စံး ၂၀း၇, ပှၤတနီၤနီၤ သန့ၤအသးလၢ လ့ၣ်ကဟၣ်တဖၣ်, ဒီးပှၤတနီၤနီၤ လၢကသ့ၣ် တဖၣ်လီၤ. မ့မ့ၢ် ပဝဲဒၣ်အံၤ ပကသ့ၣ်နီၣ်ထီၣ်က့ၤ ယွၤပကစၢ် အမံၤလီၤ.
ယွၤဟ့ၣ် ဆၣ်ဖိကီၢ်ဖိ အတၢ်သ့ၣ်ညါဆိ ဘၣ်ဃး တၢ်ဘၣ်ယိၣ်အလီၢ် အိၣ်ဝဲ တဖၣ် မ့ၢ်တၢ်လီၤဆီ လၢပှၤကညီနၢ်ပၢၢ်အီၤတသ့ဘၣ် န့ၣ်လီၤ. လၢကီၢ်အဲကလံး န့ၣ်, လ့ကစၢၢ်ဖးထီအိၣ်ဝဲ တဖျၢၣ် လၢအမံၤဟူ သၣ်ဖျါဝဲလၢ ကသ့ၣ်နၢ်ပၢၢ်သ့ၣ် ညါတၢ်သ့တဒု အဃိလီၤ. အကစၢ်လဲၤဟးလိာ်ကွဲ ဒီးအီၣ်သကိး အီသကိး ဒီးတံၤသကိး တဖၣ်လီၤ. တုၤအဟဲက့ၤကဒါက့ၤ န့ၣ်, ဒိးဃ့ၢ်အကသ့ၣ်ချ့ချ့ ကလဲာ်လၢ မုၢ်နၤတၢ်ခံးကျါ န့ၣ်လီၤ. သတူၢ်ကလာ် ကသ့ၣ်အိၣ်ကတီၢ်ဝဲလီၤ. လၢတၢ်မဲာ်ဟံးဖးဒိၣ်အပူၤ အကစၢ်တီၢ်အီၤ ဆါဆါ ကလဲာ်, ဘၣ်ဆၣ် ထဲစုမုၢ်တဘိဒၣ်လဲာ် ကသ့ၣ် တလဲၤဆူညါဘၣ်. အကစၢ်စံၣ်လီၤ ကွၢ်ထံတၢ်ဒီး ထံၣ်ဝဲလၢ အကသ့ၣ် အိၣ်ဝဲလၢ လ့ြတီၤဖးထီ အခိၣ်ဒူ လၢအလီၤဘံနုာ်ဆူ ပီၣ်လဲၣ်ကၢၢ်ခိၣ်, ဒီးကစီၤထီၣ်ထီ ဝဲအပ့ၣ် လၢအကယၤ တဖၣ်န့ၣ်လီၤ. ကသ့ၣ်မ့ၢ် လဲၤဆူညါ ထဲတစဲးဖိန့ၣ်, ကသ့ၣ်ဒီး ပှၤကညီ ကလီၤတဲာ် သံဝဲ န့ၣ်လီၤ. ကသ့ၣ်အသးဆးန့ၢ် အကစၢ်န့ၣ်လီၤ.
လၢကီၢ်အဲကလံး တၢ်လီၢ်တတီၤ အမံၤလၢ ဒါးထ်မူအၢၣ် န့ၣ်, ပှၤဒီမါ၀ၤခံဂၤ, လဲၤဆူ ဝ့ၢ်ဒီး ဟဲက့ၤကဒါဆူ ဟံၣ်လၢဟါ အကတီၢ်လီၤ. တုၤတၢ်ခံးလီၤဒီး, ဘှ့ၣ်မုၢ်တၢ်သဝံ လီၤဝဲန့ၣ် တသ့ၣ်ညါက့ၤ အကျဲလၢၤဘၣ်. ဒုးအိၣ်ကတီၢ် အကသ့ၣ်လၢ အတွံၢ်လ့ၣ်ကဟၣ် ဒီးမံဝဲလၢ လ့ၣ်ကဟၣ်ပူၤ လၢဆ့လၢၤယၣ်လၢၤ အဖီလာ်လီၤ. ကသ့ၣ်တခီတအိၣ်ဂၢၢ်ဘၣ်. အဲၣ်ဒိးလဲၤတၢ်လီၤ. ဘၣ်ဆၣ် အကစၢ်တဖၣ် တကနၣ်ဃုာ်အီၤ ဘၣ်. မံမုာ်မံလၢၤဒၣ် အသးန့ၣ်လီၤ. တုၤလီၤဖးဖီမုၢ်ဒီး, မူခိၣ်လီၤလဲဝဲ ဒီးဆၣ်တဖၣ် အိၣ်ဖျါထီၣ်ဝဲ ဂ့ၤဂ့ၤ လီၤ. ပှၤဒီမါဝၤ ခံဂၤအံၤ ကွၢ်ထံတၢ်ဒီး သ့ၣ်ညါက့ၤဝဲလၢ တၢ်လီၢ်န့ၣ် အိၣ်ဘူးဒီး အဟံၣ်လီၤ. ကသ့ၣ်, သ့ၣ်ညါဝဲလၢ အဂၢၤအိၣ်တယံၤဘၣ် ဒီးအဲၣ်ဒိးက့ၤမံဝဲလၢ အလီၢ်လၢ အလၢၤန့ၣ်လီၤ. အကစၢ်တဖၣ် တခီ တသ့ၣ်ညါတၢ်လၢ ကသ့ၣ် သ့ၣ်ညါဝဲန့ၣ်ဘၣ်. ကသ့ၣ်ဘၣ်အိၣ်လၢ တၢ်ဂိၢ်ကျါ တုၤလၢဖးဖီမုၢ်ညါ န့ၣ်လီၤ.
ပှၤဒိးကသ့ၣ် ဃ့ၢ်ြပၢလၢ အစဲာ်နီးတဖၣ် တၢ်စံးဝဲလၢ နၢ်ပၢၢ်အကသ့ၣ် အလုၢ်အလၢ်ဒီး ကသ့ၣ်နၢ်ပၢၢ် အတၢ်ပာ်သူၣ်ပာ်သး ဒီးနၢ်ပၢၢ်လိာ်အသးဒ် ပှၤကညီ ကတိၤသကိးတၢ်န့ၣ်လီၤ. ပှၤကညီ အတၢ်သ့ၣ်ညါဆိတၢ် မ့ၢ်အိၣ်လီၤဆီဒီး ပှၤစံးသကိးဝဲလၢ ပှၤန့ၣ်အိၣ်ဒီး ကသ့ၣ်အတၢ်သ့ၣ်ညါန့ၣ်လီၤ. ပှၤကညီ မ့ၢ်တၢ်ဘၣ်တ့ အထီကတၢၢ်လီၤ. ထဲသိး ကသ့ၣ် သ့ၣ်ညါဆိတၢ် ဘၣ်ယိၣ်အလီၢ်အိၣ် ကမၤအသးန့ၣ်, ပှၤကညီ သ့ၣ်ညါဆိ တၢ်သ့ဝဲလီၤ. လိၣ်ဒၣ်လၢ ပှၤကညီ ကဃုနၢ်ပၢၢ် အီၤလီၤ.
