ယိၤရှူ ၁း၉, ယမၤလိာ်လံနၤတမ့ၢ်ဘၣ်ဧါ, ပာ်ဆူၣ်နသးဒီး တံးတဟီၣ်တက့ၢ်. ပျံၤတၢ်တဂ့ၤ. ဘၣ်ယိၣ်တၢ် တဂ့ၤ.
ဖဲဟီၣ်ခိၣ်ဒီဘ့ၣ်တၢ်ဒုး ခံဘျီတဘျီန့ၣ်, အဆၢကတီၢ်အိၣ်ဝဲတဘျီလၢ အမ့ၢ်တၢ်ခံး ကတၢၢ် ဒီးတၢ်လီၤပျံၤဒိၣ် ကတၢၢ် လၢကီၢ်အဲကလံး ကီၢ်စကီးတလဲၣ် အဂီၢ်န့ၣ်လီၤ. ြဖၣ်စ့ၣ် ဟ့ၣ်လီၤအသးလံ. ကီၢ်အဂၤတဖၣ်လၢ ကီၢ်ယူရပၤဘၣ် ဟ့ၣ်လီၤအသးခဲလၢာ်လံ. ဟံးတလၢၣ် အကဘီယူၤတဖၣ် တ့ၢ်လီၤမ့ၣ်ပိၢ်လၢ ဝ့ၢ်လိဒိၣ်ဒီး ဝ့ၢ်အဂၤတဖၣ် အဖီခိၣ်ဒီး မၤလီၤပှီၢ် မၤဟးဂီၤ တၢ်နးနးကလဲာ်လီၤ. မ့ၣ်ပိၢ်လၢ အအိၣ်ဒီး အဒံးဆ့ဒီး ပှၤကညီ တအိၣ်လၢအကဒုးနဲၣ် အကျဲလၢ အကပိၢ်ဖး မၤဟးဂီၤတၢ် ကိးဝဲလၢ V1, V2, န့ၣ် တၢ်ပျၢ်လီၤအီၤ အါအါကလဲာ် လၢအကမၤလီၤကလဲကွံာ် ကီးအံၤလီၤ. တုၤတၢ်မၤဒၢၣ်အစုကဝဲၤ ဟဲဝဲလံဒီး တၢ်ဒုးပလီၢ် အဒၢလွဲသီၣ်ထီၣ်လီၤ. ပှၤကိးဂၤဘၣ်စံၣ်လီၤလၢ တၢ်အိၣ်ပူၤဖျဲး အတၢ်ပူၤ အိၣ်ဒီး တၢ်ပျံၤတၢ်သးကနီး လီၤ. ပှၤလၢ အဂံၢ်ဆူၣ်ကတၢၢ် ဘၣ်ပျံၤတၢ်ဘၣ်ဖုးတၢ် လီၤ.
ဘၣ်ဆၣ် တၢ်ကလုၢ်အိၣ်ဝဲတခါ လၢအသီၣ်ထီၣ်ဝဲလၢ ကီၢ်ဒီဘ့ၣ် န့ၣ်လီၤ. ဖဲတၢ်ကလုၢ်အဝဲအံၤ ဘၣ်တၢ်နၢ်ဟူ အီၤတပူၤလၢ်လၢ် လၢဝ့ၢ်ပူၤဂ့ၤ, သဝီပူၤဂ့ၤ, လၢခိခိၣ်ပှၢ်လၢ်ကျါဂ့ၤ, ပိာ်မုၣ်ဂ့ၤ, ပိာ်ခွါဂ့ၤ ဒိကနၣ်ဒီး မၤထွဲ တၢ်ကလုၢ် အတၢ်နဲၣ်လီၤ တဖၣ်လီၤ. နီၣ်ကွံာ် အတၢ်ဘၣ်ယိၣ်သးပျံၤ, အတၢ်အိၣ်တၢ်ဆိးလၢ အဟးဂီၤ လံတဖၣ်, ဒီးမၤဆူၣ် ထီၣ်တၢ်ပၢၢ်ဆၢလီၤ. တၢ်ကလုၢ်အဝဲအံၤမ့ၢ်ဝဲ, အဝဲသ့ၣ် အပှၤဆှၢတၢ်, ပှၤခိၣ်ဖးဒိၣ် ဝ့စထၢၣ် ခၠၢးခၠ့လ် န့ၣ်လီၤ. အတၢ်ကတိၤ ဟ့ၣ်ဆူၣ်ထီၣ်မ့ၢ်ဝဲ, “သုတၢ်သူၣ်ဒူသးဒူ, တၢ်သးခူတလ့ၢ် ကမၤနၢၤတၢ်လီၤ. ဆူတၢ်မၤကိးဂၤ, ပှၤကိးဂၤလၢ အလီၢ်ဒၣ်ဝဲစုာ်စုာ် တက့ၢ်.”
လံာ်စီဆှံအဆၢလၢ တနံၤအံၤ အဂီၢ်မ့ၢ်ဝဲ လၢစီၤယိၤရှူ ဒီးပဝဲ ခဲလၢာ်အဂီၢ် လီၤ. စီၤယိၤရှူ တပျံၤ တၢ်ဘၣ်. ပာ်ဆူၣ်အသးဒီး ဒုးန့ၢ်ကီၢ်တဖၣ် လၢထံကျိယၤဒ့ၣ် အ၀ၢ်ဘးခီ ဒီး နီၤလီၤဝဲဆူ ပှၤအံၣ်စရ့လး ဖိ ၁၂ ဒူၣ်လီၤ. စီၤဒၤဝံး လၢပှဲၤဝဲဒီး တၢ်ဒူတၢ်ဃိၤလၢအသးပူၤ, ထဲတဂၤဧိၤ ခီၣ်ဒုးစီၤ ကၤလယါ ဒီး မၤနၢၤ အီၤလီၤ.
