဘၣ်ဆၣ်, ပှၤလၢ အနီၣ်ကဘီယူၤအံၤ ဒုး စဲၤလီၤဝဲ ကဘီယူၤအခီၣ် လၢအအိၣ်ဒီး အလ့ၣ်ပၣ် န့ၣ် တန့ၢ်လၢၤဘၣ်. လ့ၣ်ပၣ် မ့ၢ်တအိၣ် ဒီး ကဘီယူၤ စီၣ်လီၤ န့ၣ် ကပိၢ်ဖး ဟးဂီၤဝဲ ဒီဘ့ၣ်လီၤ. မ့ၢ်တၢ်ကီလၢ ပှၤနီၣ် ကဘီယူၤအဂီၢ်လီၤ. ဖဲအကပၤန့ၣ်, နီၣ်တံာ်စးခိ အိၣ်ဝဲတခါလီၤ. အဝဲဟံးန့ၢ်ဒီး မၤကွၢ်ဝဲ အပဒ့လၢ အကစဲၤလီၤ အခီၣ်အဂီၢ်လၢ နီၣ်တံာ်စးခိ တခါအံၤလီၤ. ကဘီယူၤ အခီၣ်စဲၤလီၤ အသးဒီး ကဘီယူၤ စီၢ်လီၤဝဲ သ့ဂ့ၤဂ့ၤ တဘၣ်ဒိဘၣ်ထံး ဘၣ်.
ကပီၤလုၤ ဒုးပူၤဖျဲး စီၤဒၤဝံး အသးသမူ ဒီး ယွၤအခ့အပှၤလၢ ကီၢ်စကီးတလဲၣ် တဂၤ အသးသမူလီၤ. အဝဲသ့ၣ် လဲၤအိၣ်ခူသူၣ်လၢ လၢၢ်ပူၤလီၤ. ဒုၣ်ဒါဟဲတုၤ ထံၣ်ကပီၤလုၤလၢ ကပီၤဆးထီၣ် ဝဲဖဲ အလဲၤနုာ် အိၣ်ခူသူၣ်ဝံၤအလီၢ်ခံ, သတးဒီး ဒုးဆိကမိၣ် ကမၣ်ဒုၣ်ဒါလၢ ပှၤတအိၣ်လၢ တၢ်ပူၤ နီတဂၤဘၣ် အဃိ, အဝဲသ့ၣ် တလဲၤနုာ်ဃုတၢ်လၢ လၢၢ်ပူၤဘၣ်. လၢၢ်ဖိဒံၣ်လၢ စီၤဒၤဝံး သူဝဲလၢ အနီၣ်ဘျုး အဂီၢ်ဖဲ အဒုးတၢ်ဒီး စီၤကၤလယးန့ၣ်, ပမ့ၢ်ထိၣ်သြတီၤအီၤဒီး စီၤကၤလယး အမိၢ်ပှၢ်ဖးဒိၣ်, ဒီးအသဃိးကတီၤ, ဘီဒီးနး ခဲလၢာ်န့ၣ်, မ့ၢ်တၢ်ဆံးကိာ်ဖိလီၤ. ဘၣ်ဆၣ် စီၤဒၤဝံး မၤနၢၤ စီၤကၤလယး ဒီးပှၤဖလ့ရှသးဖိ အသုးမုၢ်ဒိၣ် န့ၣ်လီၤ. ပှၤတဂၤဒီး တဂၤ အတၢ်မံၤဟူသၣ်ဖျါ, အတၢ်ဒိၣ်တုာ်ခိၣ်ပှဲၤ လၢသး, ဒီး အတၢ်သ့ၣ်ညါနၢ်ပၢၢ်န့ၣ်, ကဲထီၣ်အသးသ့လၢ တၢ်ဆံးကိာ်ဖိ တဖၣ်, ခီဖျိ တၢ်ရ့ဒီးယွၤ လၢသူၣ်ကံၢ်သးလဲ ဖုၣ်ကိာ် ကိးနံၤဒီး တၢ်ဖးလံာ်ကွဲးလံာ်လၢ အကတီၢ်ဖိ တဖၣ်ကိးနံၤန့ၣ်လီၤ.
